မောင်မောင်/People’s Spring
ကရင်အမျိုးသားအစည်းအရုံး(KNU) တောင်ငူခရိုင် သံတောင်ကြီး(ဒေါ့ဖားခို)မြို့နယ် အုပ်ချုပ် နယ်မြေအတွင်း စစ်ကောင်စီတပ်၏ လေကြောင်း တိုက်ခိုက်မှုကြောင့် ကလေးငယ် တစ်ဦးသေဆုံးပြီး အရပ်သား သုံးဦးဒဏ်ရာရရှိခဲ့ကြောင်း KNU ဗဟိုက ယမန်နေ့တွင် သတင်းထုတ်ပြန်သည်။
တောအူး(တောင်ငူ)ခရိုင်၊ ဒေါ့ဖားခို (သံတောင်ကြီး)မြို့နယ် ကလေ့လို အရှေ့ဖက်ခြမ်းဒေသရှိ ဘဲခလေးခိုကျေးရွာ နှင့် သေ့ခူဒဲကျေးရွာတို့အတွင်းသို့ စစ်ကောင်စီက မေလ ၅ရက်တွင် အကြောင်းမဲ့ လေကြောင်း တိုက်ခိုက်ခဲ့ခြင်းဖြစ်သည်ဟု ဆိုသည်။
ဘဲခလေးခိုကျေးရွာအတွင်းသို့ လေကြောင်းမှ (၅)ကြိမ် လေကြောင်းတိုက်ခိုက်မှုများပြုလုပ်ခဲ့ရာ ကျေးရွာအတွင်းရှိ ကလေးငယ်တစ်ဦး အသက်သေဆုံး ခဲ့ရပြီး အရပ်သားသုံးဦးထိခိုက်ဒဏ်ရာရရှိခဲ့ကြောင်း၊ သေ့ခူဒဲကျေးရွာအတွင်းသို့ပြုလုပ်ခဲ့သော လေကြောင်း တိုက်ခိုက်မှု (၂)ကြိမ်အတွင်း ပြည်သူလူထုထိခိုက်ဒဏ်ရာရရှိမှု မရှိခဲ့သော်လည်း သေ့ခူဒဲ ကျေးရွာ ဘုရားကျောင်းနှင့် ၎င်းအနီးရှိအဆောက်အဦးများပျက်စီးခဲ့ရကြောင်း ဖော်ပြထားသည်။
Public Service Announcement
စစ်ကောင်စီသည် KNUနယ်မြေများအတွင်းရှိ အရပ်သား ပြည်သူများကို လေကြောင်း တိုက်ခိုက်မှု လက်နက်ကြီးပစ်ခတ်မှုများ ဆက်တိုက်ပြုလုပ်လျက်ရှိသည်။
မေလ ၈ရက်ညပိုင်းကလည်း KNU သထုံခရိုင် သထုံမြို့နယ်တွင် စစ်ကောင်စီတပ် ခမရ((၉)တပ်စခန်းမှ ပြည်သူလလူထုနေထိုင်ရာ ကျေးရွာထဲသို့ လက်နက်ကြီး (၄)လုံးပစ်ခတ်ရာ မိချောင်းအိုင် ကျေးရွာအနီး လက်နက်ကြီးတစ်လုံးကျရောက်ပေါက်ကွဲကာ နွား (၃)ကောင် လက်နက်ကြီးကျည်စထိမှန် ဒဏ်ရာရရှိခဲ့ပြီး ကျွဲ တစ်ကောင်သေဆုံးခဲ့သည်ဟု KNUက အသိပေးထားသည်။
ထို့ပြင် KNU ဖားအံ(ဘားအံ)ခရိုင်အုပ်ချုပ်နယ်မြေ၊ နဘူးမြို့နယ် စောဟဲကျေးရွာ အတွင်းသို့ အာဏာသိမ်းအကြမ်းဖက်စစ်ကောင်စီတပ်များဖြစ်သည့် ခမရ−၉၇ နှင့် ခလရ−၂၃၀ တပ်များက မေလ ၁၀ရက်တွင် ပြည်သူလူထုပိုင် နေအိမ်များကို အကြောင်းမဲ့ မီးရှီု့ခဲ့ရာ အိမ် ၈လုံး ပျက်စီးခဲ့သည်။
စစ်ကောင်စီတပ်များမှ ကော်သူးလေအုပ်ချုပ်နယ်မြေများအတွင်း ယခုကဲ့သို့ လူ့အခွင့်အရေးချိုးဖောက်မှုများအား နေစဉ်ရက်ဆက်ကျူးလွန်လျှက်ရှိသောကြောင့် ကော်သူးလေအုပ်ချုပ်နယ်မြေအတွင်းနေထိုင်သော ပြည်သူလူထုများမှာ စိတ်ပိုင်းဆိုင်ရာမလုံခြုံမှုများ ရုပ်ပိုင်းဆိုင်ရာ မလုံခြုံမှုများအား ခံစားနေရပြီး ပြည်သူလူထုအမြောက်အများမှာလည်း မိမိတို့တို့ နေရပ်ကိုစွန့်ခွာကာ ထွက်ပြေးတိမ်းရှောင်နေကြရကြောင်း KNU ဗဟိုက ထုတ်ပြန်ထားသည်။
