မုံရွာ – မန္တလေးပိုင်း၌ ဝမ်ပေါင်ကြေးနီတင်ယာဥ်များ နှစ်ရက်ဆက် တိုက်ခိုက်ခံရ

ဇေအောင်/People’s Spring

စစ်ကိုင်းတိုင်း၊ မုံရွာ – မန္တလေးလမ်းပိုင်း၌ ကြေးနီတင်ယာဥ်များ နှစ်ရက်ဆက် တိုက်ခိုက်ခံရကြောင်း သတင်းရရှိသည်။

ဇွန်လ ၁၀ ရက် နံနက် ၈ နာရီ မိနစ် ၄၀ခန့်ကဝမ်ပေါင်ကုမ္ပဏီမှထွက်လာသော ကြေးနီတင်တွဲကား ခုနစ်စီးပါယာဥ်တန်းအား ချောင်းဦးမြို့နယ်၊ နတ်ရေကန်နှင့် ရေပိုးစားကျေးရွာကြား၌ ပဒေသာမိုင်းများဖြင့် နှစ်နေရာဖောက်ခွဲတိုက်ခိုက် ခဲ့ရာ ကြေးနီတင်တွဲကားတစ်စီး ထိခိုက် ပျက်စီးခဲ့ကြောင်း မုံရွာခရိုင်အမှတ်(၁၁)တပ်ရင်း PDF-South Monywa၏ တာဝန်ရှိသူ ဒေါင်းကာရံက ပြောသည်။

ယမန်နေ့ (ဇွန်လ ၁၁ ရက်) ညနေ၄နာရီ မိနစ်၄၀ခန့်ကလည်း ကြေးနီတင်တွဲကားများ ဖြတ်သန်းချိန် ပဒေသာမိုင်းအကြီး သုံးလုံးဖြင့် ဖောက်ခွဲတိုက်ခိုက်ခဲ့ကြောင်း၊ တိုက်ခိုက်မှုကြောင့် ကင်းစောင့်ပေးနေသော စစ်သား လေးဦးအနက် နှစ်ဦးသေဆုံးကာ စစ်ဗိုလ်တစ်ဦးလည်း မိုင်းစထိခဲ့ကြောင်း အထက်ပါတာဝန်ရှိသူ​က ပြောသည်။

Public Service Announcement

“ကြေးနီကားတွေက ရက်အများကြီးမခြားပါဘူး။ နေ့တိုင်းနီးပါး ဖြတ်ပါတယ်။ ထိခိုက်သေဆုံးတာကတော့ မျက်မြင်ရော အတွင်းထဲကရော ရသလောက်စုံစမ်းထားရတာပါ။”ဟု PDF-South Monywa၏ တာဝန်ရှိသူ ဒေါင်းကာရံက ပြောသည်။

“အခုရက်ပိုင်းတော့ ကြေးနီကားတွေဖြတ်နေတော့ လမ်းကခဏခဏပိတ်တယ်။ မိုင်းဆွဲတာတွေလည်းရှိတယ်။”ဟု မုံရွာမြို့ခံ ခရီးသွားတစ်ဦးက ပြောသည်။

ဇွန်လ ၁၀ ရက်က စစ်ဆင်ရေးကို နွေဦးလူငယ် People’s Defence Force၊ တောသားကြီးပြည်သူ့ကာကွယ်ရေးတပ်ဖွဲ့၊ Myinmu Local Defence Force၊ Pentagram၊မြန်မာအစ္စလာမ်အထူးကွန်မန်ဒိုတပ်ဖွဲ့တို့နှင့်လည်းကောင်း၊ ၁၁ ရက်နေ့ စစ်ဆင်ရေးကို မုံရွာခရိုင်တပ်ရင်း(၁၁)တပ်ခွဲ(၃)၊ တပ်စု(၂)Youth Vigor Revolution Forceနှင့်လည်းကောင်း ပူးပေါင်းတိုက်ခိုက်ခဲ့ခြင်းဖြစ်သည်။

မုံရွာ – မန္တလေးလမ်းပိုင်း ခရီးသွားယာဥ်များအနေဖြင့် စစ်ကောင်စီယာဥ်များနှင့် အနီးကပ်လိုက်ပါမောင်းနှင်ခြင်းများ လုံးဝမပြုလုပ်ရန် ဒေသတွင်းတော်လှန်ရေးအင်အားစုများက သတိပေးထားသည်။