▪︎ရန်ကုန်လက်ဖက်ရည်ဆိုင်အချို့ စားအုန်းဆီရှားပါး၍အီကြာကွေး ၊စမူဆာ ၊ပလာတာ အရောင်းရပ်
ရဲခေါင် ၊သုည /People’s Spring
အမေရိကန် ဒေါ်လာနှင့် နိုင်ငံခြားငွေ မကုန်စေရန်စစ်ကောင်စီက ပြည်ပ မှ တင်သွင်းသောသွင်း ကုန်ပစ္စည်း များကို ကန့်သတ်လျှော့ ချလိုက်ခြင်းနှင့် သွင်းကုန်လိုင်စင်ခွင့်ပြုချက် မရမီ ဆိပ်ကမ်း နှင့် လေဆိပ်သို့ ကြိုတင်ရောက်ရှိလာသည့် ကုန်ပစ္စည်းများကို အရေး ယူမည်ဟု စစ်ကောင်စီက ကြေညာပြီးနောက်ပိုင်း စားအုန်းဆီပြတ်လပ်မှု ဖြစ်ပေါ်လာခြင်း ဟု လုပ်ငန်းရှင်အချို့ကပြောသည်။
ထို့အပြင် စစ်ကောင်စီခန့် ရပ်ကွက်အုပ်ချုပ်ရေးမှူးများမှ စားအုန်ဆီအချိုးကြ ရောင်းချမှု အများစုမှာလည်း ရပ်ဆိုင်းကုန်သဖြင့် ကုမ္ပဏီများက ဖြန့်ဖြူးရသည့် ယခင်ပုံစံအတိုင်းရောင်းဝယ်နေရကြောင်း ပြည်သူအချို့ကပြောသည်။
စားအုန်းဆီ ရှားပါးပြတ်လပ်မှုကြောင့် ရန်ကုန်မြို့ရှိ လက်ဖက်ရည် ဆိုင်အချို့တွင် အီကြာကွေး ၊စမူဆာ ၊ပလာတာ စသည့် စားအုန်းဆီဖြင့်ကြော်ရောင်းရသောမုန့်အချို့ ကို အရောင်းရပ်ထားရကြောင်း လက်ဖက်ရည်ဆိုင် အချို့ကပြောသည်။
Public Service Announcement
“အရင်ကဆို ငါးပိဿာ မဟုတ် နှစ်ပိဿာ ခွဲတမ်းရတယ်။အခုက ဘယ်နေရာမှာ မှ ဝယ်မရတော့ အကြော်စာ တွေ နားလိုက်ရပြီ။ကျွန်တော့်တစ်ဆိုင်းထဲ မဟုတ်ဘူး ဘေးအနီးနားက ဆိုင်တွေပါ မရတော့တာ”ဟု ရန်ကင်းမြို့နယ်ရှိလဘက်ရည်ဆိုင်ပိုင်ရှင်တစ်ဦးက ပြောသည်။
အခြားလက်ဖက်ရည်ဆိုင်ပိုင်ရှင်တစ်ဦးကလည်း ယခုရက်ပိုင်းအတွင်း စားအုန်းဆီမှာ ဈေးတက်သည့်အပြင် ဝယ်ရခက်နေကြောင်းလည်း ပြောသည်။ ရပ်ကွက်အတွင်း စစ်ကောင်စီသတ်မှတ်ဈေးဖြင့် လာရောင်းသောကားလည်းမလာတော့သလို ၊ ဈေးထဲတွင် စစ်ကောင်စီသတ်မှတ်နှုန်းဖြင့် တစ်အိမ် ၅၀ သားရောင်းပေးသောဆိုင်မှာလည်း တန်းစီ ဝယ်ယူသူများလွန်း၍ စားအုန်းဆီဝယ်ရခက်ခဲနေကြောင်း၎င်းကပြောသည်။
” မနက်အစောထဲက တန်းဆီတဲ့လူတွေက အများကြီး ဖြစ်နေပြီ။ တစ်ခါဝယ်ရဖို့ တစ်နာရီကျော်လောက် တန်းစီရတယ်။ ကိုယ့်အလှည့်ကျမယ့် ဆီကုန်သွားတာလည်း ကြုံနေရတယ်။ ကျွန်တော်တို့ ဆိုင်ဆို အရင်က အီကြာကွေး၊ စမူဆာ၊ ပလာတာကို တနေကုန်နီးပါး ကြော်ပြီးရောင်းတယ်။ အခုကျတော့ မနက်ခင်း တစ်ပိုင်းပဲ ရောင်းနိုင်တယ်။ နေ့လည်လောက်ဆိုကြော်ပေးဖို့ ဆီက မလောက်တော့ဘူး” ဟု အထက်ပါလက်ဖက်ရည်ဆိုင်ပိုင်ရှင်က သူ၏ အတွေ့အကြုံကိုပြောသည်။
စားအုန်းဆီ အခြေခံလက်ကားရည်ညွှန်းဈေးနှုန်းကိုတစ်ပိဿာ ၅,၃၆၅ ကျပ် ဖြစ်ကြောင်း စစ်ကောင်စီက သတ်မှတ်ထားသော်လည်း ပြင်ပပေါက်စျေးမှာ တစ်ပိဿာ တစ်သောင်းကျော်ရှိနေသည်။
“အရင်က စားအုန်းဆီစျေးက တစ်ထောင်ဝန်းကျင်ပဲ ရှိတာလေ။ အဲ့ဒါကို အရောအနှောတွေပါတော့ ကျန်းမာရေးအရ မကောင်းဘူး ဆိုပြီး လူတွေက မစားကြဘူး။ အခြားစျေးသက်သာတဲ့ ဟင်းရွက်ဆီမျိုးတွေပဲ ဝယ်သုံးကြတယ်။ အခုက အခြားဆီစျေးတွေ တက်သွားတော့ ရပ်ကွက်ထဲက လူတွေက စားအုန်းဆီကိုပဲ အားပြုပြီး ဝယ်သုံးကြရတယ်။ အခုတော့ စားအုန်းဆီပါ စျေးတွေတက်၊ ဝယ်ရလည်း ခက်နေတော့ အကုန်တိုင်ပတ်ကုန်တယ်” ဟု ရန်ကုန်မြို့ခံ ပြည်သူတစ်ဦးက ပြောသည်။
စားသုံးဆီကို ပြည်ပမှနှစ်စဉ် အမေရိကန်ဒေါ်လာသန်း ၆၀၀ ကျော်ဖိုး တင်သွင်းနေရကြောင်း စစ်ကောင်စီ၏ ကုန်သွယ်ရေးဦးစီးဌာနက ထုတ်ပြန်ထားသည်။
“မူဝါဒတွေက မမှန်တော့ ဒုက္ခရောက်တာပေါ့။အခြေ ခံလူထုကို ကိုယ်စားမပြုတာ မှန်သမျှတော့ ရှေ့လျှောက်အခက်အခဲ ဖြစ်နေဦးမှာပဲ။အခုက စားအုန်းဆီတစ်ခုတည်း အခက်အခဲ ဖြစ်နေတာမ ဟုတ်ဘူး။တ ခြား ပြည်ပက သွင်းနေရတဲ့ ပစ္စည်းတွေပါ သွင်းမရတော့ တာရှိတယ်”ဟု ပြည်တွင်းလုပ်ငန်းရှင်တစ်ဦးက ပြောသည်။
( ၂၀၂၄ နှစ်ဆန်းပိုင်းတွင် စစ်ကောင်စီသတ်မှတ်ဈေးဖြင့် စားအုန်းဆီဝယ်ယူနိုင်ရန် တန်းစီဝယ်ယူနေသောပြည်သူများ၊ စားအုန်းဆီ ရှားပါးဈေးတက်လာ၍ ရန်ကုန် လက်ဖက်ရည်ဆိုင်အချို့တွင် အီကြာကွေး၊စမူဆာ ၊ပလာတာရောင်းချမှုရပ်နားလာကြောင်း လက်ဖက်ရည်ဆိုင် ပိုင်ရှင်အချို့ကပြောသည် ။ဓါတ်ပုံ-AFP ၊CJ )
