ဟန်နွေ/People’s Spring
ကရင်အမျိုးသားအစည်းအရုံး(KNU) တပ်မဟာ(၆)ဒူးပလာယာခရိုင်တွင် စစ်ကောင်စီတပ်က မစ်ဇိုင်းဒုံးများဖြင့် ရမ်းသမ်းပစ်ခတ်ခဲ့၍ အရပ်သားထိခိုက်မှုဖြစ်ခဲ့ကြောင်း KNU ဗဟိုက ယနေ့(ဇူလိုင် ၁၂ရက်) သတင်းထုတ်ပြန်သည်။
ဇူလိုင် ၉ရက်တွင် အောင်ဇေယျစစ်ကြောင်းမှ ပစ်ထုတ်သော အတွဲလိုက် မစ်ဇိုင်းဒုံးများကြောင့် ဒူးပလာယာခရိုင်၊ ကော့ကရိတ်မြို့နယ်၊ ထီးမူးထ ကျေးရွာကျရောက်ပေါက်ကွဲကာ အသက် (၁၁) နှစ်အရွယ် ကလေးတစ်ဦး နှင့် အသက် (၅) နှစ်အရွယ် ကလေးတစ်ဦး အပါအဝင် ပြည်သူ ၃ဦး လက်နက်ကြီး ကျည်စထိမှန် ဒဏ်ရာရခဲ့သည်ဟု ဆိုသည်။
ထို့ပြင် ထီးမူးထကျေးရွာမှ ပြည်သူနေအိမ် ၁၂ လုံးနှင့် ပြည်သူပိုင်ကားတစ်ချို့ ၊အိမ်သုံးပစ္စည်းများ ပျက်စီးဆုံးရှုံးခဲ့ရသည်ဟု အသိပေးသည်။
Public Service Announcement
အဆိုပါ အောင်ဇေယျစစ်ကြောင်းသည် မြ၀တီမြို့ကို ဦးတည်ပြီး စစ်ဆင်ရေးပြုလုပ်လျက်ရှိသည့် စစ်ကြောင်းဖြစ်ပြီး KNU ပူးပေါင်းတပ် များ၏ တိုက်ခိုက်မှုကြောင့် လက်ရှိတွင် ဒေါနတောင် တောနော်ရေတံခွန်အနီး၌ ရှေ့ဆက်မတိုးနိုင်သည့် အခြေအနေတွင် လက်နက်ကြီး ရမ်းသမ်းပစ်ခတ်မှုများ လုပ်ဆောင်နေခြင်းဖြစ်သည်။
သင်္ဃန်းညီနောင် အခြေစိုက်စစ်ကောင်စီ ဗျူဟာနှင့်တပ်ရင်းများကို KNU ပူးပေါင်းတပ်က မတ်လ နှင့် ဧပြီလဆန်းတွင် အပြီးသတ်သိမ်းပိုက်ပြီးနောက် ဧပြီ ၇ရက်မှစတင်ကာ အောင်ဇေယျစစ်ဆင်ရေးကို စစ်ကောင်စီတပ်က ဆင်နွှဲနေခြင်းဖြစ်သော်လည်း လက်တွေ့မြေပြင်တိုက်ပွဲများ၌ စစ်ကောင်စီတပ်များ အထိနာလျက်ရှိသည်။
စစ်ကောင်စီသည် စစ်ရေးအရ တိုက်ခိုက်မှုများ ခံနေရသည့် KNUအုပ်ချုပ်နယ်မြေများရှိ ပြည်သူလူထုများရှိရာသို့ ပစ်မှတ်ထားပြီး လက်နက်ကြီး၊ လေကြောင်းတိုက်ခိုက်မှုများ မကြာခဏ လုပ်ဆောင်လျက်ရှိရာ အရပ်သားရာချီသေဆုံးထိခိုက်မှုများ ရှိခဲ့ပြီးဒေသခံ ပြည်သူများစွာ ဘေးလွတ်ရာတိမ်းရှောင်နေကြရသည်။
အောင်ဇေယျစစ်ဆင်ရေးနှင့်အတူ ဒေါနတောင်သို့ ရောက်ရှိနေသော စစ်ကောင်စီတပ်ဖွဲ့များအား အသိပေးချက်ကို ကရင်အမျိုးသားလွတ်မြောက်ရေးတပ်မတော်(KNLA) ဗဟို ဌာနချုပ်က ဇူလိုင် ၅ရက်ကထုတ်ပြန်ခဲ့ရာ ရောက်သည့်နေရာမှ KNLAတပ်ဖွဲ့ထံ လာရောက်လက်နက်အပ်နှံကြရန် သတိပေးထားသည်။
မြဝတီမြိုကို စစ်ကူပိုရန် ဒုချုပ် ဒုဗိုလ်ချုပ်မှူးကြီးစိုးဝင်း ကိုယ်တိုင်ကွပ်ကဲသည်ဆိုသော နိုင်ငံတော်အဆင့် “အောင်ဇေယျစစ်ဆင်ရေး”ဟုအမည်ပေး၍ အင်အားရာ၊ထောင်ချီ အသုံးပြုခဲ့သော စစ်ကြောင်းသည် ဧပြီ ၇ရက်မှစ၍ ဖားအံနှင့် မော်လမြိုင်မှ ချီတက်ခဲ့သည်။ ၄ရက်ဖြင့် မြဝတီ အရောက်ချီတက်မည်ဟု ကြွေးကြော်ခဲ့သော်လည်း ဇွန်လ ၆ရက်က နှစ်လပြည့်ခဲ့ပြီး ဒေါနတောင်ပေါ်ရှိ တောနောရေတံခွန်အကျော် ဘုရားကုန်းတွင် ရှေ့ဆက်မတိုးနိုင်ဘဲ ပိတ်မိနေခြင်းဖြစ်သည်။
