ဇေအောင်/People’s Spring
စစ်ကိုင်းတိုင်း၊ ချောင်းဦးမြို့နယ်တွင် တိုက်ပွဲဖြစ်ပွားပြီး စစ်ကောင်စီက လေကြောင်းတိုက်ခိုက်ခဲ့၍ လူနေအိမ်များ မီးလောင်ပျက်စီးခဲ့ကြောင်း သတင်းရရှိသည်။
ဇူလိုင် ၂၃ ရက် နံနက်က ချောင်းဦးမြို့နယ်ရှိ စစ်ကောင်စီတပ်စွဲရာ ကံကြီးကုန်းကျေးရွာအနီး၌ တိုက်ပွဲဖြစ်ပွားခဲ့ရာ စစ်သား သုံးဦးသေဆုံးပြီး ၈ဦး ထိခိုက်ဒဏ်ရာရရှိခဲ့ကြောင်း ချောင်းဦးမြို့နယ်ပြည်သူ့ကာကွယ်ရေးတပ်ဖွဲ့ သတင်းတာဝန်ခံက ပြောသည်။
Public Service Announcement
“ရန်သူ့နယ်မြေဘက်ကို တက်နိုင်သမျှကပ်ပြီး မိုင်းထောင်တာတို့ ကင်းတိုးတာတို့ လုပ်နေတဲ့အချိန်မှာ ရန်သူ့ကာကင်းနဲ့တွေ့ပြီးတော့ ရှင်းလင်းခဲ့တာ။ ထိခိုက်သေဆုံးတာတွေက ရဲဘော်တွေမျက်မြင်ပါ။ ဒါ့ထက်ပိုနိုင်ပါတယ်။”ဟု ချောင်းဦးပကဖ၏ သတင်းတာဝန်ခံက ပြောသည်။
ထို့နောက် နေ့လယ်ပိုင်းတွင် မုံရွာမြို့အနောက်မြောက်တိုင်းစစ်ဌာနချုပ်မှ တက်လာသည့် Mi -35 ရဟတ်ယာဥ်သည် တိုက်ပွဲဖြစ်သည့် ကံကြီးကုန်းကျေးရွာနှင့် (၁)မိုင်ခန့်ဝေးသည့် ရွှေလှေကျေးရွာကို လေကြောင်းတိုက်ခိုက်ခဲ့ကြောင်း၊ တိုက်ခိုက်မှုကြောင့် ပြည်သူတစ်ဦး ထိမှန်ဒဏ်ရာရခဲ့ပြီး လူနေအိမ် လေးလုံးထက်မနည်း မီးလောင်ပျက်စီးခဲ့ကြောင်း ဒေသခံများက ပြောသည်။
ချောင်းဦးပကဖသည် ဇူလိုင် ၁၉ ရက်ကလည်း ချောင်းဦးမြို့နယ်၊ မုံရွာ-မန္တလေးလမ်းပေါ်ရှိ နတ်ရေကန်ရွာစစ်ကောင်စီဂိတ်ကို ဒရုန်းဖြင့် ဗုံးချတိုက်ခိုက်ခဲ့ရာ စစ်ကောင်စီထိခိုက်သေဆုံးမှုရှိခဲ့သည်။
