စောနွေဦး/People’s Spring
မကွေးတိုင်း၊ စလင်းမြို့နယ်၊ ငါးလှိုင်တွင်းရွာနှင့် ကူးရွင်းကျောက်ကျေးရွာကို စစ်ကောင်စီက တိုက်ပွဲဖြစ်ပွားခြင်းမရှိဘဲ လေကြောင်းမှ ဗုံးကြဲတိုက်ခိုက်ရာ အနည်းဆုံးဒေသခံပြည်သူ လေးဦး သေဆုံးပြီး ၉ဦးဒဏ်ရာရရှိခဲ့ကြောင်း ဒေသခံများက ပြောသည်။
စလင်းမြို့နယ်အတွင်းရှိ ကျေးရွာအချို့၌ ကာကွယ်ရေးတပ်များရှိသည်ဟုဆိုကာ စစ်ကောင်စီတပ်က ဇူလှိုင်၂၃ ရက်နှင့် ၂၄ ရက်တို့တွင် လေကြောင်းမှ ဗုံးကြဲတိုက်ခိုက်ခဲ့ခြင်းဖြစ်သည်ဟု ဒေသခံများက ပြောသည်။
Public Service Announcement
” မနေ့က ညနေ ၄နာရီလောက်မှာ ဂျက်ဖိုက်တာနဲ့ ဗုံးလာကြဲတာ။ သေတဲ့ပြည်သူလေးဦးထဲမှာ ကိုရင်ကြီး တစ်ပါးပါတယ်။ ကျန်တာ ပြည်သူတွေချည်းဘဲ။ ဒဏ်ရာရသူတွေလည်းရှိတယ်”ဟု ဒေသခံတစ်ဦးက ပြောသည်။
စစ်ကောင်စီဗုံးကြဲတိုက်ခိုက်မှုကြောင့် ရွာသား ၉ဦးလည်း ထိခိုက်ဒဏ်ရာရရှိခဲ့သေးသည်ဟုလည်း အခြားဒေသခံတစ်ဦးက ပြောသည်။
ထိုပြင် ဇူလှိုင် ၂၄ ရက် နေ့လယ် ၁၂နာရီခွဲခန့်ကလည်း ငါးလှိုင်တွင်းရွာအနီးရှိ ရေနံမှော်ကုန်းကို စစ်ကောင်စီက လေကြောင်းမှာ ဗုံးကြဲတိုက်ခိုက်ခဲ့သေးသည်ဟုဒေသခံများက ဆိုသည်။
စလင်းမြို့နယ်၊ မကျီးကန်ရွာနှင့် ခင်ပလူကျေးရွာတို့ကိုလည်း လေကြောင်းမှ ဗုံးကြဲတိုက်ခိုက်ခဲ့သေးသည်ဟုလည်း ဒေသခံများက ပြောသည်။
