စောနွေဦး/People’s Spring
စလင်းမြို့နယ်အတွင်း စစ်ကောင်စီက လေကြောင်းတိုက်ခိုက်မှုများ လုပ်ဆောင်နေခြင်းကြောင့် ပြည်သူများအနေဖြင့် ကတုတ်ကျင်းများ ကြိုတင်တူးထားကြရန် စလင်းမြို့နယ်အခြေစိုက် မင်းဘူးခရိုင်တပ်ရင်းနှစ်ခုက ယနေ့ သတိပေးထုတ်ပြန်သည်။
စစ်ကောင်စီ၏ အမှတ် (၂၂)ကာကွယ်ရေးပစ္စည်းထုတ်လုပ်ရေးစက်ရုံကို ပြည်သူ့ကာကွယ်ရေးတပ်များက လက်နက်ကြီးများဖြင့်တိုက်ခိုက်ပြီးနောက် ဇူလိုင် ၂၃ ရက်ကစတင်ပြီး စလင်းမြို့နယ်အတွင်းရှိ ကျေးရွာများကို စစ်ကောင်စီက လေကြောင်းမှ ဗုံးကြဲတိုက်ခိုက်ခဲ့သည်။
Public Service Announcement
ထိုသို့တိုက်ခိုက်မှုကြောင့် ၃ရက်အတွင်း အနည်းဒေသခံပြည်သူ လေးဦးသေဆုံးပြီး ဒဏ်ရာရရှိသူ ၁၂ ဦးထက်မနည်းရှိကြောင်း ကာကွယ်ရေးတပ်ဖွဲ့ဝင်များထံမှ သိရသည်။
စလင်းမြို့နယ်အတွင်း စစ်ကောင်စီတပ်က စစ်ကြောင်းထိုးနေခြင်း၊ စစ်ရေးပဋိပက္ခများ စစ်ရေးအရှိန်မြင့်တက်လာခြင်းကြောင့် ပြည်သူများ စစ်ရေးအမြင်ရှိကြရန် စလင်းအခြေစိုက် မင်းဘူးခရိုင်တပ်ရင်း (၁)နှင့် တပ်ရင်း (၅)တို့က ထုတ်ပြန်ထားသည်။
“၂၃ရက်ကတည်းက လေကြောင်းက ဗုံးကြဲနေတာ မနေ့ကရောကြဲတယ်။ ဒီနေ့ကော ခေါင်းကူးရွာနဲ့ကျွန်းတဲရွာကိုလေကြောင်းက ဗုံးကြဲသွားတယ်”ဟု စလင်းဒေသခံတစ်ဦးက ပြောသည်။
ဇူလိုင် ၂၄ ရက်ညနေပိုင်းတွင် တညှောင့်တင်ရွာ၊ ကံကုန်းရွာ၊ ဝန်ရရွာနှင့် ဆွဲလည်ကျေးရွာ စသည့်ကျေးရွာများကို စစ်ကောင်စီတပ်က ဂျက်ဖိုက်တာဖြင့် ဗုံးကြဲတိုက်ခိုက်ခဲ့ကြောင်း ဒေသခံများက ပြောသည်။
ဇူလိုင်၂၄ ရက် နေ့လယ်ပိုင်းတွင် ငါးလှိုင်တွင်းရွာအနီး ရေနံမှော်ကို စစ်ကောင်စီက လေကြောင်းမှ တိုက်ခိုက်ခဲ့၍ ပြည်သူ ၂ဦး ထိခိုက်ဒဏ်ရာရရှိခဲ့သည်။
ဇူလိုင် ၂၃ ရက်တွင်လည်း ငါးလှိုင်တွင်းရွာနှင့်ကူရွင်းကျောက်ကျေးရွာကို လေကြောင်းမှတိုက်ခိုက်ခဲ့ရာ ဒေသခံပြည်သူ လေးဦးသေဆုံးပြီး ၉ ဦးထက်မနည်း ဒဏ်ရာရရှိခဲ့သည်။
