ဇေအောင်/People’s Spring
မန္တလေးတိုင်း၊ မတ္တရာမြို့နယ်၊ အောင်ချမ်းသာကျေးရွာကို စစ်ကောင်စီတပ်က လက်နက်ကြီးဖြင့် ပစ်ခတ်တိုက်ခိုက်ခဲ့၍ ပြည်သူ သုံးဦး အသက်သေဆုံးခဲ့ကြောင်း ပြည်သူ့ကာကွယ်ရေးတပ်မတော် (မန္တလေး)က ယနေ့( ဩဂုတ်၁ရက်) သတင်းထုတ်ပြန်သည်။
နေ့လယ် ၁နာရီခန့်က စစ်ကောင်စီ၏ လက်နက်ကြီးပစ်ခတ်မှုကြောင့် မတ္တရာမြို့နယ် အောင်ချမ်းသာကျေးရွာရှိ အပြစ်မဲ့ ပြည်သူ ငါးဦး ထိခိုက်ဒဏ်ရာရရှိခဲ့ပြီး သုံးဦး အသက်သေဆုံးခဲ့ကြောင်း မန္တလေး PDFက အသိပေးသည်။
Public Service Announcement
အောင်ချမ်းသာကျေးရွာသည် လက်ရှိဖြစ်ပွားနေသော တိုက်ပွဲများနှင့် အလှမ်းဝေးကွာသည့် ကျေးရွာတစ်ခုဖြစ်ပြီး ယခုတိုက်ခိုက်မှုသည် စစ်ကောင်စီအနေဖြင့် စစ်ရေးပစ်မှတ်မဟုတ်သော အရပ်သားပြည်သူများကို အကြောင်းမဲ့ ပစ်ခတ်တိုက်ခိုက်ကာ စစ်ရာဇဝတ်မှုကို ရည်ရွယ်ချက်ရှိရှိ ကျူးလွန်ခြင်းဖြစ်ကြောင်း မန္တလေး PDFက အသိပေးထုတ်ပြန်သည်။
စစ်ကောင်စီသည် စစ်ရှုံးလာသည်နှင့်အမျှ အရပ်သားပြည်သူများအပေါ် ပစ်မှတ်ထားကာလက်နက်ကြီးပစ်ခတ်မှုများ ၊ လေကြောင်းတိုက်ခိုက်မှုများကို ပေါ်ပေါ်ထင်ထင်ပြုလုပ်၍ စစ်ရာဇဝတ်မှုများကို ဆက်တိုက် ကျူးလွန်လျက်ရှိကြောင်း မန္တလေး PDFက ဆိုသည်။
မန္တလေးတိုင်း၊ မတ္တရာမြို့နယ်အတွင်း စစ်ကောင်စီတပ်စခန်း(၇)ခု ထပ်မံသိမ်းပိုက်ရရှိခဲ့ပြီး စုစုပေါင်း တပ်စခန်း(၃၅)ခု သိမ်းပိုက်ရရှိထားကြောင်း မန္တလေး PDFကယမန်နေ့ (ဇူလိုင်၃၁)တွင် ထုတ်ပြန်ထားသည်။
