မိထက်/People’s Spring
ရှမ်းပြည်နယ်မြောက်ပိုင်း၊ မူဆယ်မြို့တွင် တိုက်ပွဲဖြစ်ပွားခြင်းမရှိဘဲ စစ်ကောင်စီတပ်က သြဂုတ် ၈ ရက်ညနေပိုင်းတွင် လက်နက်ကြီးများဖြင့် ရမ်းသမ်းပစ်ခတ်နေကြောင်း မြို့ခံများကပြောသည်။
“စစ်တပ် တပ်စွဲထားတဲ့ စက်မှုဘက်နဲ့ တောင်ပေါ်ဘက်ကနေ ပစ်ခတ်သံများကြားနေရတာ။ ဒီနေ့မှ သိရတာက စစ်တပ်က ရမ်းပစ်နေတာတဲ့။ မြို့ကတော့ လက်ရှိ ပုံမှန်အတိုင်းရှိနေပါတယ်” ဟု မြို့ခံတဦးကပြောသည်။
Public Service Announcement
မူဆယ်မြို့ပေါ်နှင့် လေးမိုင်ခန့်သာဝေးသည့် စက်မှုရပ်ကွက်နှင့်တောင်ပေါ်တွင် ဇူလိုင်လ ၃၀ရက် နံနက် ကလည်း ပစ်ခတ်သံများထွက်ပေါ်ခဲ့သည်။ စစ်ကောင်စီတပ်စွဲထားသည့်နေရာပတ်ဝန်းကျင်၌ မိုင်းအများအပြားလည်းထောင်ထားသည်ဟု သတင်းရရှိသည်။
မူဆယ်မြို့တွင် တပ်မ(၉၉)လက်အောက်ခံတပ်ရင်းများနှင့် အမှတ်(၁၇)စစ်ဆင်ရေးက့ပ်ကဲမှုဌာနချုပ်လက်အောက်ခံ တပ်ရင်းအချို့ရှိသည်။စစ်ကောင်စီတပ်က ပြည်သူ့စစ်တပ်ဖွဲများ၏အ
ကူအညီဖြင့် ခုခံစစ်ပြင်ဆင်ထားကြောင်းလည်း သတင်းရရှိသည်။
မူဆယ်မြို့တွင် လက်ရှိ၌ အရှေ့မြောက်တိုင်းစစ်ဌာနချုပ်(ရမခ)တိုင်းမှူး ဗိုလ်ချုပ်စိုးလှိုင် ရှိနေပြီး ခုခံစစ်အတွက် ၎င်းက ဦးဆောင်ပြီးပြင်ဆင်နေသည်ဟု စစ်ရေးသတင်းရင်းမြစ်တစ်ဦးကပြောသည်။ ၎င်းသည် မူလက မူဆယ်အခြေစိုက် တပ်မ ၉၉ တပ်မမှူးဖြစ်ပြီး လားရှိုးမြို့ ရှိ အရှေ့မြောက်တိုင်း စစ်ဌာနချုပ် (ရမခ) မကျမီ တိုက်ပွဲပြင်းထန်နေသည့် ဇူလိုင်လ တတိယပါတ် တွင်
တိုင်းမှူး ဗိုလ်ချုပ်စိုးတင့်ကို ရာထူးမှ ထုတ်ပယ်ပြီး ဗိုလ်ချုပ် စိုးလှိုင်ကို အစားထိုးခန့်အပ်ခဲ့ခြင်းဖြစ်သည်။
တိုင်းမှူးဟောင်းဗိုလ်ချုပ်စိုးတင့်သည် ရာထူးမှထုတ်ပယ်ခံလိုက်ရသော်လည်း ရမခတွင်ပင်ရှိနေစဉ် MNDAAက အရှင်ဖမ်းမိထားသည်။ ဗိုလ်ချုပ်စိုးလှိုင်သည် မူဆယ်၌ပင် ဆက်လက်ရှိနေခြင်းဖြစ်သည်။
MNDAA ဦးဆောင်သော တော်လှန်ရေးတပ်များက ရမခ. ကို သိမ်းယူပြီးနောက် မြောက်ပိုင်းမဟာမိတ်သုံးဖွဲ့သည် မူဆယ်ကို ထပ်မံသိမ်းယူမည်ဟု သတင်းများထွက်ပေါ်နေသည်။မူဆယ်မြို့ခံများ အန္တရာယ်ကင်းရေးနှင့် မြို့မထိခိုက်စေရေးအတွက် စစ်ကောင်စီတပ်လက်နက်ချအလင်းဝင်ရန် တိုင်းမှူးဗိုလ်ချုပ်စိုးလှိုင်အား မြောက်ပိုင်းမဟာမိတ်သုံးဖွဲ့က ဆက်သွယ်ကမ်းလှမ်းထားကြောင်းသတင်းရရှိသည်။ ထိုသို့ကမ်းလှမ်းသတိပေးခံထားရပြီးနောက် လက်နက်ကြီးများဖြင့် မ်းပစ်နေခြင်းဖြစ်သည်။
မူဆယ်မြို့သည် တရုတ်နိုင်ငံနှင့်အကြီးဆုံးနယ်စပ်ကုန်သွယ်ရေးမြို့ဖြစ်ပြီး မူဆယ်ရှိ ၁၀၅ မိုင် ကုန်သွယ်ရေးဇုန်ကိုလည်း ၁၀၂၇စစ်ဆင်ရေးပထမပိုင်းတွင် အာရက္ခတပ်တော်(AA) နှင့် တအာင်းတပ်မတော်(TNLA)တို့ က တိုက်ခိုက်သိမ်းယူခဲ့ပြီး လက်ရှိတွင် AAက ထိန်းချုပ်ထားသည်။ မူဆယ်မြို့အနီး နမ့်ခမ်းမြို့နယ်ကိုလည်း TNLAက ထိန်းချုပ်ထားသည်။ မူဆယ်မြို့သည် ရှမ်းပြည်နယ်မြောက်ပိုင်း မြန်မာနှင့် တရုတ်နယ်စပ်မြို့များအနက် တော်လှန်ရေးအင်အားစုများကသိမ်းပိုက်ရန် ကျန်ရှိနေသော တစ်ခုတည်းသော မြို့ဖြစ်သည်။
ထိုအပြင် ရှမ်းပြည်နယ်မြောက်ပိုင်းတစ်ခုလုံးတွင်မူဆယ် ၊သီပေါ ၊နမ့်လန် မြို့တို့တွင်သာ စစ်ကောင်စီတပ်ကျန်ရှိတော့သည်။
“ထပ်သိမ်းဖို့က မူဆယ်၊ သီပေါ၊ နမ့်လန်ပဲကျန်တော့တယ်။ မူဆယ်ကတော့ တရုတ်နဲ့နယ်စပ်မို့ သေချာလေး ကိုင်တွယ်နေပုံရတယ်။ သိမ်းတာကသိမ်းမှာပဲ” ဟု ရှမ်းမြောက်မှစစ်ရေးရင်းမြစ်တဦးကပြောသည်။
