မိုးမောက်မြို့နယ်မှကျေးရွာများကို စစ်ကောင်စီ လေယာဉ်ဖြင့် ဗုံးကြဲ၍ အရပ်သား ၁ဦးသေ၊၁၀ ဦးကျော် ဒဏ်ရာရ

ဟန်နွေ/People’s Spring

ကချင်ပြည်နယ် မိုးမောက်မြို့နယ်ရှိကျေးရွာများသို့ စစ်ကောင်စီက လေယာဉ်ဖြင့် ဗုံးကြဲတိုက်ခိုက်ခဲ့၍အရပ်သားသေဆုံးထိခိုက်မှုများ ရှိခဲ့ကြောင်း ကချင်လွတ်လပ်ရေးတပ်မတော်(KIA) သတင်းပြန်ကြားရေးဌာနက ဖော်ပြသည်။

ဩဂုတ် ၈ရက် မနက်အစောတွင် စစ်ကောင်စီကမြစ်ကြီးနား – ဗန်းမော် လမ်းပိုင်းရှိ ကုန်းလော၊ မြို့သစ်၊ စီဟက်ကျေးရွာ များ၌ လေယာဉ်ဖြင့် ဗုံးကြဲတိုက်ခိုက်ခဲ့ရာ ပြည်သူ ၁၀ ဦးကျော် ထိခိုက်ဒဏ်ရာရရှိကာ ၁ဦး သေဆုံးခဲ့ရကြောင်း ဖော်ပြထားသည်။

အဆိုပါ ဒေသရှိ စစ်ကောင်စီတပ်ရင်းဌာနချုပ်များကို KIAက မတ်လအတွင်းက စတင်ခဲ့သည့် စစ်ဆင်ရေးအတွင်း သိမ်းပိုက်ထားပြီး လက်ရှိတွင်လည်း မိုးမောက်၌ နောက်ဆုံးကျန်နေသည့် စစ်ကောင်စီ ခမရ(၄၃၇)တပ်ရင်းကို ဆက်လက်ထိုးစစ်ဆင်လျက်ရှိသည်။

Public Service Announcement

စစ်ကောင်စီတပ်သည် တိုက်ပွဲဖြစ်ပွားမှုမရှိသည့် KIA ဌာနချုပ် လိုင်ဇာအနီး ဒေသများသို့လည်း ဩဂုတ် ၈ ရက်မနက်အစော(ဩဂုတ် ၇ရက် ညသန်းခေါင်​ကျော်)တွင် လေကြောင်း တိုက်ခိုက်ခဲ့ရာ အရပ်သားထိခိုက်မှု နေအိမ်ပျက်စီးမှုများ ရှိခဲ့သည်။

KIA ဌာနချုပ် လိုင်ဇာအနီးရှိ မိုင်ဆက်ပါကျေးရွာ၊ KBC ဘုရားကျောင်း၊ မုန်လိုင်ခတ်ကျေးရွာ အနီးတ၀ိုက် လေယာဉ်ဗုံးကျရောက်ပေါက်ကွဲခဲ့ခြင်းဖြစ်ပြီးကိုယ်ဝန်ဆောင်အမျိုးသမီးငယ်တစ်ဦး ဒဏ်ရာရခဲ့သည်။