အင်ကြင်း/People’s Spring
မန္တလေးတိုင်း၊ မြင်းခြံမြို့အမှတ်(၁၅)ခြေမြန် တပ်ရင်းမှ လက်နက်ကြီးဖြင့် ပစ်ခတ်တိုက်ခိုက် ခဲ့၍ နေအိမ်အများအပြား မီးလောင်ပျက်စီးခဲ့ကြောင်း သတင်းရရှိသည်။
ယမန်နေ့(သြဂုတ်၉ရက်) နေ့လယ်ပိုင်းက မြင်းခြံ အမှတ်(၁၅)တပ်မှ လက်နက်ကြီးဖြင့် ပစ်ခတ် တိုက်ခိုက်ခဲ့၍ ညောင်ပင်ကျေးရွာအတွင်း ကျရောက်ပေါက်ကွဲရာ နေအိမ်အချို့ ပျက်စီးခဲ့ကြောင်း၊ ထို့အပြင် (၄၀)အရွယ် မအေးမာဆိုသူမှာ ဒဏ်ရာရရှိသွား၍ မန္တလေးမြို့သို့ပို့ဆောင် ဆေးကုသမှုခံယူနေရကြောင်း ဒေသခံများက ပြောသည်။
Public Service Announcement
ခိုင်းနွားတစ်ကောင်သေဆုံးကာ တစ်ကောင်ဒဏ်ရာရရှိသွားကြောင်း သိရသည်။
ထို့အပြင် ည ၁၀နာရီခန့်ကလည်း စစ်တပ်က လက်ဝဲနှင့် မြင်းနီကျေးရွာကို လက်နက်ကြီး နှစ်လုံးပစ်ခတ်တိုက်ခိုက်ခဲ့ရာမှ နေအိမ်အချို့ မီးလောင်ပျက်စီးခဲ့ကြောင်း ဒေသခံများက ပြောသည်။
“တစ်လုံးက နေအိမ်တစ်အိမ်ရဲ့အုတ်တံတိုင်းကိုမှန်ပြီး ပြိုကျတယ်။ နောက်တစ်လုံးက အိမ်တစ်အိမ်က နွားစာတဲပေါ်ကျတော့ မီးလောင်ပြီးတော့ အကုန်ကူးသွားပြီး အိမ် ၂၀၊ ၂၅လောက် တော့ ပါသွားတယ်။”ဟု ဒေသခံတစ်ဦးက ပြောသည်။
အလားတူ မြင်းခြံမြို့ပေါ်ရှိ စစ်ကောင်စီတပ် စခန်းနေရာများအား ယနေ့ နံနက်၄နာရီခန့်မှစတင်၍ PDFများက ရှော့တိုက်ဒုံးများဖြင့် ပစ်ခတ်တိုက်ခိုက်နေပြီး ထိခိုက်မှုမသိရသေးကြောင်း ဒေသခံများက ပြောသည်။
မြင်းခြံအပြင် နွားထိုးကြီးမြို့နှင့် တောင်သာမြို့နယ်များတွင်လည်း စစ်ကောင်စီတပ်အား PDFများက တိုက်ခိုက်နေကြောင်း ဒေသခံများက ပြောသည်။
