“မြန်မာနိုင်ငံကို တည်ငြိမ်စေချင်ရင် လက်ရှိ စစ်တပ်ကို စစ်အာဏာရှင်လက်အောက်က ဆွဲထုတ်နိုင်ဖို့ တရုတ်အစိုးရ ကူညီပေးပါ”
− ဗိုလ်ကြီးဟောင်း ဦးနေမျိုးဇင်
မြန်မာနိုင်ငံဘက်အသီးသီးက အပစ်အခတ်ရပ်စဲရန် တရုတ်က ဦးဆောင်ဖျောင်းဖျလျက်ရှိပြီး ဆွေးနွေးညှိနှိုင်းမှုဖြင့် ပြဿနာကိုဖြေရှင်းကာ အမျိုးသားစည်းလုံးညီညွတ်ရေးနှင့် နိုင်ငံတော်တည်ငြိမ်မှု၊ ဖွံ့ဖြိုးတိုးတက်မှုကို ဆောလျင်စွာ ဖော်ဆောင်ရန် လုပ်ဆောင်လျက်ရှိကြောင်း တရုတ်နိုင်ငံခြားရေးပြောခွင့်ရပုဂ္ဂိုလ်က ပြောသည်။
တရုတ်နိုင်ငံခြားရေးဝန်ကြီးဌာန ပြောခွင့်ရပုဂ္ဂိုလ် Mao Ningက ဩဂုတ် ၉ရက်က ပြုလုပ်သော သတင်းစာရှင်းလင်းပွဲ၌ ပြောကြားခြင်းဖြစ်ပြီး တရုတ်နိုင်ငံသည် ငြိမ်းချမ်းစွာဆွေးနွေးရန် ဆက်လက် တက်တက်ကြွကြွတိုက်တွန်းသွားမည်ဖြစ်ကြောင်းနှင့် မြန်မာနိုင်ငံ ငြိမ်းချမ်းရေးလုပ်ငန်းစဉ်အတွက် တတ်စွမ်းသမျှပံ့ပိုးကူညီမှုများ လုပ်ဆောင်သွားမည်ဟု AFP သတင်းထောက်၏ မေးမြန်းမှုကိုဖြေကြားသည်။
Public Service Announcement
တရုတ်သည် မြန်မာနိုင်ငံ၏ ချစ်ကြည်ရင်းနှီးသော အိမ်နီးချင်းနိုင်ငံအနေဖြင့် မြန်မာနိုင်ငံနှင့် မြန်မာနိုင်ငံ မြောက်ပိုင်းဒေသအခြေအနေ ပြောင်းလဲလာမှုကို အမြဲတစေ များစွာဂရုပြုလျက်ရှိကာ မြန်မာနိုင်ငံ၌ စစ်ပွဲဖြစ်ပွားသည်ကို မတွေ့မြင်လိုကြောင်းနှင့် မြန်မာနိုင်ငံနှင့် မြန်မာနိုင်ငံမြောက်ပိုင်းဒေသ အခြေအနေဆောလျင်စွာ ပြန်လည်တည်ငြိမ်လာစေရန် မျှော်လင့်ကြောင်း Mao Ning က ပြောသည်ဟု မြန်မာနိုင်ငံရှိ တရုတ်သံရုံးက ဩဂုတ် ၁၁ရက်ထုတ်ပြန်သည်။
အဆိုပါ ထုတ်ပြန်ချက်အောက်တွင် ဗိုလ်ကြီးဟောင်း ဦးနေမျိုးဇင်က “မြန်မာနိုင်ငံကို တည်ငြိမ်စေချင်ရင် လက်ရှိ စစ်တပ်ကို စစ်အာဏာရှင်လက်အောက် က ဆွဲထုတ်နိုင်ဖို့ တရုတ်အစိုးရ ကူညီပေးပါ။ ကျုပ်တို့လို စစ်အရာရှိဟောင်းတွေ အများကြီး စုဖွဲ့ထားတာ ရှိတယ်။ စစ်တပ်ကို အသွင်ကူးပြောင်းပြီး နိုင်ငံကို တည်ငြိမ်အောင် ပြည်သူရဲ့ ယုံကြည်မှုရအောင် ပြည်သူကိုကာကွယ်စောင့်ရှောက်တဲ့ တာဝန်ကိုပဲ ထမ်းဆောင်တဲ့ စစ်တပ်ဖြစ်အောင် ကျုပ်တို့ ကြိုးစားနေကြတယ်။ မြန်မာနိုင်ငံ ပြန်လည် ငြိမ်းချမ်းစေချင်ရင် ဒီနည်းက လွဲလို့ အခြားနည်း မရှိဘူး” ဟု မှတ်ချက်ပြုထားသည်။
တရုတ်နယ်စပ်အနီး ရှမ်းပြည်နယ် မြောက်ပိုင်း လားရှိုးမြို့ရှိ စစ်ကောင်စီ၏ အရှေ့မြောက်တိုင်းစစ်ဌာနချုပ်(ရမခ)နှင့် တမြို့လုံးကို ကိုးကန့်တပ်မတော်(MNDAA)က ဩဂုတ် ၃ရက်တွင် သိမ်းပိုက်ထိန်းချုပ်ခဲ့သည်။ ထိုနောက် ဩဂုတ် ၈ရက်တွင် တရုတ်နိုင်ငံတွင် တရုတ်နိုင်ငံ၏ ကမကထပြုလုပ်မှူဖြင့် ဟိုက်ဂင်ဆွေးနွေးပွဲ နောက်ဆက်တွဲ ပြုလုပ်ရန် စီစဥ်ခဲ့သော်လည်း စစ်ရှုံးစစ်ကောင်စီက ရှမ်းပြည်နယ် မြောက်ပိုင်းတည်ငြိမ်အေးချမ်းရေး အာရုံစိုက် ပြုလုပ်ရန် အစည်းအဝေးမတက်တော့ဟုအကြောင်းပြခဲ့ပြီးအစည်းအဝေး ပျက်ခဲ့သည်။
ထိုနောက် သြဂုတ် ၈ ရက်တွင်တရုတ်အထူးကိုယ်စားလှယ်က နေပြည်တော်သို့ လာရောက်ကာ အာဏာသိမ်းခေါင်းဆောင်နှင့်တွေ့ဆုံဆွေးနွေးမှုများ ပြုလုပ်ခဲ့သည်။
အဆိုပါတွေ့ဆုံဆွေးနွေးမှုတွင်လည်း စစ်ကောင်စီလိုလားသောအဖြေမရဘဲ အဆင်မပြေခဲ့ကြောင်း၊ရှမ်းမြောက်တွင်သာမက ရှမ်းတောင်တွင်ပါတိုက်ပွဲများဖြစ်ပွားလာတော့မည်ဟု သတင်းရင်းမြစ်တစ်ဦးကပြောသည်။
လားရှိုးရမခ ကို စစ်တပ်ဆုံးရှုံးခဲ့ပြီးနောက်ပိုင်းစစ်တပ်ထောက်ခံသူများက MNDAA ကန့်ကွက် ဆန့်ကျင်ပွဲများ ပြုလုပ်သလို တရုတ်မုန်းတီးရေးကိုလည်း စစ်ကောင်စီဝါဒဖြန့် တယ်လီဂရန်ချန်နယ်များက ပြုလုပ်ခဲ့သည်။ တရုတ်အထူးကိုယ်စားလှယ်နေပြည်တော်မှ ပြန်သွားပြီးနောက်စစ်ကောင်စီ ဝါဒဖြန့် တယ်လီဂရန်ချန်နယ်လ်များတွင် တရုတ်ဆန့်ကျင်ရေး နှင့် တရုတ်မုန်းတီးရေးရေးသားလှုံ့ဆော်မှုများပိုလုပ်နေသည်။
