ဟန်နွေ/People’s Spring
ချင်းပြည်နယ် ဟားခါးမြို့အနီး စစ်ကောင်စီတပ်စခန်းတစ်ခုကို ချင်းအမျိုးသားတပ်မတော် (CNA)၊ချင်းဒေသကာကွယ်ရေးတပ်(CDF)များ စုပေါင်းဖွဲ့စည်းထားသည့် ချင်းပြည်ကောင်စီ တပ်ပေါင်းစုက သိမ်းပိုက်နိုင်ခဲ့ဟု ချင်းဒေသသတင်းရင်းမြစ်က ပြောသည်။
ဩဂုတ် ၁၂ရက် နံနက်တွင် ဟားခါးမြို့နှင့် (၃)မိုင်ခန့်အကွာရှိ ကေးဘန်းဇွမ် (keivaangzuang) စစ်စခန်းကို ချင်းပြည်အစိုးရ တပ်(ချင်းပြည်ကောင်စီတပ်ပေါင်းစု)က သိမ်းပိုက်နိုင်ခဲ့ခြင်းဖြစ်သည်။
Public Service Announcement
“သိမ်းနိုင်တာ အတည်ပြုလို့ရပြီ။ ပြီးရင် လက်နက်တချို့ရတယ်။ စကစဘက်မှာ ကျဆုံးတာတွေ ဒဏ်ရာရတာတွေလည်းရှိတယ်တဲ့”ဟု ချင်းသတင်းရင်းမြစ်က ချင်းပြည်အစိုးရ တပ်ဖွဲ့ဝင် အချို့ကို ကိုးကား ပြောသည်။
ဟားခါး-ထန်တလန်ကြားရှိ သီမြစ်ချောင်း တံတားအနီး တောင်တန်း၌ စစ်ကောင်စီတပ်စခန်း ၂ခုရှိရာ ယင်းအနက် တစ်ခုကို သိမ်းနိုင်ခဲ့ခြင်းဖြစ်သည်ဟု ဆိုသည်။
လက်ရှိတွင် ထန်တလန်မြို့ပေါ်လည်း ချင်းပြည်ကောင်စီ ပူးပေါင်းတပ်နှင့် စစ်ကောင်စီ အကြား တိုက်ပွဲပြင်းထန်နေသည်ဟု ဆိုသည်။
ချင်းပူးပေါင်းတပ်သည် ထန်တလန်ရှိ ခလရ(၂၆၉) တပ်စခန်းကုန်းကို ဩဂုတ် ပထမပတ်အတွင်းက သိမ်းပိုက်ထားပြီး အဆိုပါ တပ်စခန်းမှ မြို့အတွင်း ထွက်ပြေးသွားသည့် စစ်ကောင်စီတပ်များကို ဆက်လက်တိုက်ခိုက်နေခြင်းဖြစ်သည်။
“စကစတွေက မြို့ထဲမှာ ပုန်းခိုတပ်စွဲထားတယ်။ အိုးအိမ် ဦးစီးဌာနမှာ အခိုင်အမာ နေရာယူတပ်စွဲထားတယ်။ ဘန်ကာနဲ့ အဲဒီလိုမျိုးနဲ့။ အဲဒီမှာ ရှိတဲ့သူတွေနဲ့ တိုက်ပွဲရှိတယ်လို့ သတင်းကြားရတယ်။”ဟု ချင်းသတင်းရင်းမြစ်က ပြောသည်။
ချင်းပြည်ကောင်စီ ပူးပေါင်းတပ်သည် ထန်တလန်- ဟားခါးကြားရှိစစ်ကောင်စီတပ်များကို ဇူလိုင် ၂၂ရက်မှ စတင်ထိုးစစ်ဆင်ခဲ့ရာ တစ်ပတ်အတွင်း အော်တိုတောင်တပ်စခန်းအပါအဝင် တပ်စခန်း ၆ခုကို သိမ်းပိုက်ရရှိခဲ့သည်။
စစ်ကောင်စီတပ်သေဆုံးထိခိုက်မှုရှိဲခဲ့ပြီး စစ်ကောင်စီ၏ လက်နက်ခဲယမ်းများစွာကို ချင်းပြည်ကောင်စီ ပူးပေါင်းတပ်က ရရှိခဲ့သည်။
ထို့နောက် ထန်တလန်မြို့တွင်း စစ်ဆင်ရေးကို ဆက်လက်ဆောင်ရွက်နေခြင်းဖြစ်သည်။ ယနေ့ ဩဂုတ် ၁၂ရက်တွင်မူ ဟားခါးမြို့အနီးရှိ စစ်ကောင်စီ စခန်းကို စတင်တိုက်ခိုက်လာခြင်းလည်းဖြစ်သည်။
