ရဲခေါင်/People’s Spring
နေပြည်တော်၊မန္တလေး၊ နှင့် ပြင်ဦးမြို့ရှိ မြေကွက် အရောင်းများလာပြီး အချို့မှာစျေးလျှော့ ရောင်းချနေကြောင်း အိမ်ခြံမြေ အရောင်းအဝယ် ပြုလုပ်သူများက ပြောသည်။
ရှမ်းပြည်နယ်မြောက်ပိုင်းရှိ မြို့နယ်အများစုနှင့် မန္တလေးတိုင်းအတွင်းရှိ စဥ့်ကူး၊ မိုးကုတ် ၊တကောင်းစသည့် မြို့များကို တော်လှန်ရေးတပ်များက ဆက်တိုက် သိမ်းပိုက်နိုင်ပြီးနောက် မြေစျေးကွက်မှာ အကျဖက်တွင်ရှိလာကာ ၊ မြေကွက်ပြန်ရောင်းသူများလာကြောင်း စုံစမ်းသိရသည်။
“တချို့ပိုက်ဆံပိုရှိတဲ့သူတွေက ပြန်ဝယ် နေတာမျိုးရှိတယ်။ဒါပေမယ့် အဝယ်နည်းတယ်။ရောင်းတဲ့သူ များ တာ။အဲဒါကြောင့်လည်း စျေးက ပေါက်စျေး သုံးပုံ တစ်ပုံလောက်ကိုလျော့ နေတာ”ဟု မန္တလေး အခြေ စိုက် အိမ်ခြံမြေ အကျိုးဆောင်တစ်ဦးက ပြောသည်။
Public Service Announcement
တော်လှန်ရေးတပ်များက စစ်တပ်စခန်းများကို ထိုးစစ်ဆင်တိုက်ခိုက်တော့မည်ဟု သတင်းကျယ်ပြန့်စွာထွက်ပေါ်နေသော စစ်တပ် တက္ကသိုလ် များရှိရာ ပြင်ဦးလွင် မြို့ နှင့် တိုက်ပွဲများ မြို့အနီးရောက်လာသော မန္တလေး မြို့တို့မှ ပြောင်ရွှေ့လာသူများမှာ ရန်ကုန်သို့ ရွေ့ပြောင်းမှုများနေပြီး ရန်ကုန် အိမ်ခြံမြေ အငှားစျေးကွက် သွက်လာနေသည်ဟုလည်း သိရသည်။
“မေမြို့၊မန္တလေး တစ်ဝိုက်က ရန်ကုန်ကိုပဲ တိုက်ရိုက်ဆင်းတယ်။နေပြည်တော်ကို မရှောင်ကြဘူး။ဘာကြောင့်လည်းဆိုတာတော့ မပြောတက်ဘူး။ရန်ကုန်မှာ အိမ်ငှားခ စျေးတွေ တောက်လျှောက်တက်နေတယ်။”ဟု ရန်ကုန် အိမ်ခြံမြေ လုပ်ငန်းလုပ်ကိုင်သူတစ်ဦး ပြော သည်။
ရှမ်း-မန်းစစ်ဆင်ရေး နှင့် ၁၀၂၇ ဒုတိယလှိုင်းမစမီက ရန်ကုန်မြို့ရှိ လူစည်းကားရာ မြို့နယ်များအနက် တိုက်ခန်းအငှားစျေးကွက်အရ ကျပ်တစ်သိန်းခွဲမှာ သုံးသိန်းဝန်းကျင်သာရှိသော်လည်း လက်ရှိ တွင် ကျပ် နှစ်သိန်း မှ ကျပ်ငါးသိန်း အနည်းဆုံးပေးရကြောင်း ရန်ကုန်မြို့ အိမ်ခြံမြေစျေးကွက်၏ စစ်တမ်းတစ်ခုတွင် ဖော်ပြထားသည်။
ထို့ကြောင့် ရန်ကုန်ရှိ အိမ်ခြံ၊တိုက်ခန်းပိုင်ရှင်များအနေဖြင့် စစ်ဘေးရှောင် ပြည်သူများအပေါ်လူသားချင်းစာနာထောက်ထားရန် နှင့် အမြတ်များစွာ မတင်ရန်ဝေဖန်မှုများရှိနေသည်။
