မန္တလေးတွင် စက်သုံးဆီ ပြတ်လက်မှုပိုဆိုးလာ၊ တန်းစီဝယ်ယူသူများပြားနေ

​အင်ကြင်း/People’s Spring

မန္တလေးမြို့တွင် စက်သုံးဆီပြတ်လပ်မှု ပိုမိုဆိုးရွားလာပြီး ရောင်းချပေးသောဆိုင် အချို့တွင်လည်း တန်းစီဝယ်ယူသူ အလွန်များပြားနေကြောင်း မြို့ခံများက ပြောသည်။

သြဂုတ် ဒုတိယပတ်အတွင်း စက်သုံးဆီပြတ်လပ်မှု ပိုမိုဆိုးရွားလာရာ မန္တလေးမြို့တွင် လည်း ဆီဆိုင်အချို့သာ ရောင်းချပေးနိုင် ကြောင်း၊ အဆိုပါ ဆီဆိုင်များတွင်လည်း တန်းစီဝယ်ယူသူ အဆမတန်များပြားနေကြောင်း မန္တလေးမြို့ခံများက ပြောသည်။

Public Service Announcement

“ဆိုင်ကယ်ဆီရဖို့ အနည်းဆုံး ၃နာရီလောက်တန်းမှရမယ့်သ​ဘော ဖြစ်နေတယ်။ ဆိုင်တိုင်းမှာ ၅ ပြ၊ ၆ ပြလောက်ကို ရှိနေတယ်။”ဟု မန္တလေးမြို့ခံတစ်ဦးက ပြောသည်။

ကားနှင့်ဆိုင်ကယ်များမှာလည်း ဆီဆိုင်ရှေ့၌ ညအိပ်တန်းစီစောင့်ဆိုင်း၍ ဝယ်ယူနေရပြီး နံနက် ပိုင်းမှ လာရောက်တန်းစီပါက ကြာမြင့်ချိန် ၅ နာရီထက်မနည်းရှိကြောင်း မြို့ခံများက ဆိုသည်။

​”မြို့ပြင်ဘက်ဆီဆိုင်တွေမပေးလို့ မြို့ထဲအကုန်ရောက်ကုန်တယ်။ မနက်၃နာရီခွဲထတန်းရတယ်။ တစ်သောင်းဖိုးရတယ်။ ဝိရိယမရှိလို့လည်းမရဘူး။ ၇နာရီစပေးတယ်။ အဲဒါတောင် ၈ နာရီခွဲမှရတယ်။ ၅ နာရီတောင်ကြာတယ်။”ဟု သုံးဘီးအငှားယာဥ် မောင်းနှင်သူတစ်ဦးက ပြောသည်။

ထို့အပြင် ပြင်ပပေါက်စျေးမှာလည်း 92 တစ်လီတာ ကျပ်၆,၀၀၀ ဝန်းကျင်ရှိနေပြီး လိုသလောက် ဝယ်ယူ၍မရတော့ကြောင်း ဆီစျေးကွက်အတွင်းမှ သိရှိရသည်။

လက်ရှိတွင် ရန်ကုန်၊နေပြည်တော်၊ ​တောင်ကြီး၊ မော်လမြိုင်၊ သထုံ၊ ပဲခူး၊ တိုက်ကြီးအပါအဝင် အခြားမြို့ကြီးများတွင်လည်း စက်သုံးဆီပြတ်လပ်မှု ကြုံတွေ့နေရသည်။

အာဏာသိမ်းစစ်ကောင်စီသည် ဒေါ်လာစျေးအား ထိန်းချုပ်ထားသည့်အတွက် ပြည်ပမှဝယ်ယူတင်သွင်းရသည့်စက်သုံးဆီမှာ မကြာခဏ ကမောက်ကမဖြစ်ကာ ဆီပြတ်လပ်လေ့ရှိပြီး ယခုအခါအဆိုးရွားဆုံး ရင်ဆိုင်နေရသည်။