အာဏာသိမ်းခေါင်းဆောင် မင်းအောင်လှိုင် နဲ့ တရုတ်နိုင်ငံခြားရေးဝန်ကြီး ဝမ်ယိတို့ သြဂုတ်၁၄ ရက်မှာ နေပြည်တော်မှာ တွေ့ဆုံဆွေးနွေးခဲ့ပါတယ်။ စစ်ကောင်စီ ဝါဒဖြန့် မီဒီယာတွေမှာ သြဂုတ် ၁၄ ရက်နေ့ညမှာ အကျယ်တဝင့်ဖော်ပြခဲ့ပါတယ်။ ဒါပေမယ့် သြဂုတ် ၁၅ မနက်မှာ တရုတ်အစိုးရပိုင်သတင်းဌာတွေကဖော်ပြတာမှာ စစ်ကောင်စီဝါဒဖြန့် သတင်းဌာနဖော်ပြချက်နဲ့ကွဲလွဲချက် တချို့ ရှိနေပါတယ်။ ဒီထဲက စိတ်ဝင်စားဖို့ကောင်းတဲ့ အချက် သုံးချက်ကို People’s Spring က ဖော်ပြပေးလိုက်ပါတယ်။
ကွဲလွဲချက် (၁)
ရှမ်းပြည်နယ်မြောက်ပိုင်းတွင် EAO အဖွဲ့များ၏ မြို့ရွာများအပေါ် တိုက်ခိုက်မှုဖြစ်စဥ်များကို တရုတ်နိုင်ငံက ဆန့်ကျင်ကြောင်း နိုင်ငံခြားရေးဝမ်ယိက ပြောကြားသည်ဟု စစ်ကောင်စီက ဝါဒဖြန့်ထုတ်ပြန်သည်။
Public Service Announcement
သို့သော် တရုတ်အစိုးရပိုင် မီဒီယာများ(မြန်မာ-အင်္ဂလိပ်နှစ်ဘာသာ)ထုတ်ပြန်ချက်တွင် ထိုသို့ မတွေ့ရဘဲ ဝမ်ယိက တရုတ်-မြန်မာနယ်စပ်တလျှောက် ငြိမ်းချမ်းရေးနှင့် တည်ငြိမ်ရေးကို ထိန်းသိမ်းရန် တောင်းဆိုကြောင်း ဖော်ပြသည်။
ကွဲလွဲချက် (၂)
တရုတ်နိုင်ငံခြားရေးဝန်ကြီးဝမ်ယိနှင့် တွေ့ဆုံမှုသည် နှစ်နိုင်ငံအကြား ချစ်ကြည်ရင်းနှီးမှုနှင့် ပူးပေါင်းဆောင်ရွက်မှုများကို ပိုမိုတိုးတက်အောင် ဆောင်ရွက်နိုင်မည်ဖြစ်ကြောင်း မင်းအောင်လှိုင်က ပြောကြားသည်ဟု ဝါဒဖြန့်ထုတ်ပြန်သည်။
အဆိုပါအချက်သည်လည်း တရုတ်အစိုးရ၏ အင်္ဂလိပ်-မြန်မာ နှစ်ဘာသာထုတ်ပြန်ချက်များတွင် မတွေ့ရဘဲ မြန်မာနိုင်ငံအနေဖြင့် ပြည်တွင်း တည်ငြိမ်ရေးကို ထိန်းသိမ်းကာကွယ်ပြီး နိုင်ငံရေးအရ ပြန်လည်သင့်မြတ်မှုရရှိရေး ဆောင်ရွက်ရာတွင် တရုတ်နိုင်ငံက ဆက်လက် ပံ့ပိုးကူညီမည်ဟု မျှော်လင့်ကြောင်း စစ်ခေါင်းဆောင်က ပြောကြားသည်ဟု ဖော်ပြသည်။
ကွဲလွဲချက် (၃)
လားရှိုးရှိ စစ်တပ်၏ အရှေ့မြောက်ပိုင်းစစ်ဌာနချုပ်(ရမခ)ကျရှုံးပြီးနောက် စစ်ကောင်စီထောက်ခံသူများ၊ လော်ဘီများက တရုတ်ဆန့်ကျင်ရေးလုပ်ငန်းများ ကျယ်ကျယ်ပြန့်ပြန့် လုပ်ဆောင်လာခဲ့ရာ တရုတ်နိုင်ငံခြားရေးဝန်ကြီးက မင်းအောင်လှိုင်နှင့်တွေ့ဆုံစဥ် သတိပေးပြောဆိုသည့်အချက်ကို စစ်ကောင်စီက ဝါဒဖြန့်ထုတ်ပြန်ချက်တွင် မဖော်ပြပေ။
တရုတ်အစိုးရ၏ ထုတ်ပြန်ချက်တွင် တရုတ်နိုင်ငံအနေဖြင့် မြန်မာ့ပြည်တွင်းရေးအပေါ် ပြည်ပအင်အားစု ဝင်ရောက် စွက်ဖက်ခြင်းကို ဆန့်ကျင်သလို တရုတ်-မြန်မာ ဆက်ဆံရေးအား သွေးကွဲအောင် လုပ်ဆောင်နေမှုနှင့် တရုတ်နိုင်ငံအား အိုးမဲသုတ်အပုပ်ချနေသည့် ပြောဆိုလုပ်ဆောင်မှု မှန်သမျှကို ဆန့်ကျင်ကြောင်း ဖော်ပြသည်။
