အာဏာရှင်အစိုးရအား ဖြုတ်ချနိုင်ခဲ့သည့် ဘင်္ဂလားဒေ့ရှ် ကျောင်းသား လူငယ်များနှင့် ပြည်သူများ၏ အောင်မြင်မှုများအတွက် မြန်မာတော်လှန်ရေးအဖွဲ့များ ဂုဏ်ပြုသဝဏ်လွှာပေးပို့

အီယိုရီ/People’s Spring

အာဏာရှင် အစိုးရအား ဖြုတ်ချနိုင်ခဲ့သည့် ဘင်္ဂလားဒေ့ရှ်နိုင်ငံရှိ ကျောင်းသား လူငယ်များနှင့် ပြည်သူများ၏ အောင်မြင်မှုများအတွက် ဝမ်းမြောက် ဂုဏ်ယူကြောင်း မြန်မာ့နွေဦး တော်လှန်ရေးအင်အားစုများနှင့် အရပ်ဘက်အဖွဲ့အစည်းများက ယနေ့(သြဂုတ် ၁၆ရက်)ထုတ်ပြန်သည်။

မြန်မာ့အိမ်နီးချင်း ဘင်္ဂလားဒေ့ရှ်နိုင်ငံတွင် ဒီမိုကရေစီ၊ လူ့အခွင့်အရေး၊ လွတ်လပ်စွာ ပြောရေးဆိုခွင့်နှင့် နိုင်ငံသား အခွင့်အရေးများကို အကြမ်းဖက် ဖိနှိပ် ချိုးဖောက်ကျုးလွန်နေသည့် အာဏာရှင် အစိုးရအား ကျောင်းသား လူငယ် အင်အားစုများနှင့် ဖိနှိပ်ခံ ပြည်သူတို့က ဆယ်စုနှစ်ကျော် မဆုတ်မနစ် တောင်းဆိုတိုက်ပွဲဝင်ကြခဲ့သည့် ရလဒ် အဖြစ် ဝန်ကြီးချုပ် ရှိတ်ဟာဆီနာ အာဏာ စွန့်လွှတ်ရသည့် အောင်မြင်မှုအတွက် မိမိတို့အနေဖြင့် ထပ်တူ နှစ်ထောင်း အားရ ဂုဏ်ယူဝမ်းမြောက်ရကြောင်း မြန်မာ့တော်လှန်ရေးအင်အားစုများနှင့် အရပ်ဘက် အဖွဲ့အစည်းပေါင်း ၂၅၅ ဖွဲ့ က လက်မှတ်ရေးထိုး ပေးပို့သည်။

Public Service Announcement

ဘင်္ဂလားဒေ့ရှ် ကျောင်းသားလူငယ်များနှင့် အလုပ်သမား လယ်သမား ပြည်သူ့ အင်အားစုများ၏ တောင်းဆိုမှုအရ ကြားဖြတ် အစိုးရအဖြစ် တာဝန်ယူကြမည့် ငြိမ်းချမ်းရေး နိုဘယ်ဆုရှင် ဒေါက်တာ မုဟမ္မဒ် ယူနွတ်စ် ဦးဆောင်သော အကြံပေး တာဝန်ခံများ အနေဖြင့် ကြီးလေးများမြောင်သည့် တာဝန်များကို အောင်မြင်စွာ အကောင်အထည်ဖော်နိုင် စေကြောင်း ဆန္ဒပြု ဆုမွန်ကောင်းတောင်းသည်။

ဘင်္ဂလားဒေ့ရှ် ကြားဖြတ် အစိုးရအနေဖြင့် မြန်မာနိုင်ငံ အမျိုးသားညီညွတ်ရေးအစိုးရနှင့်တကွ မဟာမိတ် တိုင်းရင်းသား လူမျိုးစု တော်လှန်ရေး အင်အားစုများ၏ ဒီမိုကရေစီနှင့် လူအခွင့်အရေး လှုပ်ရှားမှုများကို ပူးပေါင်းပံ့ပိုးကြရန် အထက်ပါ အဖွဲ့အစည်းများက တောင်းဆိုသည်။

ထို့အပြင် မြန်မာပြည်သူများ၏ စစ်အာဏာရှင်စနစ်အပါအဝင် အာဏာရှင်စနစ် ဟူသမျှ အမြစ်ဖြတ်ရေးနှင့် တန်းတူရည်တူရှိသည့် ဖက်ဒရယ်တိုင်းပြည် တည်ထောင်ရေး တော်လှန်ရုန်းကန်မှုတွင်လည်း ဘင်္ဂလားဒေ့ရှ် ပြည်သူများနှင့် ပေါ်ပေါက်လာမည့် အစိုးရခေါင်းဆောင်တို့အနေဖြင့် မြန်မာပြည်သူများဘက်မှ ပြည့်ပြည့်ဝဝ ရပ်တည် ထောက်ခံမည်ဟု ယုံကြည်မျှော်လင့်ကြောင်း ဖော်ပြသည်။