ဟန်နွေ၊မိထက်/Peopel’s Spring
အာရက္ခဒေသ၊ မောင်တောမြို့အတွင်းနှင့် ၎င်းအနီးပတ်ဝန်းကျင်နေရာ ဒေသများမှတိုက်ပွဲရှောင် ပြည်သူလူထုများ၏ ဝမ်းပျက်၊ ဝမ်းလျှော ရောဂါအပါအဝင် အခြား အထွေထွေရောဂါများအတွက် အရေးတကြီးလိုအပ်လျက်ရှိသော ဆေးဝါးများကူညီပေးရန် ရက္ခိုင့်တပ်တော်(AA)က အရေးပေါ်အကူအညီတောင်းခံချက် ထုတ်ပြန်သည်။
AA အနေဖြင့် မောင်တောမြို့သိမ်းတိုက်ပွဲ ဆင်နွှဲလျက်ရှိရာ ပိတ်မိနေသူများကို အချိန်မီကယ်ထုတ်နေရာ ရွှေ့ပြောင်းပေးလျက်ရှိရာ လူဦးရေ ၂သောင်းနီးပါးထိရှိလာပြီဖြစ်ကြောင်း၊
လက်ရှိတွင် နေရာအချို့၌ ဝမ်းပျက်၊ ဝမ်းလျောရောဂါဖြစ်ပွားနေပြီး ဝမ်းရောဂါ ဖြစ်ပွားနှုန်းမှာ ယခုရက်ပိုင်းအတွင်း မိုမိုမြင့်တက်လျက်ရှိသည့်အပြင် သေဆုံးသူ ၅ဦး ရှိလာဟု အသိပေးသည်။ ရက္ခိုင်ဒေသ၌ ရေကြီးကြီး၏ နောက်ဆက်တွဲဖြစ်သော သောက်သုံးရေ မသန့်ခြင်းများကြောင့် ဝမ်းရောဂါမြင့်တက်လာခြင်းဖြစ်ဟု ဆိုသည်။
Public Service Announcement
စစ်ဘေးနှင့် ရေဘေးတပြိုင်နက်ခံစားနေကြရ၍ ကျန်းမာရေးစောင့်ရှောက်မှု လုပ်ငန်းများ၌ ဆေးဝါးဆိုင်ရာ လိုအပ်မှုများ ရှိနေသည်ဟု AAက ထုတ်ပြန်ခဲ့ပြီး မောင်တောဒေသမှ တိုက်ပွဲရှောင်ပြည်သူများ ဝမ်းပျက်၊ ဝမ်းလျှောရောဂါဖြစ်ပွားလျက်ရှိရာ ထိုသူများအတွက် သက်ဆိုင်သည့်ဆေးဝါးများနှင့် အထွေထွေရောဂါများအတွက် မရှိမဖြစ်လိုအပ်သည့်ဆေးဝါးများ အရေးကြီး လိုအပ်နေကြောင်း ဖော်ပြသည်။
ထို့ကြောင့် အိမ်နီးနားချင်းနိုင်ငံများ၊ နိုင်ငံတကာ အဖွဲ့အစည်းများ ၊ အရပ်ဘက်အဖွဲ့အစည်းများ ၊ စေတနာ့ဝန်ထမ်းများအနေဖြင့် လူနာများအတွက် အရေးတကြီးလိုအပ်နေသည့် ဆေးဝါးများ ကူညီပေးရန် အာရက္ခ ပြည်သူ့ကျန်းမာရေးဌာနမှ ဆေးဝါးလိုအပ်နေသူများကိုယ်စား အရေးပေါ် အကူအညီတောင်းခံကြောင်း ထုတ်ပြန်သည်။
အာရက္ခပြည်သူ့တော်လှန်ရေးအစိုးရသည် အရက္ခဒေသနေ ပြည်သူများ၏ ကျန်းမာရေးစောင့်ရှောက်မှု လုပ်ငန်းများအတွက် မိမိ၌ရှိသည့်ဆေးဝါးများဖြင့် လူမျိုးဘာသာမရွေး ကုသပေးလျက်ရှိကြောင်းလည်း အသိပေးထားသည်။
