ရောင်နီ/People’s Spring
စက်သုံးဆီအခက်အခဲကြောင့် အဝေးပြေးယာဉ်လိုင်းများ ပုံမှန်ထက် အခေါက်ရေ လျော့၍ ပြေးဆွဲနေရကြောင်း အောင်မင်္ဂလာအဝေးပြေးယာဉ်ရပ်နားစခန်းအသိုင်းအဝိုင်းက ပြောသည်။
“နောက်နေ့ထွက်ဖို့ကို ပထမတစ်ရက်က တစ်နေကုန် တန်းစီရတယ်။ ရောင်းပေးတာကလည်း သုံးသောင်းဖိုး၊ငါးသောင်းဖိုးဆိုတော့ ဘယ်လိုမှထွက်လို့မရတာ”ဟု စစ်ကိုင်းတိုင်းသို့ပြေးဆွဲသည့် အဝေးပြေးယာဉ်လိုင်းမှ ဝန်ထမ်းတစ်ဦးက ပြောသည်။
Public Service Announcement
စက်သုံးဆီ လိုသလောက်ဝယ်ယူမရ၍ ယခင်ပြေးဆွဲနေကြ အခေါက်ရေထက် လျော့၍ ပြေးဆွဲနေရကြောင်း မန္တလေးမြို့သို့ပြေးဆွဲသည် ယာဉ်လိုင်းမှဝန်ထမ်းတစ်ဦးက ပြောသည်။
ဒေါ်လာဈေး စံချိန်တင်မြင့်တတ်ပြီးနောက် စက်သုံးဆီများလည်း ပြတ်လတ်မှုဖြစ်ပေါ်ခဲ့ခြင်းဖြစ်ပြီး ပြီးခဲ့သည့် ရက်ပိုင်းက ဆီဆိုင်များသည် အရောင်းပိတ်ထားကာ ရောင်းချပေးသည့်ဆိုင်များမှာလည်း ဝယ်လိုအားနှင့်ရောင်းလိုအားမမျှတမှုများရှိခဲ့သည်။
လွန်ခဲ့သည့် နှစ်ရက်ခန့်မှစတင်၍ယခင်ဈေးနှုန်းထက် စက်သုံးဆီဈေး ၁၀၀ကျော်မြင့်တတ်လာခဲ့ပြီး ဆိုင်တော်တော်များများက သတ်မှတ်ချက်ဖြင့် ပြန်လည်ရောင်းချပေးနေသော်လည်း လက်ရှိအချိန်အထိ တန်းစီဝယ်ယူနေရဆဲဖြစ်သည်။
“တချို့ဂိတ်တွေက ဆီမရလို့ ထွက်မယ့်ရက်တောင် သေချာမပြောနိုင်ဘူး။ ပစ္စည်းတွေတောင် ရက်ကြာကြာထားမရရင် လက်မခံကြဘူး”ဟု ပစ္စည်းပို့ဆောင်သည့် လုပ်ငန်းလုပ်ဆောင်သူတစ်ဦးက!ပြောသည်။
ထို့ပြင် စက်သုံးဆီဈေးမြင့်တတ်လာသောကြောင့်ဟုဆိုကာ တန်ဆာခများလည်း ယခင်ထက်အနည်းငယ်မြင့်လာကြောင်း ၎င်းကဆိုသည်။
ဩဂုတ် ၁၉ ရက်က ရန်ကုန်မြို့တွင် စက်သုံးဆီဈေးနှုန်းများအနေဖြင့် ၉၂ တစ်လီတာ ၂,၉၉၀ ၊ ၉၅ တစ်လီတာ ၃,၁၄၀ ၊ ဒီဇယ်တစ်လီတာ ၂,၆၂၀ နှင့် ပရီမီယံဒီဇယ်တစ်လီတာ ၃,၂၁၀ ဖြင့်ရောင်းချလျက်ရှိသည်။
