သားကြီး/People’s Spring
စစ်ကိုင်းတိုင်း၊ ထီးချိုင့်မြို့တွင် တိုက်ပွဲပြင်းထန်နေပြီး လေကြောင်းတိုက်ခိုက်မှုကြားမှ စစ်ကောင်စီကာကင်းစခန်းသုံးခုကို KIA၊PDFပူးပေါင်းတပ်ဖွဲ့များက တိုက်ခိုက်သိမ်းပိုက်လိုက်ကြောင်းသတင်းရရှိသည်။
ထီးချိုင့်မြို့အနီး မြတောင်ရွာမှ စစ်ကောင်စီတပ်၏ရှေ့တန်းကာကင်းစခန်းသုံးခုကို ယနေ့(ဩဂုတ်လ ၂၁ရက်) နံနက်ပိုင်းတွင် သိမ်းယူနိုင်ခြင်းဖြစ်ကြောင်း ပြည်သူ့ကာကွယ်ရေးရဲဘော်တစ်ဦးကပြောသည်။
Public Service Announcement
ထီးချိုင့်မြို့မှ စစ်ကောင်စီစခန်းအချို့ကို ပြည်သူ့ကာကွယ်ရေး တပ်ဖွဲ့များက တိုက်ခိုက်နေပြီး ယမန်နေ့(ဩဂုတ်လ ၂၀ရက်) နံနက်မှစ၍ စစ်ကောင်စီက လေကြောင်းမှစတင်တိုက်ခိုက်ခဲ့သည်။ နံနက် ၄နာရီခွဲမှ ၆နာရီ ၇မိနစ်အတွင်း
ဂျက်ဖိုက်တာဖြင့် ပေါင် ၅၀၀ ဗုံး သုံးလုံး၊ Y12 လေယာဉ်ဖြင့် ဗုံး ၆၇ လုံး၊ ညဘက်တွင်လည်း မြတောင်ရွာ ဧရာဝတီမြစ်ကမ်းဘေးသို့ ဂျက်ဖိုက်တာဖြင့် ဗုံးနှစ်လုံးကြဲတိုက်ခိုက်ခဲ့ကြောင်းသိရသည်။
ပြည်သူ့ကာကွယ်ရေးပူးပေါင်းတပ်ဖွဲ့များသည် ထီးချိုင့်၊အင်းတော်၊ပင်လယ်ဘူးမြို့များကို မြို့သိမ်းတိုက်ပွဲဆင်နွှဲနေပြီး စစ်ကောင်စီကလေကြောင်းမှ အပြင်းအထန်တိုက်ခိုက်ခုခံနေသည်။
ယခုအခါ မြို့ပေါ်မှ ဒေသခံများသည် အနီးဝန်းကျင်ကျေးရွာများနှင့် မြို့အချို့၌ တိမ်းရှောင်နေသည်။ စစ်ကောင်စီတပ်သည် ထီးချိုင့်မြို့ မြသိန်းတန်တောင်ပေါ် စခန်း၊ ထီးချိူင့်တံတားနှင့် မြတောင်လမ်းဆုံ၌ ဘန်ကာအခိုင်အမာတည်ဆောက်၍ တပ်စွဲထားကြောင်း သတင်းရရှိသည်။
ပြည်သူ့ကာကွယ်ရေးတပ်ဖွဲ့များ (PDF )က ထီးချိုင့်မြို့၊ မောင်းကုန်းကျေးရွာအနီးရှိ စစ်ကောင်စီတပ်စွဲထားသည့် တကောင်းနီကယ်စက်ရုံကိုသိမ်းပိုက်ထိန်းချုပ်ခဲ့သည်။မောင်းကုန်းကျေးရွာသည် စစ်ကောင်စီကင်းစင်နယ် မြေဖြစ်ပြီဟုအမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာနကဩဂုတ်လ ၂ ရက်တွင်ထုတ်ပြန်ခဲ့သည်။
ထီးချိုင့်မြို့မှ စစ်ကောင်စီတပ်စခန်းများကို ကချင်လွတ်လပ်ရေးတပ်မတော်( KIA) ၊အာရက္ခတပ်တော်(AA)၊ PDF နှင့် ပူးပေါင်းတပ်ဖွဲ့များက၂၀၂၃ နိုဝင်ဘာ ၈ရက်မှစ၍ ထိုးစစ်ဆင်တိုက်ခိုက်ခဲ့ပြီးစခန်းအများအပြားကိုသိမ်းပိုက်နိုင်ခဲ့သည်။သို့သော်စစ်ကောင်စီတပ်က မြို့ကိုလေကြောင်းမှအပြင်းအထန်တိုက်ခိုက်ပြီး စစ်ကူများထပ်မံပို့၍ တော်လှန်ရေးတပ်များပြန်လည်ဆုတ်ခွာပေးခဲ့ရသည်။ထိုနောက်စစ်ကောင်စီတပ်က ထီးချိုင့်မြို့ပေါ်ရှိ နေအိမ်ရာပေါင်းများစွာကို မီးရှို့ဖျက်ဆီးခဲ့သည်။
သို့သော် မြို့ပတ်ဝန်းကျင်ရှိ စစ်ကောင်စီတပ်စခန်းများ၊ စစ်ကောင်စီစစ်ကြောင်းများကို တော်လှန်ရေးအဖွဲ့များက ဆက်လက်တိုက်ခိုက်ခဲ့သည်။
