ဟာနာဆန်/People’s Spring
မကွေးတိုင်း၊ ရေစကြိုမြို့နယ်ရှိ ဟင်္သာကျေးရွာပျူစောထီးစခန်းအား ၁၀ရက်ကျော်ကြာတိုက်ခိုက်ပြီးနောက် စခန်းအားသိမ်းပိုက်နိုင်ခဲ့ကြောင်း ရေစကြိုမြို့နယ်ပြည်သူ့ကာကွယ်ရေးအဖွဲ့(ပကဖ)မှ ရဲဘော်ဝေကြီးက ပြောသည်။
ဟင်္သာပျူစောထီးကျေးရွာရှိ စစ်ကောင်စီစစ်ကြောင်းနှင့် ပျူစောထီးအား ရေစကြို ပကဖမှ ၁၀ ရက်ကျော်ကြာ ပိတ်ဆို့တိုက်ခိုက်ခဲ့ရာ ယနေ့ (သြဂုတ် ၂၁ ရက်)နံနက်ပိုင်းတွင် ပျူစောထီးနှင့်စစ်ကောင်စီတပ်သားများ ဆုတ်ခွာထွက်ပြေးသွားကြောင်း ရဲဘော်ဝေကြီးက ပြောသည်။
Public Service Announcement
“အဲဒီရွာကို စစ်ကြောင်းဝင်လာတယ်။ အဲဒီစစ်ကြောင်းနဲ့ပျူရွာကို ပတ်ချာလည်ပိတ်ပြီး ထွက်လို့မရအောင် ပိတ်ဆို့ထားတာ။ ပိတ်ဆို့ပြီးတော့ ထွက်လာတာနဲ့တိုက် ထွက်လာတာနဲ့ပစ်ပေါ့။ ၁၀ရက်ကျော်လောက်တိုက်ခိုက်ခဲ့တယ်။ ဘယ်လိုမှမခံနိုင်တော့တဲ့အဆုံးတော့ ခွေးတွေလည်းပြန်ဆုတ်သွားတယ်။ ပျူရွာတစ်ရွာလုံးလည်း ထွက်ပြေးသွားကြတယ်။”ဟု ရဲဘော်ဝေကြီးက ပြောသည်။
အဆိုပါပျူစခန်းမှ လက်နက်ခဲယမ်းမရသော်လည်း စစ်သုံးပစ္စည်းအချို့နှင့်ရိက္ခများ ရရှိခဲ့ကြောင်း၊ ပျူစခန်းများအား မီးရှို့ရှင်းလင်းခဲ့ကြောင်း ရေစကြိုပကဖက ပြောသည်။
ဩဂုတ် ၁၉ ရက်က စစ်ကောင်စီတပ်က လက်နက်ကြီးဖြင့် ရမ်းသမ်းပစ်ခတ်မှုကြောင့် ဟင်္သာကျွန်းကျေးရွာ ဘုန်းကြီးကျောင်းရှိ စစ်ရှောင်ပြည်သူ (၈၀)အရွယ် ဦးငွေသောင်းဆိုသူ သေဆုံးကာ အမျိုးသမီး တစ်ဦး၊ ကလေး လေးဦး ထိခိုက်ဒဏ်ရာများ ရရှိခဲ့ကြောင်း ရေစကြိုသတင်းအချက်အလက်ကော်မတီက အသိပေးသည်။
ဟင်္သာရွာ စစ်ဆင်ရေးတွင် ရေစကြိုပကဖနှင့် မဟာမိတ်များဖြစ်သော နွေဦးစစ်သည် ရေလယ်ကျွန်းဒေသ စစ်ကြောင်း ၊UURF အပါအဝင် ဒေသတွင်းအဖွဲ့များမှ လေယာဥ်ငယ်များ၊ လက်နက်ကြီးနှင့် ရှော့တိုက်ဒုန်းများဖြင့် ပစ်ကူပေးခြင်းများ ပူးပေါင်းဆောင်ရွက်ခဲ့ကြောင်း သိရသည်။
သြဂုတ် ၂၀ရက် နံနက်ကလည်း ရေစကြိုမြို့ပေါ်၌ စစ်ကောင်စီတပ်နှင့် ဒေသတွင်းPDFအဖွဲ့များ ပစ်ခတ်မှုဖြစ်ပွားပြီး စစ်ကောင်စီတပ်သား ခြောက်ဦးနှင့် ပြည်သူလေးဦး သေဆုံးခဲ့ကြောင်း သတင်းရရှိသည်။
