သတိုး/People’s Spring
နိုင်ငံတဝန်းလေကြောင်းတိုက်ခိုက်မှုများပြုလုပ်နေသည့် စစ်ကောင်စီ၏ တောင်ငူလေတပ်စခန်းကို (၁၀၇)မမ ခုနစ်လုံးဖြင့် ပစ်ခတ်တိုက်ခိုက်ခဲ့ကြောင်း Brave Warriors for Myanmar-BWM အဖွဲ့တာဝန်ရှိသူက လူထုနွေဦးသို့ ပြောသည်။
“၄ လုံး လေတပ်ထဲကို ရောက်ပါတယ်၊ ထိခိုက်မှုသတင်းအချို့တော့ ရထားပါတယ်။ သေချာအောင် လုပ်နေဆဲမို့ စောင့်နေပါတယ်”ဟု ၎င်းက ပြောသည်။
Public Service Announcement
တောင်ငူလေတပ်စခန်းကို Brave Warriors for Myanmar (BWM) အဖွဲ့၏ ဦးဆောင်စီမံမှုဖြင့် Mountain Knights Civilian Defense Force (MKCDF) ၊သံတောင်မြောက်ပိုင်းအထူးဒေသအဖွဲ့၊ စစ်ဒေသ ၃၁ ပါတီရဲဘော်များအဖွဲ့၊ Mercury Revolution Force (MRF)အဖွဲ့တို့ ပူးပေါင်း၍ ဩဂုတ် ၂၀ ရက် ည ၁၂ နာရီ ခန့်တွင် ရှော့တိုက်ဒုန်းများဖြင့် ပစ်ခတ်တိုက်ခိုက်ခဲ့ခြင်းဖြစ်သည်။
“ညဘက်မှာ သူတို့သံသယရှိတဲ့ ဧရိယာတဝိုက်ကို ဒရုန်းနဲ့ပတ်ကြည့်ပါတယ်။ ည ၁ နာရီ ၅ မိနစ်လောက်မှာ (၁၂၀) မမ နှစ်လုံးနဲ့ ရမ်းသမ်းပစ်ပါတယ်၊ တစ်လုံးက အောင်သပြေကုန်းရွာဘက်ကိုကျပြီး ရွာသားတစ်ဦးရဲ့နွားတင်းကုပ်မီးလောင်ပြီး နွားတစ်ရှဥ်းသေသွားတယ်လို့ သိရပါတယ်။ နောက်ပိုင်းအခြေအနေကိုတော့ ဆက်လက်စုံစမ်းနေဆဲပါ” ဟု စစ်ကောင်စီဘက်မှ ပြန်လည်ပစ်ခတ်သည့် အကြောင်းကို BWM မှတာဝန်ရှိသူက ပြောသည်။
စစ်ကောင်စီဘက်မှ ပစ်ခတ်မှုများရှိသော်လည်း စစ်ဆင်ရေးလုပ်ဆောင်သည့်အဖွဲ့သားအားလုံးဘေးကင်းကြောင်း ၎င်းက ပြောသည်။
“တောင်ငူလေတပ်ကို ဒါက ဒီနှစ်အတွင်း သုံးကြိမ်မြောက်ပါ၊ မတ်လက တစ်ကြိမ်၊ မေလကတစ်ကြိမ်တိုက်ခိုက်ခဲ့ပါသေးတယ်”ဟု BWM မှတာဝန်ရှိသူက ပြောသည်။
BWMအနေဖြင့် မဟာမိတ်အဖွဲ့များနှင့်အတူ စစ်ကောင်စီ၏ လေတပ်စခန်းများကို အဓိကတိုက်ခိုက်နေခြင်းဖြစ်ပြီး ယခုနှစ်အတွင်း ခြောက်ကြိမ်မြောက်တိုက်ခိုက်ခဲ့ကာ စစ်ကောင်စီဘက်မှ ထိခိုက်မှုရှိခဲ့သည်။
