ဇေအောင်/People’s Spring
စစ်ကိုင်းတိုင်း၊ ဒီပဲယင်းမြို့နယ်တွင် စစ်ရှောင်များရှိနေသည့် နဂါးတွင်းကျေးရွာကို စစ်ကောင်စီက လေကြောင်းတိုက်ခိုက်ခဲ့ရာ စစ်ရှောင်ပြည်သူနှစ်ဦး ဒဏ်ရာရပြီး နေအိမ်အချို့ ပျက်စီးခဲ့ကြောင်း ဒေသခံများက ပြောသည်။
သြဂုတ် ၂၂ရက် ည ၁၀ နာရီခွဲခန့်က ဒီပဲယင်းမြို့နယ်၊ နဂါးတွင်းကျေးရွာကို စစ်ကောင်စီက ဂျက်ဖိုက်တာဖြင့် လေကြောင်းမှတိုက်ခိုက်ခဲ့ရာ အမျိုးသားတစ်ဦးနှင့် အမျိုးသမီး တစ်ဦး ထိခိုက်ဒဏ်ရာရရှိခဲ့ကြောင်း ဒေသခံများက ပြောသည်။
Public Service Announcement
“အမျိုးသမီး တစ်ဦး အမျိုးသား တစ်ဦး ခြေထောက်ထိတယ် ပြောတယ်။ မစိုးရိမ်ရဘူးလို့သိရတယ်”ဟု ဒေသခံတစ်ဦးက ပြောသည်။
ထို့အပြင် နေအိမ် ၅လုံးခန့်နှင့် စာသင်ကျောင်းအုတ်တံတိုင်းလည်း ပျက်စီးခဲ့ကြောင်း ဒေသခံများက ပြောသည်။
“ဒီပဲယင်းကနေ (၅)မိုင်လောက်ဝေးတဲ့ရွာကို အသားလွတ်ဝင်ပစ်သွားတာ။ ခွေးက ဒီပဲယင်းထဲမှာပဲ ရှိတာ။ အဲ့မှာ(နဂါးတွင်းရွာ)ရှိတာက ပြည်သူနဲ့ စစ်ရှောင်လောက်ပဲရှိတာ။ တိုက်ပွဲလည်းမရှိပဲနဲ့ပစ်သွားတာ”ဟု ဒီပဲယင်းမြို့နယ် စစ်ရှောင်ထောက်ပံ့ရေးအဖွဲ့၏ တာဝန်ရှိသူတစ်ဦးက ပြောသည်။
သြဂုတ် ၁၅ ရက်ကစတင်ခဲ့သည့် ဒီပဲယင်းမြို့သိမ်းတိုက်ပွဲကြောင့် မြို့ခံများအပါအဝင် မြို့နယ်ရှိ ကျေးရွာ ၁၀ရွာခန့်မှ ပြည်သူသောင်းချီ ထွက်ပြေးတိမ်းရှောင်နေရပြီး ရိက္ခာများအခက်အခဲရှိနေကြောင်း S&C မီးဘေးစစ်ဘေးပညာရေး ကူညီစောင့်ရှောက်ရေးအဖွဲ့၏ တာဝန်ခံ ကိုစိုးမိုးအောင်က ပြောသည်။
ဒီပဲယင်းမြို့ကို တော်လှန်ရေးတပ်ဖွဲ့များက ၃ ရက်ကြာ တိုက်ခိုက်ပြီးနောက် သြဂုတ် ၁၈ရက်နံနက်ပိုင်းတွင် မြို့သိမ်းနိုင်ခဲ့သည်။ သို့သော် လေကြောင်းပစ်ကူများနှင့် စစ်တပ်က အင်အားတိုးစစ်ကြောင်းထိုးမှုကြောင့် PDFရဲဘော်များ ဒီပဲယင်းမြို့တွင်းမှ ယာယီဆုတ်ခွာပေးထားကြောင်း သတင်းရရှိသည်။
