အင်ကြင်း/People’s Spring
စစ်ကောင်စီရုံးအခြေစိုက်ရာ နေပြည်တော်တွင် ရေကြီးရေလျှံမှုဖြစ်ပွားနေပြီး ကုန်တိုက်များအပြင် နေအိမ်အများအပြား ရေဝင်ရောက်နေ၍ ရွှေ့ပြောင်းနေရကြောင်း သတင်းရရှိသည်။
ယနေ့ (သြဂုတ် ၂၄ရက်)နံနက် ၂နာရီခန့်မှစတင်ကာ နေပြည်တော်၊ ပျဥ်းမနားမြို့ရှိ ငလိုက် ချောင်းရေမြင့်တက်လာ၍ ချောင်းဘေးဝဲယာရှိ ရပ်ကွက်များမှ နေအိမ်အများ ရေဝင်နစ်မြုပ်နေကြောင်း ဒေသခံများက ပြောသည်။
Public Service Announcement
ထို့အပြင် နေပြည်တော်ရှိ အိမ်ရာအချို့၊ သပြေကုန်းဈေးဝန်းကျင်နှင့် မြေနိမ့်ပိုင်းရှိ ရပ်ကွက်၊လမ်းပိုင်းများလည်း ရေတက်နေကြောင်း၊ ဥတ္တရသီရိမြို့နယ်ရှိ Ocean Center အတွင်းသို့လည်း ရေများဝင်ရောက်လာ၍ ကုန်ပစ္စည်းအများအပြား ရေနစ်မြုပ်ခဲ့ကြောင်း ဒေသခံများက ပြောသည်။
“ဟိုးတုန်းက ငါးလိုက်ချောင်း ရေကြီးလို့မီးရထားသံလမ်းလူ ကူးတံတားကျိုးလို့ ပျဥ်းမနားသူ ပျဥ်းမနားသားတွေ အသက်ဆုံးခဲ့ဖူးတဲ့ ရာဇဝင်ရှိခဲ့တယ်။ ဒါပေမဲ့ ယနေ့မနက်ရေကြီးမှုက အကြီးဆုံးလို့ကျွန်တော်ထင်တယ်။ ဘာလို့လဲဆို ဟိုတုန်းကငါးလိုက်ချောင်းကကျဥ်းတယ်။ စောက်ပိုနက်တယ်။ ခုချောင်းကစောက် မနက်ပေမဲ့ ဟိုးတုန်းက ငါးလိုက်ချောင်းထက် ကျွန်တော့်အမြင်အထင်၂ဆ ပိုကျယ်တယ်။ဒါမို့ ဒီနေ့ရေကြီးမှုက အကြီးဆုံးလို့ထင်ပါတယ်။”ဟု ပျဥ်းမနားဒေသခံတစ်ဦးက ဆိုသည်။
(ပျဥ်းမနားမြို့ ငလိုက်ချောင်းတလျှောက်ရေကြီးရေလျှံမှု ဖြစ်ပွားနေစဥ်နှင့် နေပြည်တော်ဥတ္တရသီရီမြို့နယ်ရှိ Ocean Center ရေဝင်ရောက်နေစဥ်။ ဓာတ်ပုံ-MFSD၊ CJ)
ငလိုက်ချောင်းရေမြင့်တက်လာမှုကြောင့် တံတားအချို့ ယာယီပိတ်ထားကြောင်းလည်း သိရသည်။
“ပေါင်းလောင်းဘက်တွေ၊နေရာတော်တော်များရေဝင်ပါတယ်။ ချောင်းနံဘေးပတ်ဝန်းကျင် ရွှေ့ပြောင်းရပါတယ်။ ရေများဝင်လာလို့ပါ။ ကျန်နေရာများမစိုးရိမ်ရပါဘူး။”ဟု ဒေသခံတစ်ဦးက ပြောသည်။
ပျဥ်းမနားမြို့ရှိ ရွာကောက်၊ သာယာကုန်း(၁) ကမ်းနားလမ်း အထက်ပိုင်းနေရာများအထိ ရေဘေးဒုက္ခကြုံနေရကြောင်း၊ စဉ့်အိုးဖိုတိုက် ၉လမ်း အနီးအနားက အိမ်များလည်း နစ်မြှုပ်နေပြီး အမြင့်ပိုင်းရှိ အိမ်များ တံစက်မြိတ်အထိ နစ်မြုပ်နေပြီး ရေဘေးဒုက္ခသည်အများအပြားရှိနေကြောင်း ဒေသခံအချို့က ပြောသည်။
“မနေ့ကမိုးအရမ်းများလို့ဆည်ရေမထိန်းနိုင်လို့ဆည်ကနေရေလွှတ်တာ။ တခါမှဒီလောက်မများဖူးဘူး။ အဲ့နားကလူတွေမေးကြည့်တော့လည်းသူတို့လည်းအခုကပထမဆုံးပဲတဲ့။”ဟု ဒေသခံတစ်ဦးက ပြောသည်။
ယခု နေပြည်တော်ရှိ ပျဉ်းမနားရေကြီးရေလျှံမှုသည် ၁၉၇၂ ဝန်းကျင်က ရေကြီး၍ မီးရထား လူကူးတံတား ကျိုးကျသည့်ပဏာမနီးပါး ကြုံနေရခြင်းဖြစ်ကြောင်း ဒေသခံများက ပြောသည်။
ငလိုက်ချောင်းသည် စစ်တောင်းမြစ်၏ မြစ်လက်တက်တစ်ခုဖြစ်ပြီး ပဲခူးရိုးမ မြစ်ဖျားခံကာ နေပြည်တော်၊ ပျဉ်းမနားဒေသတွင်း၌ အနောက်မှ အရှေ့သို့ ဖြတ်သန်းစီးဆင်းနေသည်။
ယမန်နေ့ညပိုင်းက ရိုးမအပါအဝင် ထိုဒေသဝန်းကျင်တဝိုက်တွင် မိုးကြီးခဲ့ပြီး ငလိုက်ချောင်း တလျှောက်ရေများကြီးနေပြီး ဒေသခံများ ရွှေ့ပြောင်းနေရသည်။
