ဟန်နွေ/People’s Spring
ပဲခူးတိုင်း၊ လက်ပံတန်းမြို့နယ်၊ ပဲခူးရိုးမ၊ ရေငံကျေးရွာ အနီးတွင် ပြည်သူ့ကာကွယ်ရေးတပ်(PDF)နှင့် စစ်ကောင်စီတို့ တိုက်ပွဲ ဖြစ်ပွားခဲ့ရာ စစ်ကောင်စီတပ်သေဆုံးထိခိုက်များပြားခဲ့ပြီး လက်နက်ခဲယမ်းများနှင့် စစ်သုံ့ပမ်းများ ရရှိခဲ့ကြောင်း အမျိုးသားညီညွတ်ရေးအစိုးရ(NUG) ကာကွယ်ရေးဝန်ကြီးဌာန PDF စစ်ရုံးချုပ်က သတင်းထုတ်ပြန်သည်။
ဩဂုတ် ၂၄ရက်တွင် အင်အား (၁၀၀) ကျော်ပါ စစ်ကောင်စီ စစ်ကြောင်းကို ပြည်သူ့ကာကွယ်ရေးတပ်မတော်သာယာဝတီခရိုင် တပ်ရင်း (၃၈၀၂) တပ်ခွဲ (၂/၃/၅/၆) နှင့် တပ်ရင်း (၃၈၀၃) တို့ ကြားဖြတ်တိုက်ခိုက်ခဲ့ခြင်းဖြစ်သည်ဟုဆိုသည်။
အဆိုပါတိုက်ပွဲအတွင်း စစ်ကောင်စီတပ်ဖွဲ့ဝင် (၂၀) ကျော် သေဆုံးကာ စစ်သုံ့ပန်း (၁၀) ဦး ရရှိခဲ့သည်ဟု အသိပေးသည်။
Public Service Announcement
ထို့ပြင် စစ်ကောင်စီတပ်ထံမှ လက်နက်မျိုးစုံ အလက် ၃၀ နှင့် ကျည်ခဲယမ်းများ ရရှိခဲ့သည်ဟု ဖော်ပြသည်။
G-3 (၁၉) လက်၊ G-4 (၁) လက်၊ 40 mm (၂) လက်၊ MA-1 (၃) လက်၊ MA-3 (၂) လက်၊ MA-12 (၁) လက်၊ MA-2 (MK-11) (၁) လက်၊ ပစ္စတို MA-5 (၁) လက် တို့ သိမ်းရခဲ့ပြီး ကျည်များနှင့် ငွေကျပ် ၂၅သိန်းကျော်၊ ဖုန်း ၈လုံး သိမ်းရခဲ့ဟု ထုတ်ပြန်သည်။
အဆိုပါ တိုက်ပွဲအပြီးတွင် ရန်သူ့စစ်ကြောင်း အထိနာဆုတ်ခွာသွားခဲ့သည်ဟုလည်း အသိပေးထားသည်။
NUG၊ ကာကွယ်ရေး ဝန်ကြီးဌာန အနေဖြင့် စစ်တောင်းမြစ်ဝှမ်း စိုးမိုးရေး နှင့် ပဲခူးရိုးမ ထိုးဖောက်ရေး စစ်ရေးစီမံချက်များ ချမှတ်ထားပြီးဖြစ်ကာ စစ်ရေးလှုပ်ရှားမှုများ ဆောင်ရွက်လျက်ရှိကြောင်း အသိပေးထုတ်ပြန်သည်။
PDF တပ်ဖွဲ့များသည် စစ်ကိုင်းတိုင်း အင်းတော်၊ ထီးချိုင့်၊ ပင်လယ်ဘူးမြို့များ၌လည်း KIA နှင့်ပူးပေါင်းပြီး မြို့သိမ်းတိုက်ပွဲဆင်နွှဲလျက်ရှိသည်။
