အင်ကြင်း/People’s Spring
မန္တလေးတိုင်း၊ တောင်သာမြို့နယ်၊ ကျွဲတလင်းပျူစောထီးကျေးရွာဘုန်းကြီးကျောင်းကို စစ်ကောင်စီက လေကြောင်းမှ ဗုံးကြဲတိုက်ခိုက်ခဲ့ရာ ပြည်သူတစ်ဦးသေဆုံးကြောင်း သတင်းရရှိသည်။
သြဂုတ် ၂၆ရက် ည ၈နာရီခွဲခန့်က တောင်သာမြို့နယ်၊ ကျွဲတလင်းပျူစောထီးရွာရှိ ဘုန်းကြီးကျောင်းကို စစ်ကောင်စီတပ်က တိုက်ပွဲဖြစ်ပွားခြင်းမရှိဘဲ လေကြောင်းမှဗုံးကြဲတိုက်ခိုက်ခဲ့ကြောင်း ဒေသခံများက ပြောသည်။
Public Service Announcement
” ငါးလုံးပဲ။ စက္ကန့်ပိုင်းအတွင်း သုံးလုံး ပြီးတော့ ၅မိနစ်လေက် ၂လုံး။ ဆက်တိုက်ပဲ။”ဟု ဒေသခံတစ်ဦးက ပြောသည်။
တိုက်ခိုက်မှုကြောင့် ပြည်သူတစ်ဦးသေဆုံးပြီး နှစ်ဦးဒဏ်ရာရရှိကြောင်း လူထုလှုပ်ရှားမှု့ကော်မတီ-တောင်သာက အသိပေးသည်။
“တစ်ယောက်က ပေါင်ထိသွားတယ် ပြောတယ်။ အဲဒီကျွဲတလင်းက ဒီလထဲတော်လှန်ရေးအဖွဲ့တွေက တခါသွားတိုက်ပြီး စခန်းသိမ်းဖူးတယ်။”ဟု ဒေသကာကွယ်ရေးရဲဘော်တစ်ဦးက ပြောသည်။
သေဆုံးသူများ၏ အသေးစိတ်အချက်အလက်များအား စုံစမ်းနေဆဲဖြစ်ပြီး လက်တလောမသိရသေးပေ။
ထိုလေကြောင်းပစ်ခက်မှုကြောင့် ကျွဲတလင်းရွာ ဘုန်းကြီးကျောင်းနှင့် စေတီပုထိုးများ၊ စာသင်ကျောင်းနှင့် နေအိမ်အဆောက်အအုံများ ပါထိခိုက်ပျက်စီးခဲ့ကြောင်း တောင်သာမြို့နယ် ပြည်သူ့ကာကွယ်ရေးအဖွဲ့က ပြောသည်။
သြဂုတ် ၁၄ ရက်ကလည်း တောင်သာမြို့မြောက် ဘက် ဆည်ကုန်း(မြောက်ရွာ)အား စစ်ကောင်စီက တိုက်ပွဲဖြစ်ပွားမှုမရှိဘဲ လေကြောင်းတိုက်ခိုက်ခဲ့ရာ မိသားစုဝင်၃ဦး ထိခိုက်ဒဏ်ရာရရှိခဲ့ပြီး နေအိမ်တစ်လုံး ပျက်စီးခဲ့သည်။
မြင်းခြံခရိုင်၊တောင်သာမြို့နယ်အတွင်း စစ်ကောင်စီက လေကြောင်းမှတိုက်ခိုက်နေ၍ ပြည်သူများ ဗုံးခိုကျင်းများတူးထားကြရန် တောင်သာမြို့နယ် ပြည်သူ့ကာကွယ်ရေးတပ်ဖွဲ့က သတိပေးထားသည်။
သြဂုတ်၁ဝရက် နံနက်ပိုင်းက စတင်ခဲ့သည့် မြင်းခြံခရိုင်အထူးစစ်ဆင်ရေး Myingyan District Special Operation (MDSO)တွင် တောင်သာမြို့နယ်၊ ဝဲလောင်ရွာဓာတ်အားခွဲရုံစခန်းတိုက်ခိုက်မှုအတွင်း စစ်ကောင်စီတပ် ခြောက်ဦး သေဆုံးခဲ့သည်။
သြဂုတ်၁၂ရက်က တောင်သာမြို့နယ်ရှိ စစ်ကောင်စီစခန်း နေရာလေးခုအား ထပ်မံတိုက်ခိုက် မှုတွင်ဓာတ်ငွေ့ပိုက်လိုင်းစခန်းနှင့်စွပ်ကျယ်စက်ရုံစခန်းမှ စစ်ကောင်စီတပ်သားများ စခန်းစွန့်ထွက်ပြေးသွားခဲ့သည်။ ထို့နောက် သြဂုတ်လလယ်အတွင်း နန်းမြင့်တောင်ဂိတ်၊ နတ်စောင့်ရွာဂိတ်များကိုပါ PDFများက ဆက်လက်သိမ်းပိုက်ထားသည်။
