ဆွာဆည်ရေလျှံနေပြီး တောင်ငူမြို့နယ်အတွင်း ရေဘေး အရေးပေါ်အခြေအနေကြုံ

ဇော်ရမ်း/People’s Spring

မိုးသည်းထန်စွာရွာပြီးနောက် ဆွာဆည်ရေလျှံနေပြီး တောင်ငူမြို့မှကျေးရွာအချို့ ရေကြီးနစ်မြုပ်နေကာ ဒေသခံများသည် ဘေးလွတ်ရာသို့ ညတွင်းချင်းပြောင်းရွှေ့ခဲ့ကြရသည်။

တောင်ငူမြို့နယ် အတွင်း ကျေးရွာအချို့တွင် ယမန်နေ့(ဩဂုတ်လ ၂၇ရက်)ညမှစ၍ ရေကြီးနစ်မြုပ်ခြင်းဖြစ်သည်။

Public Service Announcement

“ဆွာဆည်က ရေလျှံနေပြီး လွှတ်ချနေပါတယ်။ ကြိုသတိပေးတာမရှိဘူး။ ရေက တရိပ်ရိပ်တက်နေပြီး အနိမ့်ပိုင်းတွေ အရေးပေါ် အခြေအနေဖြစ်ပါတယ်” ဟု တောင်ငူမြို့ဒေသခံတဦးကပြောသည်။

လက်ရှိတွင် တောင်ငူအမှတ်(၆)ကျောင်း၌ အရေး‌ပေါ်ကယ်ဆယ်ရေးစခန်းဖွင့်ထားပြီး ရေဘေးသင့်ပြည်သူများကို လက်ခံထားသည်။ အရေးပေါ်ကယ်ဆယ်ရေးများပြုလုပ်နေရဆဲဖြစ်၍ လူဦးရေစာရင်းမရသေးကြောင်း ကူညီကယ်ဆယ်နေသူများကပြောသည်။

ဆွာဆည်ရေဖောက်ချလိုက်၍ ရှမ်းစုရွာအပါအဝင် ကျေးရွာဆယ်ရွာထက်မနည်း ရေကြီးနေပြီး ကယ်ဆယ်ရေးအတွက် အရေးပေါ်အကူအညီများလိုအပ်နေသည်ဟု ဒေသခံများကပြောသည်။ဆွာဆည်သည် ၂၀၁၉ခုနှစ်ဩဂုတ်လက ရေလျှံပြီး ရေပိုလွှဲပဲ့ကျခဲ့ရာ ရေတာရှည်၊တောင်ငူမြိ့နယ်တို့၌ ရေဘေးကြုံတွေ့ခဲ့ဖူးသည်။

လက်ရှိတွင်ပဲခူးတိုင်းတွင်ရွှေကျင်မြစ်၊ စစ်တောင်းမြစ်တို့ စိုးရိမ်ရေမှတ်အထက် မြင့်တက်နေသည်။ပဲခူးတိုင်းတွင် ပြီးခဲ့သည့် ဇူလိုင်လကုန်က ပဲခူးမြို့၊ တောင်ငူမြို့အပါအဝင် မြို့အများအပြားရေကြီးနှစ်မျိုးမှုကြုံတွေ့ခဲ့ပြီး လူ ရှစ်ဦးထက်မနည်း သေဆုံးခဲ့သည်။

ယခုရက်ပိုင်းအတွင်း ပဲခူးတိုင်းတွင် နေ့စဉ်မိုးကောင်းနိုင်သလို ဧရာဝတီတိုင်း၊ ကရင်ပြည်နယ်၊ မွန်ပြည်နယ်နှင့် တနင်္သာရီတိုင်းတို့တွင် ဩဂုတ်လ နေရာကွက်၍ မိုးကြီးနိုင်၍ ရေဘေး၊ မြေပြိုဘေး သတိပြု နေထိုင်ရန် အမျိုးသားညီညွတ်ရေးအစိုးရ၊ လူသားချင်းစာနထောက်ထားရေးနှင့် ဘေးအန္တရာယ်ဆိုင်ရာစီမံခန့်ခွဲရေးဝန်ကြီးဌာန(MOHADM)က သြဂုတ် ၂၈ ရက်ကထုတ်ပြန်သတိပေးထားသည်။