မိထက်/People’s Spring
မင်းတုန်းမြို့နယ်ပြည်သူ့ကာကွယ်ရေးအဖွဲ့(ပကဖ)၏ အခြေခံစစ်ပညာသင်တန်းဆင်းပွဲကို ယမန်နေ့(ဩဂုတ် ၂၈ရက်)က ပြုလုပ်ရာ ကျင်းပအပြီးတွင် စစ်ကောင်စီက လေကြောင်းမှတိုက်ခိုက်ခဲ့သည်။
မင်တုန်းပကဖ အခြေခံစစ်ပညာသင်တန်းအပတ်စဉ်(၁)သင်တန်းဆင်းပွဲအခမ်းအနားကို မင်းတုန်းမြို့နယ်တစ်နေရာ၌ ပြုလုပ်ခဲ့ခြင်းဖြစ်သည်။ နံနက်၉နာရီတွင် သင်တန်းဆင်းပွဲ ပြီးဆုံးခဲ့ပြီး ၉နာရီခွဲခန့်တွင် စစ်ကောင်စီကလေကြောင်းမှ တိုက်ခိုက်ခြင်းဖြစ်သည်။
Public Service Announcement
” လေကြောင်းသတင်းက ကြိုရလို့ သင်တန်းဆင်းပွဲကို အမြန်ဖြတ်လိုက်တာ။ စစ်တပ်က ဂျက်ဖိုက်တာနဲ့ ပတ်ပစ်တာ။ ကိုယ့်ဘက်က ထိခိုက်မှုလုံးဝမရှိခဲ့ပါဘူး။ နောက်ထပ် လေကြောင်းသတိပေးချက်တွေလည်းရထားပါတယ်”ဟု မင်းတုန်းမြို့မှ ပြည်သူ့ကာကွယ်ရေးထောက်ပို့ရဲဘော်တစ်ဦးက ပြောသည်။
မင်းတုန်းပကဖ၏ အခြေခံစစ်ပညာသင်တန်းတွင် အမျိုးသမီးငယ်များလည်း ပါဝင်သည်။
မင်းတုန်းမြို့သည် ပုသိမ် – မုံရွာ လမ်းပေါ်တွင်ရှ်ိပြီး မကွေးတိုင်း၊ စစ်ကိုင်းတိုင်း၊ ဧရာဝတီတိုင်းတို့ကို ဆက်သွယ်ရာ၌ အရေးပါသည့်ဒေသများအနက် တစ်ခုဖြစ်သည်။ ထို့အပြင် ရခိုင်ရိုးမ၊ အမ်း၊ တောင်ကုတ်များနှင့် ထိစပ်နေသည်။
စစ်ကောင်စီက ပြီးခဲ့သည့် ဇူလိုင်မှစတင်ကာ မင်းတုန်းမြို့ပေါ်တွင် လုံခြုံရေးတိုးမြှင့်နေပြီး အရပ်သားပြည်သူများအားစစ်ဆေးမှုများ ပိုမိုပြုလုပ်နေကြောင်း ဒေသခံများက ပြောသည်။
