ဟန်နွေ/People’s Spring
ချင်းပြည်နယ် မင်းတပ်မြို့နယ်ကို စစ်ကောင်စီက ယနေ့ (ဩဂုတ် ၃၁ရက်) မနက်အစောတွင် လေကြောင်း တိုက်ခိုက်မှု ထပ်မံ ပြုလုပ်ခဲ့၍ ပြည်သူလူထုနေအိမ်ပျက်စီးမှု ရှိခဲ့ကြောင်း မင်းတပ်ဒေသခံက အသိပေးသည်။
ယနေ့ နံနက် အစော ၃နာရီခန့်တွင် တိုက်လေယာဉ်တစ်စီးက မင်းတပ်မြို့နယ်ရှိ ကျေးရွာတစ်ခုကို ပေါင် ၅၀၀ ဗုံးအပါအဝင် ဗုံးများဖြင့် ၂ကြိမ် ပစ်ခတ်တိုက်ခိုက်ခဲ့ခြင်းဖြစ်သည်ဟု တိုက်ခိုက်ခံရမှု မှတ်တမ်းဓာတ်ပုံများနှင့်အတူ မင်းတပ်ဒေသခံက လူမှုကွန်ရက်၌ ဖော်ပြသည်။
“ယခုရက်ပိုင်း စခများမှ ပြည်သူများအိပ်မောချချိန်တွင်လေကြောင်းတိုက်ခိုက်လေ့ ရှိနေသောကြောင့် အမျိုးများအနေဖြင့် အထူးဂရုစိုက်ပေးကြပါဗျ”ဟု မင်းတပ်ဒေသခံက သတိပေးသည်။
Public Service Announcement
ထို့ပြင် စစ်ကောင်စီတပ်သည် ယနေ့ နံနက် ၉နာရီခန့်မှစ၍ မင်းတပ် အခြေစိုက် ခလရ(၂၇၄) တပ်ရင်း အတွင်းသို့ Y12ကုန်တင်လေယာဉ်မှ လေထီးဖြင့် ရိက္ခာထုပ်များချပေးခဲ့ဟု ဒေသခံက အသိပေးသည်။
“ယခင် လေထီးဖြင့်ရိက္ခာလာချပေးရာတွင် အရက်များ၊ ဘီယာများ၊ ဆေးလိပ်၊ ဆီဆား များအပြင်ဒရုန်းဗုံးသီးကျည်အချို့လည်းပါဝင်ကြောင်းကြားသိရပါတယ်” ဟု ဒေသခံက ဆိုသည်။
စစ်ကောင်စီတပ်သည် ဩဂုတ် ၂၈ရက်ကလည်း ခလရ(၂၇၄) တပ်ရင်းအနီးတွင် လေထီးဖြင့် ခဲယမ်း၊ ရိက္ခာများ ချပေးခဲ့သည်ဟု ဆိုသည်။
ဩဂုတ် ၃၀ရက်ကလည်း မင်းတပ်မြို့အနီး တစ်နေရာကို ပေါင် ၅၀၀ ဗုံးအပါအဝင် ဗုံးများဖြင့် ၂ကြိမ် လေကြောင်း တိုက်ခိုက်ခဲ့ကြောင်း ဒေသခံက အသိပေးထားသည်။
စစ်ကောင်စီတပ်သည် ဩဂုတ်လအတွင်း မင်းတပ်မြို့နယ်သို့ လေကြောင်း တိုက်ခိုက်မှု၊ ဒရုန်းဖြင့် ဗုံးကြဲတိုက်ခိုက်မှုနှင့် လက်နက်ကြီး ပစ်ခတ်မှုများခပ်စိပ်စိပ် ပြုလုပ်လျက်ရှိသည်။ ထိုသို့ လေကြောင်းတိုက်ခိုက်မှုများကြောင့် အချိန်မရွေးတိုက်ပွဲဖြစ်ပွားနိုင်ကြောင်း ချင်းဒေသကာကွယ်ရေးတပ်(CDF)-မင်းတပ်က အသိပေးထုတ်ပြန်ထားသည်။
CDF မင်းတပ်သည် ချင်းညီနောင်အဖွဲ့ဝင် ဒေသကာကွယ်ရေးတပ်ဖွဲ့ဖြစ်ပြီး ကန်ပက်လက်မြို့နယ် ကျင်ဒွေးမြို့သိမ်းတိုက်ပွဲ ၊ မတူပီမြို့သိမ်းတိုက်ပွဲများ၌ ပါဝင်ကာ အောင်မြင်မှုရရှိထားသည်။
ထို့ပြင် ချင်းပြည်နယ်၌ စစ်ကောင်စီတပ်များ ကင်းစင်အောင် တိုက်ခိုက်သွားမည်ဟုလည်း အသိပေးထားသည်။
