ဟာနာဆန်/People’s Spring
မကွေးတိုင်း၊ ရေစကြိုမြို့နယ်တွင် ခမရ (၂၅၈) တပ်ရင်းမှ တပ်ပြောင်းရွှေ့လာသော ဗိုလ်ကြီးဇော်လင်း၏ အိမ်ထောင်ပရိဘောဂပစ္စည်းများတင်ဆောင်လာသော ယာဥ်တစ်စီးအား PDF ရဲဘော်များက ဖမ်းဆီးလိုက်ကြောင်း သတင်းရရှိသည်။
ယမန်နေ့(စက်တင်ဘာ ၁ရက်) နံနက် ၇နာရီခန့်က ရေစကြိုမြို့၊ အမှတ်(၂၅၈)ခြေလျင်တပ်ရင်းမှ တပ်ပြောင်းတပ်ချိန်း ပြုလုပ်လာသည့် ပစ္စည်းများသယ်ဆောင်လာသော ကန်ဒါကားတစ်စီးကို ရေစကြို-ပခုက္ကူ လမ်းပိုင်း တစ်နေရာတွင် ဖမ်းဆီးထိန်းသိမ်းလိုက်ကြောင်း Southern YSO PDF အဖွဲ့တာဝန်ခံ ဗိုလ်မောင်းက ပြောသည်။
ကားပေါ်ပါပစ္စည်းများသည် ခလရ(၂၅၈) တပ်မှ ဗိုလ်ကြီးဇော်လင်း၏ အိမ်ထောင်ပရိဘောဂ ပစ္စည်းများဖြစ်ကြောင်း၊ ထို့အပြင် ကားပေါ်ပါ ယာဥ်မောင်းတစ်ဦးနှင့် ရှမ်းမြောက်၌ သေဆုံးခဲ့သော စစ်သား၏ မိသားစုဝင် သားအမိ နှစ်ဦးကိုပါ ဖမ်းဆီးရမိခဲ့ကြောင်း ၎င်းက ပြောသည်။
Public Service Announcement
သို့သော် ၎င်းတို့အား စစ်ဆေးပြီး အပြစ်မရှိပါက ပြန်လွှတ်ပေးရန်စီစဥ်နေကြောင်း Southern YSO PDF အဖွဲ့တာဝန်ခံ ဗိုလ်မောင်းက ပြောသည်။
သိမ်းဆည်းရမိသော ပစ္စည်းများတွင်အိမ်ထောင်ပရိဘောဂပစ္စည်းများ၊ ဗိုလ်ကြီးဇော်လင်း၏ စစ်သင်တန်းဆင်း လက်မှတ်များ၊ အင်းဝဘဏ်စာအုပ်များ၊ တပ်တွင်းအပေါင်ခံ လစာထုတ်ကတ်များ ဗိုလ်ကြီးဇော်လင်း၏ မင်္ဂလာဆောင်မှတ်တမ်း ဓာတ်ပုံများ ပါရှိကြောင်း သိရသည်။
သြဂုတ် ၁၀ ရက်ကလည်း ပခုက္ကူမြို့မှ ရေစကြိုသို့ ထွက်ခွာလာသော စစ်ကောင်စီယာဥ်များ တိုက်ခိုက်ခံရပြီး စစ်ကောင်စီတပ်ဖွဲ့ဝင် အများအပြား သေဆုံးကာ လက်နက်ခဲယမ်းများသိမ်းဆည်းရမိခဲ့သည်။
