သုည/People’s Spring
စစ်ကိုင်းတိုင်းအတွင်းက သပိတ်အဖွဲ့တွေ၊ ဒေသခံပြည်သူတွေက စစ်အာဏာရှင်ဆန့်ကျင်ရေး သပိတ်စစ်ကြောင်းတွေ ဒီကနေ့ (စက်တင်ဘာ ၇)မှာ အသီးသီးချီတက်ဆန္ဒပြခဲ့ပါတယ်။
စစ်ကိုင်းတိုင်း ယင်းမာပင်မြို့နယ်မှာလည်း အောင်လံလွှင့်မည်ဒေါင်းသွေးနီလူထုသပိတ်၊ အောင်လံလွှင့်မည်ရွှေရေကြည် လူထုသပိတ်၊ မြောက်ခြမ်းသပိတ်အင်အားစုတို့က အာဏာသိမ်းစစ်တပ်၊ အကြမ်းဖက်စစ်တပ်ကို အလိုမရှိကြောင်းနဲ့ မတရားစစ်မှုထမ်းဥပဒေကို ဆန့်ကျင်ကြောင်း ဆန္ဒဖော်ထုတ်ခဲ့ပါတယ်။
Public Service Announcement
ဆားလင်းကြီးမြို့ပေါ်မှာလည်း လက်ပံတောင်းတောင်ပင်မသပိတ်နဲ့ ဆားလင်းကြီးလက်ရုံးတပ်တို့ ပူးပေါင်းကာ “ပြည်သူ့ရင်ခွင်ခိုလှုံမလား အာဏာရူးအတွက်အသက်ပေးမလား” စာတန်းဖြင့် ဆန္ဒပြခဲ့ကြပါတယ်။
ဆားလင်းကြီးမြို့နယ် ကျေးရွာတစ်ရွာမှာလည်း လက်ပံတောင်းတောင်ဒေသ သပိတ်အင်အားစုက ၁ဝ၂၇ ဒုတိယလှိုင်းကို ထောက်ခံကြိုဆိုကြောင်းနဲ့ ၁ဝ၂၇ လှိုင်းဟာ ပြည်သူလူထုရဲ့ အနာဂတ်၊ မျှော်လင့်ချက်ဖြစ်ကြောင်း “၁၀၂၇ second wave is our future” စာသားကိုင်ဆောင်ပြီး သပိတ်ပြုလုပ်ခဲ့ပါတယ်။
ဆားလင်းကြီးမြို့နယ်မှာလည်း အားမာန်သစ်သပိတ်စစ်ကြောင်းက စစ်အကြမ်းဖက်အုပ်စုရဲ့ ရက်ရက်စက်စက် မီးရှို့သတ်ဖြတ်ခြင်းခံရတဲ့ ရဲဘော် ၁၀ဦး ကျဆုံးခြင်း ၂ နှစ်၊ ၉လပြည့် ဝမ်းနည်းခြင်း အခမ်းအနား ကျင်းပခဲ့ပါတယ်။
ဓာတ်ပုံ – ရွာပေါင်းစုံသပိတ်၊ အောင်လံလွှင့်မည်ဒေါင်းသွေးနီသပိတ်၊ လက်ပံတောင်းသပိတ်
