မိထက်/People’s Spring
ဖားကန့်၊ ဆိုင်းတောင်ကျေးရွာတွင်ယနေ့(စက်တင်ဘာလ ၈ရက်)ညနေ ၃နာရီခွဲမှစ၍စစ်ကောင်စီတပ်နှင့်ကချင်လွတ်လပ်ရေးတပ်မတော်(KIA) ၊ KPDF ပူးပေါင်းတပ်များ တိုက်ပွဲဖြစ်ပွားနေသည်။
ဆိုင်းတောင်ရွာရှိ ဟိုတယ်တစ်ခုကို စစ်ကောင်စီက စက်တင်ဘာလ ၆ရက်ညတွင် ဝင်ရောက်စီးနင်းခဲ့ပြီး ဟိုတယ်ဝန်ထမ်းများအပါအဝင် အရပ်သားများကိုဖမ်းဆီးထားခဲ့သည်။ ဖမ်းဆီးထားသူများကိုပြန်လွှတ်ပေးရေး KIA က ညှိနှိုင်းခဲ့သော်လည်း မရ၍ တိုက်ပွဲဖြစ်ပွားခြင်းဟုဒေသခံများကပြောသည်။
Public Service Announcement
“တိုက်ပွဲကအနီးကပ်ဖြစ်ပွားနေတာပါ။ပစ်ခတ်သံတွေဆူညံနေပြီးတော့ပြင်းထန်ပါတယ်” ဟု ဒေသခံတဦးကပြောသည်။
ယခုသတင်းရေးသားနေချိန် ညနေ ၄နာရီခန့်အထိ တိုက်ပွဲဖြစ်ပွားနေပြီး ဒေသခံများ ဘေးလွတ်ရာသို့ထွက်ပြေးတိမ်း ရှောင်နေကြသည်။နေအိမ်များအတွင်းပုန်းခိုနေသူများ နှင့် တိုက်ပွဲနေရာအနီး ပိတ်မိနေသူများလည်းရှိကြောင်းသိရသည်။ စစ်ကောင်စီက ဟိုတယ်အားစီးနင်းနင်းမှု၌ ဖမ်းဆီးထားသူအရေအတွက်ကိုမသိရှိရသေးပေ။
“ညီမရဲ့ အစ်မလည်း ဟိုတယ်မှာ အလုပ်လုပ်နေတာ။ ပိတ်မိနေလို့ စိတ်ပူနေရပြီ” ဟု ဖားကန့်ဒေသခံတဦးကပြောသည်။
တိုက်ပွဲဖြစ်ရာနေရာသို့ စစ်ကောင်စီက လက်နက်ကြီးများဖြင့်ရမ်းသမ်းပစ်ခတ်မည်ကို ဒေသခံများကစိုးရိမ်နေသည်။ ဖားကန့်တွင် ဩဂုတ်လ ၆ရက် ၁၀နာရီခန့်၌ကလည်းစစ်ကောင်စီ၏လက်နက်ကြီး ပစ်ခတ်မှုကြောင့်လမ်းသွားလမ်းလာနှစ်ဦးသေဆုံးခဲ့သည်။
