ဟန်နွေ/People’s Spring
ကချင်ပြည်နယ် ဖားကန့်မြို့ ဆိုင်းတောင်တွင် တိုက်ပွဲသုံးရက်ဆက်ပြင်းထန်ခဲ့ကြောင်း ကချင်လွတ်လပ်ရေးတပ်မတော်(KIA)သတင်းပြန်ကြားရေးဌာနက ဖော်ပြသည်။
ဖားကန့်မြို့နယ် ဆိုင်းတောင်တွင် စက်တင်ဘာ ၇ရက်ကစတင်ပြီး KIA ပူးပေါင်းတပ်က ထိုးစစ်ဆင် တိုက်ခိုက်ခဲ့၍ တိုက်ပွဲဖြစ်ပွားနေခဲ့ခြင်းဖြစ်သည်။
စက်တင်ဘာ ၉ရက်အထိ KIA ပူးပေါင်းတပ်နှင့် စစ်ကောင်စီတို့ အပြန်အလှန်တိုက်ခိုက်မှု ဖြစ်ပြီး တိုက်ပွဲပြင်းထန်နေကြောင်း၊ KIA ပူးပေါင်းတပ်က ထိုးစစ်ဆင် တိုက်ခိုက်နေခြင်းဖြစ်ကြောင်း KIAက ဖော်ပြသည်။
Public Service Announcement
စက်တင်ဘာ ၉ရက်အထိ ဆိုင်းတောင် ရဲစခန်းကို ဆက်လက်တိုက်ခိုက်နေဆဲဖြစ်သည်ဟုလည်း အသိပေးသည်။ တိုက်ပွဲအတွင်း နှစ်ဖက်ထိခိုက်ကျဆုံး အခြေအနေများကို ဖော်ပြထားခြင်းမရှိပေ။
ဒေသခံအချို့က တိုက်ပွဲဖြစ်ပွားမှု ရုပ်သံမှတ်တမ်းများကိုဖော်ပြရာ လက်နက်ငယ်ပစ်ခတ်မှု၊ လက်နက်ကြီး ပစ်ခတ်မှု အသံများကိုကြားရသည်။ ထို့ပြင် ဆိုင်းတောင်ဒေသခံများ ဘေးလွတ်ရာ ရှောင်တိမ်းနေကြရသည်ဟုဆိုသည်။
စစ်ကောင်စီဘက်က ပြည်သူများကို မြို့အတွင်း ပိတ်ဆို့ခြင်း၊ ဖမ်းဆီးခြင်း ပြုလုပ်ခဲ့ခြင်းသာမက လက်နက်ကြီးများဖြင့် ပစ်ခတ်၍ ပြည်သူလူထုထိခိုက်မှု၊ နေအိမ်ထိခိုက်မှုများ ရှိခဲ့ကြောင်း KIAက အသိပေးသည်။
စစ်ကောင်စီသည် စက်တင်ဘာ ၇ရက်တွင် ဖမ်းဆီးခဲ့သည့် ပြည်သူများအား ယမန်နေ့တွင် ပြန်လွှတ်ပေးခဲ့သည်ဟု ဒေသခံအချို့က အသိပေးထားသကဲ့သို့ KIA သတင်းပြန်ကြားရေးကလည်း ဖော်ပြခဲ့သည်။
ဆိုင်းတောင်ရှိ ဟိုတယ်တစ်ခု၌ စစ်ကောင်စီ ဖမ်းထားသည့် ပြည်သူ ၂၀၀ကျော် ယမန်နေ့တွင် ပြန်လွှတ်ပေးခဲ့သော်လည်း အချို့ကို PDFဟု စွပ်စွဲကာ စစ်ကောင်စီက ပစ်သတ်ခဲ့ကြောင်း သတင်းများထွက်ပေါ်နေသည်။
