အင်ကြင်း/People’s Spring
မန္တလေးမြို့၊ ချမ်းမြသာစည်မြို့နယ်၌ စစ်ကောင်စီတပ်အသိုင်းအဝိုင်းအများစုနေထိုင်သည့် ဗိုလ်ချုပ်ရွာရပ်ကွက်ရှိ ချောင်ချောင်ရွှေဆိုင်ပိုင်ရှင်နေအိမ် ဓားပြတိုက်ခံရပြီး ရွှေထည်ပစ္စည်းများ ပါသွားကြောင်း သတင်းရရှိသည်။
ယနေ့(စက်တင်ဘာ ၁၀ရက်) နံနက် ၈နာရီခန့်က မန္တလေးမြို့ ၊ချမ်းမြသာစည်မြို့နယ်၊ ဗိုလ်ချုပ်ရွာရပ်ကွက်၊ ၁၀၁ ဘီလမ်းနှင့် ၇၁ လမ်းရှိ ချောင်ချောင်ရွှေဆိုင်ပိုင်ရှင်သည် ဆိုင်သွားဖွင့်ရန် နေအိမ်မှ ရွှေထည်ပစ္စည်းများအား ကားပေါ်သယ်နေစဉ် သေနတ်နှင့် ဓါးများကိုင်ဆောင်လာသော မျက်နှာဖုံးစွပ်လူ ခုနစ်ဦးက AD Vanကားတစ်စီးဖြင့် ရောက်ရှိလာပြီး ခြံတံခါးအားတွန်းဖွင့်ဝင်ရောက်ကာ ရွှေထည်များအား လုယက်ယူဆောင်သွားခြင်းဖြစ်ကြောင်း၊ ရွှေများထည့်ထားသည့် ခြင်းများပါသွားကြောင်း အဆိုပါရွှေဆိုင်ပိုင်ရှင့်နှင့် နီးစပ်သူများက ပြောသည်။
https://www.facebook.com/LuduNwayOo/videos/523573173553443
Public Service Announcement
“ပိုင်ရှင်က ဆိုင် သုံးဆိုင်ပိုင်တယ် ပြောတယ်။ မင်္ဂလာဈေးဘက်မှာ တစ်ဆိုင်ရှိတယ် ပြောတယ်။ အခုလုပ်ခံရတာ အဲ့ဆိုင်ဖွင့်ဖို့ပြင်နေတုန်း လုပ်ခံရတယ်ပြောတယ်။ သူတို့အချင်းချင်းပြန်လိုက်နေတယ် ပြောတယ်။”ဟု Voice Of Mandalay အဖွဲ့ဝင်တစ်ဦးက ပြောသည်။
ဆုံးရှုံးသွားသည့် ရွှေထည်ပစ္စည်းပမာဏအား မသိရသေးပေ။ သို့သော် စစ်ကောင်စီဝါဒဖြန့် ချန်နယ်များကမူ ရွှေဆယ်ပိဿပါသွားသည်ဟု ဖော်ပြနေသည်။
အဆိုပါဓါးပြတိုက်ခံရသည့်နေရာသည် မန္တလေးမြို့၌ သူဌေးများ၊ စစ်ကောင်စီတပ်အသိုင်းအဝိုင်းအများစု နေထိုင်သည့်ရပ်ကွက်ဖြစ်ပြီး ဗိုလ်ချုပ်ရွာဟု လူသိများသည့်နေရာဖြစ်သည်။
မန္တလေးမြို့တွင် စစ်တပ်အာဏာသိမ်းပြီးနောက် ဓါးပြတိုက်လုယက်မှုများ မကြာခဏဖြစ်ပွားနေပြီး ယခုနှစ်အတွင် မန်းမြို့စျေးရှိ ဆယ်သန်းရွှေဆိုင်သည် ဇန်နဝါရီနှင့် မေလကနှစ်ကြိမ် ဓါးပြတိုက်ခံခဲ့ရသည်။
၂၀၂၃အတွင်းကလည်း မန္တလေးမြို့ရှိ ထက်ဝေယံရွှေဆိုင်၊ ပေါ်ဦးရွှေဆိုင် ဓားပြတိုက်ခံရသေးသည်။
