နေပြည်တော်ရေ‌‌ဘေးအတွင်း သစ်ပင်ပေါ် နာရီ၂၀နီးပါးနေခဲ့ရသူ လူ၃၀ကျော်ကို လူမှုကူညီရေးအဖွဲ့ကယ်ဆယ်

မိထက်/People’s Spring

နေပြည်တော် ပျဥ်းမနားမြို့နယ် ရေ‌‌ဘေးအတွင်း သစ်ပင်ပေါ် နာရီ၂၀နီးပါး တွဲခိုနေခဲ့ရသည့် ကလေးငယ်အချို့အပါအဝင် လူ ၃၄ ဦးကို လူမှုကူညီရေးအဖွဲ့တစ်ဖွဲ့က ယနေ့နံနက်ပိုင်းတွင် ကယ်ဆယ်နိုင်ခဲ့သည်။

လူ ၃၅ဦးသည် သစ်ပင်အချို့ပေါ်၌ ယမန်နေ့ (စက်တင်ဘာ ၁၁ရက်) နေ့လည်ကတည်းက တက်၍ ရေဘေးတိမ်းရှောင်နေရခြင်းဖြစ်သည်။

အဆိုပါနေရာသို့ လူမှုကူညီ‌ရေးအဖွဲ့တစ်ဖွဲ့က ယနေ့နံနက် ၁၁ နာရီကျော်တွင် သွားရောက်နိုင်ခဲ့ပြီး ကယ်ဆယ်နိုင်ခဲ့ခြင်းဟု သိရသည်။ ၃၅ဦးအနက်တစ်ဦးသည် သေဆုံးနေ၍ ရုပ်အလောင်းကိုသာ ပြန်လည်ရရှိခဲ့သည်ဟု သတင်းရရှိသည်။

Public Service Announcement

ယခုကယ်ဆယ်နိုင်ခဲ့သူများတွင် ကလေးငယ် အချို့နှင့် အမျိုးသမီးအချို့ပါဝင်ပြီး ၎င်းတို့သည် ကျေးရွာအနီးရှိ သစ်ပင်ပေါ်၌ နာရီ၂၀နီးပါး နေခဲ့ကြရသည်။

တစ်ညလုံး ဘာမှမစားခဲ့ကြရသလို စိုးရိမ် ထိတ်လန့်နေကြပြီး ကျန်းမာရေးအတွက် စိုးရိမ်စရာမရှိကြောင်း သိရသည်။

စစ်ကောင်စီထိန်းချုပ်ထားသည့် နေပြည်တော် တွင် ယမန်နေ့(စက်တင်ဘာ ၁၁ရက်)နံနက်မှစ၍ ရေဘေးကြုံတွေ့ခဲ့ရပြီး ဇေယျာသိရိ၊ပုဗ္ဗသိရိ၊ တပ်ကုန်း၊ပျဉ်းမနားမြို့နယ်တို့မှ ကျေးရွာပေါင်း ၅၀ထက်မနည်း ဆိုးဆိုးရွားရွားနေကြီးနေကြောင်း ဒေသခံများက ပြောသည်။

ရေစီးအတွင်း အိမ်နှင့်အတူ မျောပါသွားသူအချို့၊ သစ်ပင်ပေါ်တက်၍ တိမ်းရှောင်ရင်း ပြုတ်ကျသေဆုံးမှုအချို့၊ ကယ်ဆယ်ရေးစက်လှေပေါ်မှာပြုတ်ကျသေဆုံးသူအချို့ရှိနေသည်ဟု ကိုယ်တိုင်ရေဘေးကြုံသူများက ပြောသည်။

ယနေ့နံနက်ပိုင်းတွင် ရေအနည်းငယ်ပြန်ကျသည့်နေရာများရှိနေသော်လည်း

နေအိမ်များအတွင်း ပိတ်မိနေ၍ အရေးပေါ်လာရောက်ကယ်ဆယ်ရန်အကူအညီတောင်းခံမှုများလည်းရှိနေဆဲ ဖြစ်သည်။

ရေဘေးကြောင့်သေဆုံးသူ စာရင်းကို လတ်တလော မသိရှိနိုင်သေးဘဲ။ စစ်ကောင်စီကတရားဝင်သတင်းမထုတ်ပြန်သေးသလို ရေဘေးကယ်ဆယ်ရေးတွင် ထိထိရောက်ရောက် လုပ်ဆောင်ခြင်းမရှိဟု ဒေသခံများက ဆိုသည်။