မိထက်/People’s Spring
တာချီလိတ်မြို့ရှိ ရေဘေးသင့်သူများကို ထိုင်းတော်ဝင်လေတပ်က ရဟတ်ယာဉ်ဖြင့် ယနေ့ (စက်တင်ဘာ ၁၂ ရက်)တွင် အစားအသောက်များချပေးသည်ဟု မြို့ခံအချို့ကပြောသည်။
ထိုင်းနိုင်ငံနှင့် နယ်စပ်ဖြစ်ပြီး မယ်ဆိုင်ချောင်းဘေး တာချီလိတ်မြို့၊တာလော့ရပ်ကွက်အတွင်း ရေကြီးပြီးပိတ်မိနေသော နေအိမ်အချို့ပေါ်သို့ ထိုင်းတော်ဝင်လေတပ်က ရဟတ်ယာဉ်ဖြင့်အရေးပေါ်ကယ်ဆယ်ရေးပစ္စည်းများဖြစ်သောအစားအစာနှင့်ရေသန့်ဘူးများ လာရောက်ချပေးခြင်းဟု မြို့ခံတဦးကပြောသည်။
” ဟုတ်တယ်ဗျ။ ထိုင်းတပ်မတော်က ချပေးတာ။ ဒီနေ့ခင်းပဲ” ဟု မြို့ခံတဦးက ပြောသည်။
Public Service Announcement
ထိုင်းတော်ဝင်လေတပ်က မြန်မာဘက်ရှိ တိုက်အိမ်ခေါင်မှုတစ်ခုပေါ်သို့ ရဟတ်ယာဉ်ဖြင့် အစားအသောက်များချပေးနေသည့် ရုပ်သံမှတ်တမ်းသည် လူမှုကွန်ရက်၌ပျံ့နှံ့နေသည်။
အဆိုပါရုပ်သံမှတ်တမ်းတွင် မြန်မာဘက်၌ ရေဘေးသင့်ပြီး ပိတ်မိနေသော ပြည်သူများကို ထိုင်းတပ်မတော်က အစားအစာများ၊ရေဗူးများ ချထားပေးနေကြောင်း ဒေသခံတဦးကလည်း ပြောထားသည်။
ထိုင်းတော်ဝင်လေတပ်က ယင်းကဲ့သို့ ကူညီမှု ၊အိမ်ထောင်စုနှင့်လူဦးရေမည်မျှကို ကူညီပေးခြင်းစသော အခြေအနေများနှင့်ပတ်သက်၍မူ သီးခြားအတည်ပြုနိုင်ခြင်းမရှိသေးပေ။
တာချီလိတ်မြို့တွင် စက်တင်ဘာလ ၁၀ရက်မှစတင်တင်၍ ရေကြီးနစ်မြုပ်မှုဆိုးရွားစွာဖြစ်ခဲ့ပြီး မြို့ပေါ်ရပ်ကွက်များနှင့်ကျေးရွာများ ရေနစ်မြုပ်ခဲ့သည်။ အိမ်အလုံးလိုက်ပြိုကျပျက်စီးမှုများရှိခဲ့ပြီး လူသေဆုံးမှုအချို့လည်းရှိခဲ့သည်။ တာချီလေးမြို့အဝင်တံတားလည်း ကျိုးကျခဲ့ပြီး မြို့တွင်းလမ်းများ ဆိုးရွားစွာပျက်စီးခဲ့သည်။ ရေဘေးကြောင့်လူသေဆုံးမှုများရှိသော်လည်း မည်မျှသေဆုံးထိခိုက်မှုရှိကြောင်းစာရင်း အတိအကျမသိရှိရသေးပေ။
ရေဘေးသင့်သူများကိုစစ်ကောင်စီက ကယ်ဆယ်ရေး အနည်းငယ်သာလုပ်ခဲ့ကြောင်း မြို့ခံအချို့ကပြောသည်။စက်တင်ဘာ ၁၂ ရက်တွင် မိုးအား
လျော့ကျသွားပြီးနောက် မြို့ပေါ်မှရေများလည်း ပြန်လည်ကျဆင်းသွားပြီဟု ဒေသခံများကပြောသည်။
တာချီလိတ်မြို့နှင့်နယ်စပ်ဖြစ်သော ထိုင်းနိုင်ငံ၊ချင်းရိုင်ခရိုင် နှင့် ချင်းမိုင် ခရိုင်တွင်လည်း ရေဘေးကြုံတွေ့ခဲ့ပြီး ထိုင်းဘုရင့်တပ်မတော်ကရေကြီးပြီးအိမ်များ၌ပိတ်မိနေသူများကို ရဟတ်ယာဉ်များဖြင့် အစားအစာများချပေးခဲ့ပြီး တိမ်းရှောင်ရန်လိုအပ်သူများကို ဘေးလွတ်ရာသို့ရွှေ့ပြောင်းပေးခဲ့သည်။ ထိုင်းနိုင်ငံတွင် စစ်တပ်က ရဟတ်ယာဥ်များဖြင့် ရေဘေးကြုံနေသောထိုင်းပြည်သူများကို ကယ်ဆယ် ကူညီနေသော်လည်း စစ်ကောင်စီ ကမူ ရဟတ်ယာဥ်ကို ပြည်သူများအားကူညီသည့်နေရာတွင်မသုံးဘဲ တိုက်ခိုက်သတ်ဖြတ်သောနေရာတွင်သာအသုံးပြုသဖြင့် နှိုင်းယှဥ်၍ စစ်ကောင်စီကိုဝေဖန်ပြစ်တင်နေကြသည်။
