မြဝတီ လေးကေ့ကော်ကို စစ်ကောင်စီ ဗုံးကြဲ

နိုင်ပကောင်း/People’s Spring

ကရင်ပြည်နယ်၊ မြဝတီမြို့တောင်ဘက်က လေးကေ့ကော်မြို့သစ်ဘက်ကို မနေ့ စက်တင်ဘာလ ၁၃ ရက် ညပိုင်းက စစ်ကောင်စီလေတပ်က ဗုံးကြဲတိုက်ခိုက်ခဲ့တယ်လို့ နယ်စပ်မှာရှိတဲ့ သတင်းရင်းမြစ် ထံကရပါတယ်။

မနေ့ညပိုင်း ၇ နာရီခွဲအချိန်ခန့်က ဗုံးကြဲတိုက်ခိုက်တာဖြစ်ပြီး ပေါက်ကွဲသံတွေကို မြဝတီတဖက်ကမ်း ထိုင်းဘက်ခြမ်း မဲဆောက်မြို့ကနေ ကြားနေရတယ်လို့ အဲဒီနယ်စပ် သတင်းရင်းမြစ်က အသိပေးပါတယ်။

Public Service Announcement

လေးကေ့ကော်မြို့သစ်နယ်မြေထဲမှာ နောက်ဆုံးလက်ကျန်ဖြစ်တဲ့ စစ်ကောင်စီတပ်ရဲ့ စွယ်တော်ကုန်း အမြှောက်စခန်းကို KNU နဲ့ ပူးပေါင်းတပ်တွေက ဝန်းရံပိတ်ဆို့တိုက်ခိုက်နေတာဖြစ်ပြီး စခန်း လက်မလွှတ်ရဖို့ စစ်ကောင်စီက လေကြောင်းကနေ တိုက်ခိုက်လာတာလည်းဖြစ်ပါတယ်။

သတင်းရင်းမြစ်ရဲ့ ပြောပြချက်အရ မနေ့ညပိုင်းက အပေါ့စားထောက်ပို့လေယာဉ် Y -12 ကိုသုံးပြီး လေးကေ့ကော်ကို စစ်ကောင်စီလေတပ်က ဗုံးကြဲခဲ့တာလို့သိရပါတယ်။

စွယ်တော်ကုန်းစခန်းကို ရဖို့ KNU နဲ့ ပူးပေါင်းတပ်တွေက လနဲ့ချီကြာအောင် ဝန်းရံပိတ်ဆို့တိုက်ခိုက်နေတာပါ။

အဲဒီစခန်းဟာ မြဝတီမြို့ဆီ ဦးတည်စစ်ကြောင်းထိုးခဲ့တဲ့ အောင်ဇေယျစစ်ကြောင်းကို လက်နက်ကြီးပစ်ကူပေးခဲ့သလို မြဝတီမြို့နဲ့ဆိုရင်လည်း လက်တစ်ကမ်းအကွာမှာရှိတာကြောင့် မြဝတီကိုလည်းစိုးမိုးထားတဲ့ စခန်းဖြစ်ပါတယ်။