ရဲခေါင်/People’s Spring
ရေဘေးကြောင့် လူဦးရေ သုံးသောင်းခန့် အတွက် အရေးပေါ်အကူအညီများလိုအပ်နေကြောင်း ကရင်နီပြည် ကြားကာလအုပ်ချုပ်ရေးကောင်စီ IEC က ယနေ့(စက်တင်ဘာ ၁၄ရက်) ကြေညာသည်။
ကရင်နီပြည်အတွင်း ရေဘေးသင့်ပြည်သူများအတွက် အရေးပေါ်အကူအညီများ ပေးဆောင်နိုင်ရန် ပန်ကြားဖိတ်ခေါ်ခြင်းလည်း ဖြစ်သည်။
Public Service Announcement
စက်တင်ဘာ ၉ ရက်မှစ၍ ကရင်နီပြည်နယ်၌ ယခုသီတင်းပတ်အတွင်း မိုးအဆက်မပြတ်ရွာသွန်းမှုကြောင့် ရေကြီးရေလျှံမှုနှင့် မြေပြိုမှုဘေးကို ဖယ်ခုံ၊ လွိုင်ကော်၊ ဒီးမော့ဆို၊ ဖရူဆို နှင့်ရှားတောမြို့နယ်တို့တွင် ကြုံတွေ့နေရသည်ဟု ဆိုသည်။
ထိုအခြေအနေတွင် IEC က လူသားချင်းစာနာထောက်ထားခြင်းနှင့် ပြန်လည်ထူထောင်ရေးဌာနမှ အရေးပေါ် ကူညီကယ်ဆယ်ရေး လုပ်ငန်းများကို သက်ဆိုင်ရာပါဝင်ပတ်သက်သူများ နှင့် ချိတ်ဆက်၍ ပူးပေါင်းဆောင်ရွက်နေကြောင်း အသိပေးသည်။
“အရေးပေါ်စားနပ်ရိက္ခာ အဝတ်အစား၊ ဆေးဝါး နဲ့ ထိခိုက်နစ်နာသူတွေအသေးသုံးနိုင်ဖို့ ငွေသားလိုအပ်ပါတယ်။ ရေထဲပါသွားတဲ့စစ်ရှောင်တဲတွေဆိုရင် ဘာမှမကျန်တော့တဲ့အခြေအနေမှာရှိနေပါတယ်”ဟု ကရင်နီပြည်နယ်မှ ရေဘေးသင့် ပြည်သူများအားကူညီနေသည့် ကိုအားသိုက်က လူထုနွေဦးသို့ ပြောသည်။
ရေဘေးနှင့်မြေပြိုမှုကြောင့် အထက်ပါမြို့နယ်ငါးခုမှ အိမ်ထောင်စု ၅,၇၄၇ ခု မှ လူဦးရေ ၂၈,၇၃၅ ဦးရှိကာ အခြေခံစားနပ်ရိက္ခာများဖြစ်သည့် ဆန်၊ဆီ၊ဆား၊ပဲ များနှင့် တစ်ကိုယ်ရေသုံးပစ္စည်း ဆပ် ရပြာ၊သွားတိုက်ဆေး၊ သွားတိုက်တံ၊ အဝတ်အထည်၊ အမျိုးသမီးအသုံး အဆောင်များနှင့် သောက်ရေသန့်များလိုအပ်နေသည်ဟု ဆိုသည်။
ထို့အပြင် လတ်တလောယာယီရွှေ့ပြောင်းနေထိုင်ရသည့် အိမ်ထောင်စု ၅,၇၄၇ ခုအတွက်အရေးပေါ်တဲဆောက်နေထိုင်ရန် ဝါး၊မိုးကာ နှင့် သွပ်ကြိုးများ ကူညီပေးရန် ဖိတ်ခေါ်ထားသည်။
ကရင်နီပြည်နယ်၌ ရေဘေးနှင့်မြေပြိုမှုကြောင့် စက်တင်ဘာ ၁၃ ရက်အထိ စာရင်းအရ သေဆုံးသူ ၂၄ ဦးရှိပြီး ဒဏ်ရာရှိသူများလည်းရှိနေသည်။
