ဝမ်းတွင်းမြို့နယ်တွင် ရေစီးဖြင့်မျောပါသေဆုံးခဲ့သည့် ကလေးငယ်နှစ်ဦး၏ ရုပ်အလောင်းတွေ့ရှိ

အင်ကြင်း/People’s Spring

မန္တလေးတိုင်း၊ ဝမ်းတွင်းမြို့နယ်၊ ရိုးစုံကျေးရွာတွင် ရေစီးဖြင့်မျောပါသေဆုံးခဲ့သည့် ကလေးငယ်နှစ်ဦး၏ ရုပ်အလောင်းများအား ပြန်လည်တွေ့ရှိခဲ့သည်။

ယမန်နေ့ (စက်တင်ဘာ ၁၆ရက်)က ဝမ်းတွင်းမြို့နယ်၊ ရိုးစုံရွာတွင် (၄)နှစ်အရွယ် မိန်းကလေးတစ်ဦးနှင့် (၅)နှစ်အရွယ် ယောက်ျားလေးတစ်ဦးတို့၏ ရုပ်အလောင်းများအား တွေ့ရှိခဲ့ကြောင်း ဒေသခံများက ပြောသည်။

Public Service Announcement

သေဆုံးသူ မိန်းကလေးမှာ မိသားစုဝင် ၆ ဦးလုံး ရေထဲမျောပါခဲ့ပြီးနောက် မိခင်တစ်ယောက်သာ အသက်ရှင်ကြောင်း၊ ၎င်းအပါအဝင် မောင်နှမ သုံးဦး၏ ရုပ်အလောင်းများသာ ရှာဖွေတွေ့ရှိထားပြီး ဖခင်နှင့် သားအကြီးဆုံးအား ရှာမတွေ့သေးကြောင်း ကူညီ​နေသူများက ပြောသည်။

“၁၁ရက်နေ့ကပဲ သေတာ။ မအေကတော့မသေဘူး။ မိခင်က ကလေးကို လှမ်း​ဆွဲသေးတယ်။ အင်္ကျီမိခင်လက်ထဲပါလာပြီး ကလေးကလွတ် သွားတာ။ သားအဖတွေ တခါတည်းပါသွားတာ” ဟု ဒေသခံတစ်ဦးက ပြောသည်။

ရေကြီး၊ရေလျှံမှုဖြစ်သည့်ဒေသများတွင် သက်ကြီးရွယ်အိုများ၊ ကလေးသူငယ်များ ရေထဲမျောပါပျောက်ဆုံးမှုများရှိနေပြီး တစ်ပတ်ကြာသည်အထိ ရှာမတွေ့သေးကြောင်း သိရသည်။

စက်တင်ဘာ ၁၁ ရက်ဝန်းကျင်မှစ၍ နေပြည်တော်တဝိုက်၊ ရမည်းသင်း၊ ပျော်ဘွယ်၊ သာစည်၊ ဝမ်းတွင်း၊ ကျောက်ဆည်၊ ကူမဲ၊ မြစ်သား၊ တံတားဦးမြို့နယ်များတွင် ရေကြီးရေလျှံမှုများ ဖြစ်ပွားခဲ့ပြီး ပြည်သူသိန်းချီရေဘေးသင့်ကာ သေဆုံးသူ ရာဂဏန်းခန့်ရှိနေသည်။ ထို့အပြင် ကယ်ဆယ်ရေးလုပ်ငန်းများ၊ စားနပ်ရိက္ခာလိုအပ်ချက်များလည်း ရှိနေကြောင်း ဒေသခံများက ပြောသည်။