ဟန်နွေ/People’s Spring
ကချင်ပြည်နယ် ဖားကန့်မြို့နယ် ဆိုင်းတောင် တွင် စက်တင်ဘာ ၁၇ရက်အထိ တိုက်ပွဲများ ပြင်းထန်နေပြီး စစ်ကောင်စီတပ်က ပြည်သူလူထု နေအိမ်များ မီးရှို့ဖျက်ဆီးမှု ဆက်တိုက်ပြုလုပ် နေကြောင်း ကချင်လွတ်လပ်ရေးတပ်မတော် (KIA)သတင်းပြန်ကြားရေးဌာနက အသိပေးသည်။
ဆိုင်းတောင်ဒေသတွင် စစ်ကောင်စီတပ်ကို KIAက စက်တင်ဘာ ၇ရက်တွင် စတင်တိုက်ခိုက်ခဲ့ရာ ဆိုင်းတောင် ရဲစခန်းကိုသိမ်းပိုက်ခဲ့သည့် စက်တင်ဘာ ၁၂ရက်မှစ၍ စစ်ကောင်စီက ပြည်သူလူထုနေအိမ်များကို မီးရှို့ဖျက်ဆီးလျက်ရှိရာ စက်တင်ဘာ ၁၇ရက်အထိ ဆက်လက်၍ မီးရှို့နေဆဲဖြစ်သည်ဟု KIA၏ သတင်းပြန်ကြားရေးဌာနက ဖော်ပြသည်။
လေကြောင်းတိုက်ခိုက်ခြင်း၊ ဖားကန့်မြို့ တပ်မကုန်းမှ လက်နက်ကြီးများ ပစ်ခတ်ခြင်းကြောင့် ပြည်သူအချို့ သေဆုံးထိခိုက်ခဲ့ပြီး ယမန်နေ့တွင်လည်း ဖားကန့် ၊ ဆိုင်းတောင် တာဝါတိုင်အနီး စစ်ကောင်စီနှင့် KIA ပူးပေါင်းတပ်တို့ တိုက်ပွဲပြင်းထန်ခဲ့သည်ဟု ဆိုသည်။
Public Service Announcement
ထို့ပြင် မိုးမော်-ဗန်းမော်လည်း KIAနှင့် စစ်ကောင်စီတို့ တိုက်ပွဲပြင်းထန်နေသည့် နေရာများ၌ စစ်ကောင်စီတပ်က စက်တင်ဘာ ၁၇ရက် မနက်တွင် လေယာဉ်ဖြင့် ဗုံးကြဲတိုက်ခိုက်ခဲ့သည် ဟု KIAက အသိပေးသည်။
လေကြောင်းတိုက်ခိုက်မှုကြောင့် ထိခိုက်မှု အခြေအနေကို စုံးစမ်းနေဆဲဖြစ်သည်ဟုဆိုသည်။
စစ်ကောင်စီများသည် ဗန်းမော်- မိုးမောက် ဘက်သို့ စစ်အင်အားတိုးချဲ့ပြီး ထိုးစစ်ဆင် တက်လာရာ KIA ပူးပေါင်းတပ်က ခုခံတိုက်ခိုက်ခဲ့၍ တိုက်ပွဲပြင်းထန်နေကြောင်း KIAက အသိပေးခဲ့သော်လည်း တိုက်ပွဲဖြစ်ပွားမှုနေရာနှင့် အသေးစိတ်အချက်အလက်များ ဖော်ပြခဲ့ခြင်းမရှိပေ။
စစ်ကောင်စီတပ်သည် ဗန်းမော်ဘက်မှ လက်နက်ကြီး ရမ်းသမ်းပစ်ခတ်ခြင်း၊ လေယာဉ်ဖြင့် ဗုံးကြဲတိုက်ခိုက်မှုများပြုလုပ်ခြင်းတို့ကြောင့် ပြည်သူလူထု နေအိမ်များထိခိုက်ပျက်စီးမှုရှိဟုလည်း အသိပေးသည်။
KIAက မိုးမောက်မြို့နယ် ခမရ(၄၃၇)ကို အပြီးသတ်သိမ်းပိုက်ပြီးနောက် စစ်ကောင်စီတပ်သည် အဆိုပါ တပ်စခန်း အပါအဝင် ဆုံးရှုံးနယ်မြေများပြန်ရရေးအကြိမ်ကြိမ်ထိုးစစ်ဆင်လာနေ၍ တိုက်ပွဲများ ဖြစ်ပွားနေခြင်းဖြစ်သည်။
တစ်ဖက်တွင်လည်း ဗန်းမော်မြို့သို့ စစ်အင်အားနှင့် လက်နက်ခဲယမ်း ဖြည့်တင်းရန် ကြိုးပမ်းနေသည့် စစ်ကောင်စီတပ်က ရေလမ်းမှတဆင့် စစ်အင်အားဖြည့်တင်းရန် ဆောင်ရွက်လျက်ရှိရာ ယမန်နေ့ စက်တင်ဘာ ၁၇ရက်တွင် ရွှေကူမြို့အနီး၌ KIA၏ တိုက်ခိုက်မှုကြောင့် ရေယာဉ် ၅စီးပါ ရေယာဉ်များအနက် ၂စီး ထိခိုက်ခဲ့သည်ဟု ကချင်သတင်းရင်းမြစ်က ပြောထားသည်။
