ဟန်နွေ/People’s Spring
ချင်းပြည်နယ် မင်းတပ်မြို့ပေါ် တစ်နေရာကို စစ်ကောင်စီတပ်က လေကြောင်းမှ ဗုံးကြဲတိုက်ခိုက်မှု ထပ်မံပြုလုပ်ခဲ့ကြောင်း မင်းတပ်ဒေသသတင်းရင်းမြစ်က ပြောသည်။
စစ်ကောင်စီတပ်သည် ဩဂုတ်နှင့် ယခုစက်တင်ဘာအတွင်း မင်းတပ်မြို့ကို လေကြောင်း ဗုံးကြဲတိုက်ခိုက်မှုများ မကြာခဏ လုပ်ဆောင်လျက်ရှိရာ စက်တင်ဘာ ၁၆ရက် ည ၇နာရီခန့်တွင် တိုက်လေယာဉ် ၂စီးဖြင့် ပေါင် ၅၀၀ ဗုံးနှင့် ဗုံးအသေးများ ကြဲချတိုက်ခိုက်ခဲ့သည်ဟု ဆိုသည်။
အဆိုပါ လေကြောင်း တိုက်ခိုက်မှုကြောင့် လူထိခိုက်သေဆုံးရှိ၊မရှိကို မသိရသေးဟု သတင်းရင်းမြစ်က ယနေ့တွင် ပြောသည်။
Public Service Announcement
“နေအိမ်အချို့ ပျက်တာပဲ သိရတယ်”ဟု မင်းတပ်ဒေသခံက ပြောသည်။ မင်းတပ်ဒေသ၌ မကြာမီ စစ်ရေးထူးခြားမှုများရှိလာနိုင်ကြောင်းလည်း ၎င်းက ခန့်မှန်းသည်။
စစ်ကောင်စီတပ်သည် မင်းတပ်မြို့နှင့် မြို့နယ်အတွင်းရှိကျေးရွာများကို လေကြောင်းတိုက်ခိုက်မှုများ မကြာခဏ ပြုလုပ်လျက်ရှိရာ စက်တင်ဘာ ၁၆ရက်တွင် တစ်ကြိမ်၊ စက်တင်ဘာ ၉ရက်တွင် တစ်ကြိမ်၊ စက်တင်ဘာ ၇ရက်တွင် တစ်ကြိမ်၊ စက်တင်ဘာ ၆ရက်တွင် တစ်ကြိမ်၊ စက်တင်ဘာ ၄ရက်တွင်တစ်ကြိမ် စုစုပေါင်း လေကြောင်းဗုံးကြဲတိုက်ခိုက်မှု ၅ကြိမ်ထက်မနည်း ပြုလုပ်ခဲ့သည်။
ထို့ပြင် မင်းတပ်မြို့ ခလရ(၂၇၄) တပ်ရင်းသို့လေယာဉ်ဖြင့် ရိက္ခာ၊ ခဲယမ်းဖြည့်တင်းခြင်းများလည်း ယခုလဆန်း၌ ပြုလုပ်ခဲ့သည်။ ယခင်က မင်းတပ်ကို မြေပြင်မှ ရိက္ခာခဲယမ်း၊ စစ်အင်အားဖြည့်တင်းခြင်းဖြစ်သော်လည်း လက်ရှိတွင် လမ်းတလျှောက် ကာကွယ်ရေးတပ်များ၏ တိုက်ခိုက်မှုကြောင့် လေကြောင်းအသုံးပြုနေရခြင်းဖြစ်သည်။
စစ်ကောင်စီတပ်သည် ယခုလအတွင်းမင်းတပ်မြို့ပေါ်ရှိ ပြည်သူလူထုနေအိမ်များကိုလည်း မီးရှီု့ဖျက်ဆီးမှုများပြုလုပ်ခဲ့ကြောင်း ဒေသခံက အသိပေးထားသည်။
