ရေဘေးသင့်စစ်ရှောင်တွေကို ဒေါ်လာတစ်သောင်းကျော် ထောက်ပံ့ပေးနိုင်မယ့် ကျားပေါက်ရဲ့ပန်းချီလေလံပွဲ

ဆဏ်း/ People’s Spring

ရေဘေးသင့်စစ်‌ဘေးရှောင်တွေကို ကူညီဖို့လေလံ တင် ရောင်းချတဲ့ အဆိုတော် ကျားပေါက်ရဲ့ ပန်းချီကားက အမေရိကန်ဒေါ်လာ တစ်သောင်းနဲ့ လေလံအောင်ခဲ့ပါတယ်။

Mother Nature (II) လို့အမည်ပေးထားတဲ့ ပန်းချီကားကို ကျားပေါက်က ရေဘေးအတွက်ရည်ရွယ်ရေးဆွဲခဲ့တာဖြစ်ပြီး အွန်လိုင်းလေလံပွဲအနေနဲ့ ငါးရက်ကြာပြုလုပ်ခဲ့တာပါ။

Public Service Announcement

“Mother Nature (I) က ရခိုင်ပြည်မုန်တိုင်းဝင်တဲ့ အချိန် ကျနော် ချင်းမိုင်မှာ ဆွဲပြီး ရေဘေးအတွက် ရောင်းခဲ့ပါတယ်။ ဒါက နံပါတ် (II) ပေါ့။

ပြင်သစ်က ကျနော့် အမေနံပါတ် ၄ ကတော့ “နင်အဲ့လိုပန်းချီကား နောက်ထပ်နံပါတ်တွေ မဆွဲရပါစေနဲ့ပဲ ဆုတောင်းပါတယ်” လို့ စိတ်မကောင်းစွာပြောလေရဲ့။ ” လို့ ပန်းချီကားနဲ့ပတ်သတ်ပြီး ကျားပေါက်က ပြောထားပါတယ်။

လေလံပွဲကိုတော့ မောင်မောင်အေး နဲ့ ပန်ဆယ်လိုတို့က ကူညီပေးခဲ့တာဖြစ်ပြီး ငါးရက်မြောက်နေ့မှာတော့ အမေရိကန်ဒေါ်လာ တစ်သောင်းနဲ့ Los Angeles မှာနေထိုင်သူတစ်ဦးက လေလံအောင်သွားတာပါ။

လေလံပွဲမှာ ဈေးပြိုင်ပေးခဲ့သူနှစ်ဦးကလည်း ရေဘေးအလှူအတွက် ဒေါ်လာ တစ်ထောင်စီပါဝင်ပေးခဲ့တာကြောင့် ရေဘေးသင့်စစ်ဘေးရှောင်တွေအတွက် ‌ဒေါ်လာ တစ်သောင်းနှစ်ထောင်အထိ ထောက်ပံ့ပေးနိုင်မှာဖြစ်ပါတယ်။

“မြန်မာပြည်ရေဘေးသင့် စစ်ဘေးရှောင် များနဲ့ တော်လှန်ရေးအင်အားစုများထံ ပေးပို့လှူဒါန်းသွားမှာဖြစ်ပါတယ်” လို့ ပန်ဆယ်လိုကအသိပေးထားပါတယ်။

ကျားပေါက်က ပြီးခဲ့တဲ့ ရက်က ပြည်ပက အနုပညာရှင်တစ်ဦးနဲ့ အတူရေးဆွဲထားတဲ့ ပန်းချီကားရောင်းရငွေကိုလည်း ရေဘေးသင့်ပြည်သူတွေအတွက် လှူဒါန်းပေးခဲ့ပါတယ်။

နွေဦးတော်လှန်ရေးကာလမှာ ကျားပေါက်ရဲ့ အနုပညာဖန်တီးမှုကို လေလံပွဲပြုလုပ်တာက ဒုတိယအကြိမ်ဖြစ်ပြီး ပထမအကြိမ်က Doddle Art ရေးဆွဲထားတဲ့ Ukulele ကိုလေလံတင်ခဲ့တာ ဒေါ်လာ ၂၈၅၀၀ အထိရရှိခဲ့ဖူးပါတယ်။