ရန်ကုန်တွင် စစ်​ကောင်စီက လူငယ်များကိုအိမ်အထိလိုက်​​ခေါ်ပြီး စစ်သားသစ်စု​ဆောင်း​နေ

ရဲခေါင်/People’s Spring

စစ်​ကောင်စီ၏ စစ်မှုမထမ်းမ​နေရ ဥပဒေဖြင့်လူသစ်စု​ဆောင်းမှု အပတ်စဥ် ၅ အတွက် ရန်ကုန်တိုင်းရှိ မြို့ နယ်အချို့မှ လူငယ်များကို စစ်ကောင်စီက အိမ်တိုင်ရာရောက် လာ​ရောက်ဖမ်းဆီး​​ခေါ်​ဆောင်နေကြောင်း ဒေသခံများက လူထုနွေဦးသို့ပြောသည်။

“လှည်းတန်း၊ဦးထွန်းလင်းခြံလမ်းထဲ က လူငယ်တစ်ယောက်ကို တိုက်ပေါ်ထိ တက်ဆွဲတာ။စစ်ကား နဲ့ကို တက်ဆွဲသွားတာ။မနေ့က(စက်တင်ဘာ ၂၀ ရက်) ည ၁၀ နာရီလောက်က။ဖအေ၊မအေ တွေကတော့ ငိုယိုပြီး တားပေမယ့် မရဘူး”ဟု ကမာရွတ်မြို့နယ်နေသူတစ်ဦးက ပြောသည်။

Public Service Announcement

အဘားတူ အရှေ့ဒဂုံ ၇ ရပ်ကွက်၌ နေထိုင်သူ အသက် ၂၀ ဝန်းကျင် အားနိုးဆိုသည့် လူငယ်ကိုလည်း စစ် ကောင်စီက နေအိမ်သို့ လာရောက်ကာခေါ်ဆောင်သွား ကြောင်းလည်း ထိုရပ်ကွက်နေသူပြည်သူက အသိပေးသည်။

“အပတ်စဥ် ၃ လောက်ကတည်းက မဲပေါက်သွားတော့ ရှောင်နေတာ။ပြီးတော့ အခု တစ်ပတ်လောက်ပဲရှိသေးတယ်။အဲဒီကောင်လေး အိမ်ပြန်ရောက်ပြီး တနေ့က စစ်ကားနှစ်စီးနဲ့ လာခေါ်သွားတာ”ဟု ​ဒေသခံက ပြောသည်။

ထို့အပြင် ခရမ်းမြို့၌ စစ်မှုထမ်းပါသွားသူများအနက် သုံးဦးသည် ရခိုင် နှင့် ရှမ်းမြောက်တိုက်ပွဲ၌ သေဆုံးသွားကြောင်းလည်း ခရမ်းမြို့နယ်ဒေသတွင်သတင်းများ​ဖော်ပြ​ပေး​နေ​သောKhayan Channel ကလည်း စင်တင်ဘာ ၂၁ ရင်တွင် ဖော်ပြထားသည်။

စစ်ကောင်စီ၏ စစ်မှုမထမ်းမ​နေရဥပဒေဖြင့် အဓမ္မ စု​ဆောင်းခံရသည့် လူငယ်များသည် တိုက်ပွဲ ပြင်းထန်နေသည့် နေရာများသို့ စေလွှတ်ခံရမှုများရှိနေကာ မိသားစုနှင့် အဆက် အသွယ်မရသည့် ဖြစ်စဥ်များနှင့်အတူ သေဆုံးရာတွင် အလောင်းပင်ပြန်မရမှုများရှိ​နေ​ကြောင်း ​တော်လှန်​ရေးအဖွဲ့များနှင့် စစ်သားသစ်စု​ဆောင်းခံရသူများ၏ မိသားစုဝင်အချို့က​ပြောသည်။

စစ်ကောင်စီ၏ စစ်မှုထမ်းအပတ်စဉ် ၅ သင်တန်းကို စက်တင်ဘာလအတွင်း စတင်ရန် နှင့် သတ်မှတ်ထားသည့် အရေအတွက်ရရှိအောင်ပြုလုပ်ရန် ပြည်သူ့စစ်မှုထမ်းဆင့်ခေါ်ရေးအဖွဲ့က ညွှန်ကြားထားကြောင်းလည်း ရပ်ကွက်အုပ်ချုပ်ရေးရုံးနှင့် နီစပ်သူအချို့က ​ပြောသည်။

နိုင်ငံတစ်ဝန်း စစ်ရေးနိမ့်နေသည့် စစ်ကောင်စီသည် ၂၀၂၄ ခုနှစ်ဖေဖော်ဝါရီ ၁၀ ရက်က ပြည်သူ့စစ်မှုထမ်း ဥပ‌ဒေကို ထုတ်ပြန်ခဲ့ပြီး လစဥ် စစ်သားသစ် ၅၀၀၀ စု​ဆောင်းမည်ဆိုကာ သြဂုတ်လအထိ စစ်သင်တန်းအပတ်စဥ် ၄ ခုကို ဖွင့်ထားသည်။

စစ်ကောင်စီ၏ထိုဥပဒေအရ အသက် ၁၈ နှစ်ပြည့်ပြီးသူ အမျိုးသမီး၊ အမျိုးသား တိုင်းကို ၂ နှစ် စစ်မှုထမ်းဖို့ ဆင့်ခေါ် နိုင်ပြီး တိုင်းပြည် အရေးပေါ်အခြေအနေဆိုပါက ၅ နှစ် အထိ စစ်တပ်ကလိုသလို ခိုင်းစေနိုင်သည်။

အဓမ္မစစ်သားသစ်စုဆောင်းခံရပြီး စစ်သင်တန်းဆင်းခါစ လူငယ်များကို စစ်တပ်က ရခိုင်စစ်​မြေပြင်သို့ ပို့ဆောင်သဖြင့် သံတွဲ ၊ ​​မောင်​တောတိုက်ပွဲများတွင် ​သေဆုံးသူများမှာ စစ်သင်တန်းဆင်းလူငယ်များဖြစ်​နေ​ကြောင်း AA ကထုတ်ပြန်ထားသည်။

အလားတူ ရှမ်း​ပြည်နယ်တောင်ပိုင် နှင့် ကရင်နီပြည် နယ်စပ်၌ ဖြစ်ပွား​သောတိုက်ပွဲများတွင် စစ်အုပ်စုဘက်မှ​သေဆုံးသူ အများစုမှာ စစ်မှုမထမ်းမ​နေရဥပ​ဒေဖြင့်စု​ဆောင်းခံရ​သောစစ်သင်တန်းဆင်းများ နှင့် ပြည်သူ့စစ်တပ်ဖွဲ့ဝင်အများစုဖြစ်​နေပြီး စစ်သားများမှာ တိုက်ပွဲဖြစ်လျင် ဦး​အောင်​ပြေး​လေ့ရှိ​ကြောင်း​တော်လှန်​ရေးအင်အားစုများက​ပြောသည်။