ဒေါ်အောင်ဆန်းစုကြည်ကို လွတ်မြောက်စေလိုကြောင်း ပုပ်ရဟန်းမင်းကြီး ပြောကြား

ပုပ်ရဟန်းမင်းကြီး ဖရန်စစ်က ဒေါ်အောင်ဆန်းစုကြည် ပြန်လည် လွတ်မြောက်စေရေး လိုလားတောင်းဆိုခဲ့သလို ဗာတီကန် နန်းတော်မှာ လာရောက်နေထိုင်စေလိုတယ်လို့ ပြောကြားခဲ့ကြောင်း သိရပါတယ်။

ဘရင်ဂျီ ဘာသာရေး ဂိုဏ်းဝင်တွေနဲ့ တွေ့ဆုံဆွေးနွေးမှု အစီအစဉ် တစ်ခုမှာ အသက် ၈၇ နှစ်အရွယ် ရိုမန်ကက်သလစ် ခရစ်ယာန် ဘာသာရေး အထွဋ်အခေါင် ပုဂ္ဂိုလ်ကြီးက အာဏာသိမ်း စစ်ကောင်စီ ဖမ်းဆီးတာ ခံထားရတဲ့ နိုဘယ်လ် ငြိမ်းချမ်းရေးဆုရှင်၊ မြန်မာအစိုးရအဖွဲ့ခေါင်းဆောင် ဒေါ်အောင်ဆန်းစုကြည်ကို လွတ်မြောက်စေလိုကြောင်း ပုဂ္ဂိုလ်ရေး သဘောထားကို ထုတ်ဖော် ပြောဆိုသွားခဲ့တာ ဖြစ်ပါတယ်။

မကြာသေးခင်က ပြီးစီးခဲ့တဲ့ ၁၂ ရက်တာ အရှေ့တောင်အာရှ ခရီးစဉ် အတောအတွင်း သီးခြား ဆွေးနွေးမှု အစီအစဉ် တစ်ခုထဲမှာ ပုပ်ရဟန်းမင်းကြီးက ဒေါ်အောင်ဆန်းစုကြည် လွတ်မြောက်ရေးအတွက် တောင်းဆိုခဲ့ကြောင်း၊ ဒေါ်အောင်ဆန်းစုကြည်ရဲ့ သားကို ရောမမှာ လက်ခံထားပြီး ဒေါ်အောင်ဆန်းစုကြည်ကိုလည်း ဗာတီကန်မှာ လာရောက် နေထိုင်စေလိုကြောင်း ပြောကြားခဲ့တာလို့ Reuters သတင်းဌာနက ဖော်ပြထားခဲ့ပါတယ်။

ဒေါ်အောင်ဆန်းစုကြည်ဟာ ၂၀၂၁ ခုနှစ် စစ်တပ်အာဏာသိမ်းမှု အပြီးမှာ စစ်တပ်ရဲ့ ဖမ်းဆီးချုပ်နှောင်ပြီး မမျှမတ အမိန့်တွေနဲ့ နှစ်ရှည်ထောင်ဒဏ်တွေ စီရင်ချမှတ် ခံထားရတာ ဖြစ်ပါတယ်။

Public Service Announcement

ပုပ်ရဟန်းမင်းကြီးရဲ့ မှတ်ချက်စကားတွေဟာ စက်တင်ဘာ ၂၄ ရက်နေ့က အီတလီ သတင်းဌာန Corriere dell Seraမှာ ဖာသာ အန်တိုနီယို စပါဒါရို ရေးသားတဲ့ ဆောင်းပါးမှာ ပါရှိခဲ့တာပါ။ အဲဒီမှတ်ချက်တွေ ထည့်သွင်းရေးသားမှုကို ပုပ်ရဟန်းမင်းကြီး ကိုယ်တိုင်က လက်ခံ ခွင့်ပြုပေးခဲ့တာလို့ ဆိုပါတယ်။

ပုပ်ရဟန်းမင်းကြီးဟာ ၂၀၁၇ ခုနှစ်၊ ဒီဇင်ဘာလတုန်းက မြန်မာနိုင်ငံကို အလည်အပတ် ခရီးစဉ် ရောက်ရှိခဲ့ဖူးပါတယ်။ ဘရင်ဂျီ ဘာသာဝင်တွေနဲ့ ဆွေးနွေး ပြောဆိုချိန်မှာ ပုပ်ရဟန်းမင်းကြီးက မြန်မာနိုင်ငံရဲ့ အနာဂတ်ဟာ အများကောင်းကျိုးအတွက် အားလုံးက စုပေါင်း အားထုတ်တဲ့ ဒီမိုကရေစီ ကျင့်ထုံးမျိုးကို လေးစားတန်ဖိုးထားပြီး ဂုဏ်သိက္ခာနဲ့ လူတစ်ဦးချင်းရဲ့ အခွင့်အလမ်းတွေအပေါ် အခြေခံတဲ့ ငြိမ်းချမ်းမှုမျိုးသာ ဖြစ်တည်သင့်ကြောင်း ဆက်လက် ပြောဆိုခဲ့ပါတယ်။

ဒေါ်အောင်ဆန်းစုကြည်ဟာ အာဏာသိမ်း စစ်ကောင်စီရဲ့ ဖမ်းဆီး ချုပ်နှောင်မှုကို ခံထားရချိန် ကတည်းက ပြင်ပကမ္ဘာနဲ့ လုံးဝနီးပါး အဆက်ပြတ်နေပါတယ်။ အမည်ဖော်မပြတဲ့ သတင်းရင်းမြစ် တစ်ဦးကတော့ ဒေါ်အောင်ဆန်းစုကြည်ဟာ ရှေ့နေတွေနဲ့လည်း တွေ့ဆုံခွင့် မရဘူးလို့ ပြောကြားခဲ့ပါတယ်။

ပြီးခဲ့တဲ့ သီတင်းပတ်မှာ ကုလသမဂ္ဂက အာဏာသိမ်း မြန်မာစစ်တပ်ဟာ အတိုက်အခံတွေနဲ့ ဆန့်ကျင်ရေး အင်အားစုတွေကို ဖြိုခွင်းဖို့ ရည်ရွယ်ချက်နဲ့ အကြမ်းဖက် ရမ်းကား သတ်ဖြတ်မှုတွေကို အရှိန်မြှင့်တင်လာသလိုအဓမ္မစစ်မှုထမ်းစုဆောင်းမှုတွေကိုလည်း ပိုမို လုပ်နေကြောင်း ပြောကြားခဲ့ပါတယ်။

မြန်မာနိုင်ငံမှာ ဒီက​နေ့ ဖြစ်ပျက်​နေတာနဲ့ပတ်သက်ပြီး​တော့လည်း နှုတ်ဆိတ်​နေလို့မရဘူး ငါတို့တစ်ခုခုလုပ်ရ​မယ်လို့ လည်း ပုပ်ရဟန်းမင်းကြီးက​ပြောတယ်လို့ South China Morning Post သတင်းဌာနက​ဖော်ပြပါတယ် ။

ကိုးကား- Reuters