အီယိုရီ/People’s Spring
အကြမ်းဖက်စစ်ကောင်စီက ပြည်တွင်းနှင့် နိုင်ငံတကာကိုလှည့်စားရန် ကြံစည်ဆောင်ရွက်နေသော အတုအယောင် ရွေးကောက်ပွဲကို အသိအမှတ် မပြု၊ ပူးပေါင်းဆောင်ရွက်မည်မဟုတ်ကြောင်း အမျိုးသားဒီမိုကရေစီအဖွဲ့ချုပ်(NLD)ပါတီက ထပ်လောင်းကြေညာသည်။
ယမန်နေ့(စက်တင်ဘာ ၂၇ရက်)တွင် ကျင်းပခဲ့သော အမျိုးသားဒီမိုကရေစီအဖွဲ့ချုပ်တည်ထောင်ခြင်း(၃၆)နှစ်မြောက် အထိမ်းအမှတ်အခမ်းအနား၌ အသိပေးကြေညာခြင်းဖြစ်ပြီး စစ်မှန်သောဒီမိုကရေစီဖက်ဒရယ် ပြည်ထောင်စုတစ်ရပ်ဖြစ်ထွန်းစေမည့် ဖွဲ့စည်းပုံအခြေခံဥပဒေပေါ်ပေါက်ရေးကိုလည်း တစိုက်မတ်မတ် ကြိုးပမ်းဆောင်ရွက်လျက်ရှိကြောင်း ဖော်ပြသည်။
Public Service Announcement
မြန်မာနိုင်ငံ၏ လက်ရှိဖြစ်ပေါ်နေသော ပြဿနာများဖြေရှင်းရာတွင် အမျိုးသားဒီမိုကရေစီအဖွဲ့ချုပ်ဥက္ကဋ္ဌ ဒေါ်အောင်ဆန်းစုကြည် မပါဝင်ဘဲ ပြေလည်ရေးလမ်းစမရရှိနိုင်ဟု ယုံကြည်ပါသဖြင့် ဒေါ်အောင်ဆန်းစုကြည်နှင့် နိုင်ငံရေးအကျဉ်းသားများအားလုံး အမြန်ဆုံး ပြန်လွှတ်ပေးရန် NLD က တောင်းဆိုသည်။
ယခုအခါ အခြားအင်အားစုများသည်လည်း အသွင်ကူးပြောင်းရေးကာလ ဖွဲ့စည်းပုံအခြေခံဥပဒေမူကြမ်းများ ပြင်ဆင်ထားကြောင်း သိရှိရကြောင်းနှင့် NLD က မျှော်မှန်းရေးဆွဲထားသော အသွင်ကူးပြောင်းရေးကာလ ပြည်ထောင်စုဖွဲ့စည်းပုံအခြေခံဥပဒေ(တတိယမူကြမ်း)ကို မကြာမီအချိန်တွင် ရည်မှန်းချက်တူ မိတ်ဖက်အင်အားစုများ၏ အမြင်သဘောထားများကိုစုစည်း၍ ညှိနှိုင်းပေါင်းစပ် သွားမည်ဟု ဆိုသည်။
လက်ရှိကြားကာလတွင် တိုင်းများ(မူရင်းတွင် တိုင်းဒေသကြီးများဟု သုံးနှုန်း) သို့မဟုတ် ဖက်ဒရယ်ယူနစ်များ၌ နိုင်ငံရေးတန်းတူရည်တူရှိမှု အခြေခံဖြင့် ကိုယ်စားပြုမှုရှိသော ဒေသခံနိုင်ငံရေးအင်အားစုများနှင့် အတူလက်တွဲ၍ ကြားကာလ အစီအမံများကို ရေးဆွဲအကောင်အထည်ဖေါ်နိုင်ရေးအတွက် NLD က ကြိုးပမ်းဆောင်ရွက်နေကြောင်း အသိပေးသည်။
ယင်းနောက် စက်တင်ဘာ ၁၉ ရက်က ထုတ်ပြန်ခဲ့သော တိုင်းရင်းသားခုခံတော်လှန်ရေး အဖွဲ့အစည်းများနှင့် ပြည်နယ်/လူမျိုးကိုယ်စားပြုကောင်စီများ၏ အနာဂတ်ဖက်ဒရယ်ဒီမိုကရေစီ ပြည်ထောင်စုတည်ဆောက်ရေးအတွက် သဘောထားထုတ်ပြန်ကြေညာချက်ကို NLD ကကြိုဆိုကြောင်း ဖော်ပြသည်။
အကြမ်းဖက်စစ်ကောင်စီသည် စစ်ရေးပစ်မှတ်မဟုတ်သည့် အရပ်သားပြည်သူများ၏နေအိမ် အဆောက်အဦများ၊ စာသင်ကျောင်းများ၊ ဘာသာရေးဆိုင်ရာအဆောက်အဦများကိုလည်း မြေပြင်၌ စစ်ကြောင်းထိုးဝင်ရောက်ခြင်း၊ လေကြောင်းမှပစ်ခတ်တိုက်ခိုက်ခြင်းနှင့် ဗုံကြဲခြင်းတို့ကို ရည်ရွယ်ချက်ရှိရှိဖြင့် ဆောင်ရွက်ခဲ့မှုများကြောင့် အရပ်သားပြည်သူများစွာ ထိခိုက်သေကြေပျက်စီးခဲ့ရသဖြင့် အပြည်ပြည်ဆိုင်ရာဥပဒေပြဋ္ဌာန်းချက်များအရ လူမျိုးတုန်း သတ်ဖြတ်မှု၊ စစ်ရာဇဝတ်မှုများကို ကျူးလွန်ခြင်းတို့နှင့် ငြိစွန်းလျက်ရှိကြောင်း NLD က ဆိုသည်။
အကြမ်းဖက်စစ်ကောင်စီ၏ လေကြောင်းစွမ်းရည် မြှင့်တင်ရန် စစ်လက်နက်၊ ငွေကြေးနှင့်၊ နည်းပညာအကူအညီပေးနေသော လူပုဂ္ဂိုလ်များ၊ အဖွဲ့အစည်းများနှင့် နိုင်ငံများအနေဖြင့်လည်း လူမျိုးတုန်းသတ်ဖြတ်မှုနှင့် စစ်ရာဇဝတ်မှု ကျူးလွန်မှုများတွင် အလိုတူအလိုပါကြံရာပါများအဖြစ် သတ်မှတ်ခံရမည်ဟု သတိပေးဖော်ပြသည်။
ထို့အပြင် ပြည်သူလူထု၏ စစ်မှန်သောဆန္ဒကို လျစ်လျူရှု၍ ကျူးလွန်သူတရားခံဖြစ်သော စစ်ကောင်စီကို မျက်နှာသာပေး ချဥ်းကပ်အဖြေရှာနေမှုများသည် မြန်မာနိုင်ငံအကြပ်အတည်း ပြဿနာအတွက် ရေရှည်တည်ငြိမ်အေးချမ်းရေးအတွက် အထောက်အကူပြုနိုင်မည် မဟုတ်ကြောင်း NLD က ခိုင်မာစွာယုံကြည်သည်ဟု ဆက်လက်ဖော်ပြသည်။
အမျိုးသားဒီမိုကရေစီအဖွဲ့ချုပ် တည်ထောင်ခြင်း(၃၆)နှစ်မြောက် အထိမ်းအမှတ်အခမ်းအနားသို့ ပြည်သူ့လွှတ်တော်ကိုယ်စားလှယ်များအဖွဲ့(MPU-Burma)၊ အမျိုးသားညီညွတ်ရေးအတိုင်ပင်ခံကောင်စီ(NUCC)၊ လူ့ဘောင်သစ်ဒီမိုကရက်တစ်ပါတီ၊ ကချင်ပြည်နယ်နိုင်ငံရေးကြားကာလပူးပေါင်းဆောင်ရွက်ရေးအဖွဲ့(Kachin Political Interim Coordination Team-KPICT) စသည့် နိုင်ငံရေးအဖွဲ့အစည်းများက သဝဏ်လွှာပေးပို့ကြောင်း သိရသည်။
