ဟန်နွေ/People’s Spring
ကိုးကန့်တပ်မတော်(MNDAA) သိမ်းပိုက်ထားသည့် လားရှိုးမြို့တွင် ဖုန်းလိုင်းများပြတ်တောက် သွားသည့် နှစ်ရက်တာအတွင်း စစ်ကောင်စီတပ်၏ လေကြောင်းတိုက်ခိုက်မှုလည်းမရှိကြောင်း အဆိုပါမြို့ဒေသ သတင်းရင်းမြစ်က ပြောသည်။
MNDAA အနေဖြင့် ဩဂုတ် ၃ရက်တွင် လားရှိုးမြို့ကို သိမ်းပိုက်ပြီးနောက် ဆက်သွယ်ရေးဖုန်းလိုင်းများ ၊ လျှပ်စစ်မီးအပါအဝင် မြို့ပြန်လည်ထူထောင်ရေးကို အရှိန်မြှင့်လုပ်ဆောင်ခဲ့သော်လည်း ဩဂုတ် ၃၀ရက်မှစ၍ စစ်ကောင်စီက မြို့ကို လေကြောင်း တိုက်ခိုက်မှုများ လုပ်ဆောင်ခဲ့သည်။ စက်တင်ဘာလကုန်ပိုင်း နောက်ဆုံးရက်များအတွင်း ဗုံးကြဲတိုက်ခိုက်မှုများ နေ့စဉ်ပြုလုပ်ခဲ့ရာ လေကြောင်းတိုက်ခိုက်မှု ၁၀ကြိမ်အတွင်း အရပ်သား ပြည်သူ ၉ဦးထက်မနည်းသေဆုံးကာ ၅၀ ဦးဝန်းကျင် ဒဏ်ရာရရှိခဲ့သည်ဟု ဒေသခံက ပြောသည်။
Public Service Announcement
MNDAA၏ ထုတ်ပြန်ချက်တွင် အရပ်သား သေဆုံးသူ သုံးဦးသာရှိပြီး ဒဏ်ရာရသူ ၄၀ကျော် ရှိကြောင်း အသိပေးထားသည်။
ထို့နောက် အောက်တိုဘာ ၁ရက်မှစ၍ ဖုန်းလိုင်းများ ပြတ်တောက်သွားခဲ့ရာ ယင်းနေ့မှစ၍ လေကြောင်း တိုက်ခိုက်မှုမလာတော့ဟု လားရှိုးမြို့ခံ မနော်ဖောက ပြောသည်။
ဖုန်းလိုင်းပြတ်တောက်ခြင်းနှင့်ပတ်သက်၍ MNDAAက တရားဝင် ထုတ်ပြန်ထားမှုမရှိကြောင်း ၎င်းက ဆိုသည်။
” ဖုန်းလိုင်းပြတ်တောက်ပြီးနှစ်ရက်အတွင်းတော့ စကစ လေကြောင်းတိုက်ခိုက်မှု ရပ်တန့်နေပါတယ်။ ဒါကို ကြည့်ရင်တော့ အဆိုးထဲက အကောင်းပေါ့ရှင်။ Starlinkတော့ တချို့နေရာတွေမှာ သုံးလို့ရနေပါတယ်”ဟု မနော်ဖောက ပြောသည်။
ထို့အပြင် ပြည်သူအားလုံး ကောလာဟလများ မယုံကြရန်၊ အရေးပေါ် အခြေအနေများ ရှိပါက သက်ဆိုင်ရာက တရားဝင်ကြေညာမည် ဖြစ်သည်ဟုဆိုသည်။
” အခက်အခဲရှိကြတာ နားလည်ပေမဲ့ ဒီရက်ပိုင်းတော့ သည်းခံပေးကြပါ။ စစ်ဖြစ်ဖို့လည်း မရှိပါဘူးလို့ သတင်းစကား ပါးချင်ပါတယ်”ဟု မနော်ဖောက ပြောသည်။
လေကြောင်းတိုက်ခိုက်မှုများ မရှိပါက အကောင်းဆုံးဖြစ်ပြီး အဓိကမှာပြည်သူလူထုများ လုံခြုံရန်ဖြစ်သည်ဟုလည်း ၎င်းက ပြောသည်။
စစ်ကောင်စီအနေဖြင့် လားရှိုးမြို့အပါအဝင် ကိုးကန့်ဒေသအတွင်း တိုက်ပွဲဖြစ်ပွားမှုမရှိသည့် နေရာများကို လေကြောင်းတိုက်ခိုက်မှုများ ပြုလုပ်ခဲ့ရာ ဇူလိုင်မှ စက်တင်ဘာလကုန်အထိ သုံးလအတွင်း လေကြောင်းတိုက်ခိုက်မှု ၂၅ကြိမ်ရှိကာ ပြည်သူ ၃၁ဦး သေဆုံးခဲ့ပြီး ၉၀ဦး ဒဏ်ရာရခဲ့ကြောင်း MNDAAက ယမန်နေ့တွင် ထုတ်ပြန်ထားသည်။
