သုည/People’s Spring
စစ်ကိုင်းတိုင်းမှာ သပိတ်အဖွဲ့တွေ၊ ဒေသခံပြည်သူတွေက (၇၉)ကြိမ်မြောက် ကုလသမဂ္ဂမှာ သံအမတ်ကြီး ဦးကျော်မိုးထွန်းကို ဆက်လက်ထားရှိဖို့အတွက် ထောက်ခံကြောင်း ဒီကနေ့ (အောက်တိုဘာ ၄)မှာ အသီးသီးဆန္ဒထုတ်ဖော်ခဲ့ပါတယ်။
စစ်ကိုင်းတိုင်း ယင်းမာပင်မြို့နယ်မှာ နောက်ပြန်မလှည့်ကြေး ဒီတော်လှန်ရေးလူထုသပိတ်စစ်ကြောင်းက ဦးဆောင်ကာ “Our Ambassador Myanmars Voice ငါတို့သံအမတ်ကြီးသည် ငါတို့မြန်မာပြည်ရဲ့အသံ ဖြစ်သည်” စတဲ့စာသားတွေ ကိုင်ဆောင်ပြီး သံအမတ်ကြီးဦးကျော်မိုးထွန်းကို ထောက်ခံကြောင်း ပြသခဲ့ပါတယ်။
Public Service Announcement
ဆားလင်းကြီးမြို့နယ်က ကျေးရွာတစ်ရွာမှာလည်း လက်ပံတောင်းသပိတ်အင်အားစုက ဦးဆောင်ကာ သံအမတ်ကြီး ဦးကျော်မိုးထွန်းကို ထောက်ခံကြောင်းနဲ့ စစ်အာဏာရှင်စနစ်ကို ဆန့်ကျင်ကြောင်း ဆန္ဒပြသပိတ် ချီတက်ခဲ့ပါတယ်။
ယင်းလှုပ်ရှားမှုမှာ သံအမတ်ကြီးဦးကျော်မိုးထွန်းကို ထောက်ခံကြောင်း ပြသတဲ့အနေနဲ့ “Our Ambassador Myanmar’s Voice၊ ငါတို့သံအမတ်ကြီးသည် ငါတို့မြန်မာပြည်ရဲ့အသံ ဖြစ်သည်” စာသားနဲ့ ချီတက်ခဲ့ပြီး စစ်ကောင်စီရဲ့ သန်းခေါင်စာရင်းကောက်ယူနေမှုအပေါ် ပြည်သူတွေ ဆန့်ကျင်ကြရန်လည်း “စစ်ကျွန်ဇာတ်သွင်း သန်းခေါင်စာရင်းကို ဆန့်ကျင်ကြ” ဟု ကြွေးကြော်ချီတက်ခဲ့ပါတယ်။
ရွှေဘိုမြို့နယ်မှာလည်း သပိတ်အင်အားစုရဲဘော်တွေက တော်လှန်ပြည်သူတွေ၊ ဒေသခံအင်အားစုတွေနဲ့ ပူးပေါင်းကာ တော်လှန်ရုပ်ရှင်ပြသခြင်း၊ စစ်အာဏာရှင်ဆန့်ကျင်ရေးဆန္ဒပြကြွေးကြော်ခြင်းတွေ ပြုလုပ်ခဲ့ပါတယ်။
ဓာတ်ပုံ – ရွာပေါင်းစုံသပိတ်၊ ရွှေဘိုလူထုသပိတ်၊ လက်ပံတောင်းသပိတ်
