လူအေး/People’s Spring
ဖားကန့်မြို့နယ် ဆိုင်းတောင်ကျေးရွာရှိ Lucky Man ဟိုတယ်တွင်တပ်စွဲထားသည့် စစ်ကောင်စီတပ်အား ဦးဆောင်ထွက်ပြေးလွတ်မြောက်သွားသည့် ဒုတိယဗိုလ်မှူးကြီးသက်ပိုင်ထွန်းကို ကချင်လွတ်လပ်ရေးတပ်မတော်(KIA)နှင့် PDFပူးပေါင်းတပ်က ဥတုချောင်းဘေးတစ်နေရာတွင် ပစ်ခတ်ရှင်းလင်းလိုက်သည်။
Lucky Manဟိုတယ်ကို အောက်တိုဘာ၈ရက်တွင် KIA နှင့် PDFပူးပေါင်းတပ်က တိုက်ခိုက်သိမ်းယူစဉ် ဒုတိယဗိုလ်မှူးကြီးသက်ပိုင်ထွန်းသည် လက်နက်ခဲယမ်းများနှင့်အတူ ထွက်ပြေးလွတ်မြောက်သွားခြင်း ဖြစ်သည်။
Public Service Announcement
“ဒီကောင်နဲ့ တပည့်တပန်းတွေပြေးတာ တောက်လျှောက်လိုက်ပြီး သမတာ။အမှန်တကယ်ကအရှင်ရချင်တာ။ လက်နက်မချလို့ အပြန်အလှန်ပစ်ခတ်မှုဖြစ်ပြီး သေဆုံးသွားတာ” ဟု KIAနှင့် နီးစပ်သည့်သတင်းရင်းမြစ်ကပြောသည်။
ဒုတိယဗိုလ်မှူးကြီးသက်ပိုင်ထွန်းကို ယနေ့(အောက်တိုဘာ ၁၀ရက်) နံနက်စောပိုင်းကဖြစ်ပွားခဲ့သည့်တိုက်ပွဲအတွင်း ပစ်ခတ်ရှင်းလင်းနိုင်ခဲ့ခြင်းဟု သိရသည်။
ဒုတိယဗိုလ်မှူးကြီးသက်ပိုင်ထွန်းသည် စစ်ကောင်စီပြန်ကြားရေးတာဝန်ခံ ဗိုလ်ချုပ်ဇော်မင်းထွန်း၏ တူတော်စပ်ကြောင်း သတင်းများထွက်ပေါ်နေသော်လည်း ယင်းအချက်ကို အတည်မပြုနိုင်သေးပေ။
၎င်းသည် ဖားကန့်ဒေသ၌ အရပ်သားများအားပစ်ခတ်ဖမ်းဆီးခြင်း၊ တော်လှန်ရေးအင်အားစုများအား အကြမ်းဖက်ဖမ်းဆီးခြင်း၊ အမျိုးသမီးများအား လိင်ပိုင်းဆိုင်ရာကျူးလွန်မှုများ ပြုလုပ်ခဲ့သူဟု ဖားကန့်ဒေသခံတစ်ဦးကပြောသည်။
ကချင်လွတ်လပ်ရေးတပ်မတော်(KIA)နှင့် PDFပူးပေါင်းတပ်သည် Lucky Man ဟိုတယ်တွင် တပ်စွဲထားသည့် စစ်ကောင်စီတပ်ကို တိုက်ခိုက်ခြေမုန်းပြီးနောက် ယူမာကျေးရွာ၌ တပ်စွဲထားသည့်စစ်ကောင်စီတပ်ကို ဆက်လက်တိုက်ခိုက်မည်ဟု သတင်းများထွက်ပေါ်နေသည်။
ဆိုင်းတောင်ရွာအတွင်းမှ စစ်ကောင်စီတပ်စွဲထားသည့်နေရာများကို အပြီးသတ်တိုက်ခိုက်မည်ဖြစ်၍ ဒေသခံများအနေဖြင့် လုံခြုံရေးအခြေအနေအရ ဘေးလွတ် ရာသို့ ယာယီထွက်ခွာပေးထားရန် KIAကသတိပေးထားကြောင်းဒေသခံအချို့က ပြောသည်။
