ကျော်ဇော/People’s Spring
တနင်္သာရီတိုင်း၊ ပုလောမြို့နယ်၊ ကျောက္ကာရွာမှတဆင့် မြိတ်မြို့သို့ ပြေးဆွဲသည့် စက်လှေတစ်စီးတိမ်းမှောက်မှုဖြစ်စဥ်အတွင်း ရုပ်အလောင်း ၁၁ လောင်းတွေ့ရှိထားပြီး လူ ၇၀ကျော်ပျောက်ဆုံးနေကြောင်း အဆိုပါကျေးရွာဒေသခံများက လူထုနွေဦးသို့ ပြောသည်။
ယမန်နေ့(အောက်တိုဘာ ၂၀ ရက်)ည ၉နာရီခွဲခန့်က ကျောက္ကာကျေးရွာမှ မြိတ်မြို့သို့ ပြေးဆွဲနေသော စက်လှေတစ်စီးမှာ လှေစထွက်ပြီး မိနစ်ပိုင်းအကြာတွင် တိမ်းမှောက်မှုဖြစ်ပွားခဲ့သည်ဟု ဒေသခံများက ပြောသည်။
“ကျောက္ကာရွာအလွန်လေးတင် လှေကမှောက်သွားတာ။ လိုက်ပါတဲ့လူဦးရေကလည်း အရမ်းများသွားတယ်။ မြိတ်ကို ကျောင်းတက်ဖို့ပြန်တဲ့ ကျောင်းသား၊ ကျောင်းသူတွေပါတယ်။ ပြီးတော့ စစ်ဘေးရှောင်နေရတဲ့ ပြည်သူတွေလည်းပါတယ်။ လှေပေါ်မှာ လူဦးရေဘယ်လောက်ပါတယ်ဆိုတာကိုတော့ တိတိကျကျမပြောနိုင်သေးဘူး။ ၇၀ကျော်လို့ခန့်မှန်းသလို လူ ၉၀ ဝန်းကျင်လည်းဖြစ်သွားနိုင်တယ်”ဟု ကျောက္ကာရွာမှ ဒေသခံတစ်ဦးက ပြော သည်။
Public Service Announcement
လက်ရှိတွင် မြိတ်မြို့မှလာသော လူမှုကူညီရေးအသင်းများနှင့် ဒေသခံများပူးပေါင်း၍ ရှာဖွေကယ်ဆယ်ရေးလုပ်ငန်းများလုပ်ဆောင်လျှက်ရှိရာ ယနေ့(အောက်တိုဘာ ၂၁ ရက်) ညနေ ၃ နာရီအထိ အသက်ရှင်လျှက်ပြန်တွေ့သူ ကိုးဦးနှင့် ရုပ်အလောင်း ၁၁ လောင်းရှာဖွေတွေ့ရှိထားကြောင်း ၎င်းက ဆက်ပြောသည်။
“မြိတ်ကနေ သီတင်းကျွတ်ရွာပြန်ကြတာ။သီတင်းကျွတ်ပြီးလို့ မြိတ်ပြန်ကြတော့ လမ်းမှာ ရေဝဲနဲ့တွေ့ပြီး ဆုံးကုန်ကြတာ။ ကျမတူမတွေ သုံးယောက်ပါသွားတယ်။ တစ်ယောက်ပဲ အလောင်းရတယ်”ဟု စက်လှေတိမ်းမှောက်ရာတွင် ဆွေမျိုးသားချင်းတချို့ပါသွားသည့် ဒေသခံအမျိုးသမီးတစ်ဦးက ပြောသည်။
ကျောက္ကာနှင့် မြိတ်သို့ပြေးဆွဲသည့် စက်လှေ(မော်တော်)များသည် ပေါင်းမိုးအပါအဝင် နှစ်ထပ်စက်လှေများဖြစ်ပြီး ခရီးသည်အပြင် ကုန်ပစ္စည်းပါပေါင်းတင်သည့် ခရီးသည်တင်ရေယာဥ်များဖြစ်ကာ ပုံမှန်အခြေအနေတွင် စက်လှေတစ်စီးလျှင် လူဦးရေ ၄၀ ဝန်းကျင်ခန့်သာတင်လေ့ရှိပြီး ကျောက္ကာနှင့်မြိတ် ၃နာရီခန့် မောင်းနှင်ရသည်။
