ရဲခေါင်/People’s Spring
ရန်ကုန်မြို့၊ မှော်ဘီမြို့နယ်တွင် စစ်ကောင်စီခန့် ကျေးရွာအုပ်ချုပ်ရေးမှူးတစ်ဦးဓားထိုးခံရပြီး သေဆုံးခဲ့ကြောင်း သတင်းရရှိသည်။
မှော်ဘီမြို့နယ်၊အထယုကျေးရွာအုပ်ချုပ်ရေးမှူးဦးထိန်လင်းသည် ဘီယာသောက်ရင်းစကားများရာမှ ဓားဖြင့် ငါးချက်ထက်မနည်းထိုးသတ်ခံရပြီး သေဆုံးခဲ့ခြင်းဟု ဆိုသည်။
Public Service Announcement
စစ်ကောင်စီ၏ မှုခင်းမှတ်တမ်းများအရ အောက်တိုဘာ ၁၉ ရက် ညနေ ၆ နာရီခွဲခန့်တွင် ဦးထိန်လင်းသည် ဘီယာသောက်နေစဥ် ဝက်သားရောင်းသည့်ဇော်မင်းထွန်းကိုခေါ်ပြီး ဝက်သားတစ်ပိသာကျပ်နှစ်သောင်းခွဲရောင်းသည့်ကိစ္စကိုပြောဆိုခဲ့သည်။
“မင်းတို့ထိန်တောမိုးညိုသားတွေက ဦးစားပေးလို့ကိုမရဘူး။လူမိုက်တွေ”ဟု ဦးထိန်လင်းက ပြောဆိုခဲ့ကြောင်း မှုခင်းမှတ်တမ်းတွင် ဖော်ပြထားသည်။
ထို့ကြောင့် ဇော်မင်းထွန်းက စိတ်ဆိုးပြီးဓါးဖြင့်ထိုးရာ ဦးထိန်လင်းသည် ထိုးသွင်းဒဏ်ရာများဖြင့်သေဆုံးသွားပြီး ဓားဖြင့်ထိုးခဲ့သူ ဇော်မင်းထွန်းကို ဖမ်းမမိသေးဟု သိရသည်။
အောက်တိုဘာ ၁၆ ရက်ကလည်း အင်းစိန်မြို့နယ်၊ကမ်းနားအနောက်ရပ်ကွက်အုပ်ချုပ်ရေးမှူးစိုးသန်း ဓားထိုးခံရပြီးသေဆုံးခဲ့သည်။
စစ်တပ်အာဏာသိမ်းပြီးနောက်ပိုင်း ရန်ကုန်အပါ အဝင် အခြားမြို့နယ်များ၌ ရပ်ကွက် အုပ်ချုပ်ရေးမှူး ဆိုသူများနှင့် ၎င်းတို့၏ နောက်လိုက်များသည် လူထုအပေါ် အကြောင်းမဲ့ ဖမ်းဆီးနှိပ်စက်၊သတ်ဖြတ်မှုများ ကျူးလွန်ခဲ့သည်။
ထို့ကြောင့် အုပ်ချုပ်ရေးမှူးများအနေဖြင့် စစ်ကောင်စီဘက်တော်သားများအဖြစ်မှ နှုတ်ထွက်ရန် မြို့ပြတော်လှန်ရေးအဖွဲ့များက သတိပေးမှုများနှင့်အတူ လူထုအပေါ်ဆက် လက်အနိုင်ကျင့်နေသူများကို ပစ်ခတ်ရှင်းလင်းသတိပေးမှုများရှိသည်။
